「喂喂,integrated task喱幾個point係邊度搵?」「智障,你飛heading搵到hints之後,再G抄冇朋友咪得囉,你補習有冇專心聽咖。」「你今鋪仲唔香腸?!咁都執唔到分」
「屌,我bal極都bal唔到呀!」「睇過!頂你個智障都冇加返個accrued interest,你計到2046喇咁。10% loan 要計返interest入返落Income Statement同Balance Sheet呀。Frend嘟講過好多次喇!」
「頂我溫極都溫唔入腦呀!」「On9,溫乜柒清朝呀,陳sir話宋明君主集權大熱呀!」
「不如一齊做pastpaper喇!」「做乜呀,HomeE呀?」「Maths喇?操多啲熟啲,做Sample Paper喇!」「好喎!」「頂,我冇帶呀!」「咁你返印度食香蕉喇!」
 
如果唔講,可能好多人以為喱個場景係發生係一啲精英班嘅班房,一班同學放學之後成個study group一齊係度溫書。但係唔好意思,此時此刻,個背景係一個停課室,而主角係十個被學校無理停課嘅時候。即使喱兩日冇皇管,我哋依然好自律咁溫書,冇搞搞震。
 
比著幾個月前,我哋仲係度諗點樣同教畜作對,諗緊點樣hea讀佢果科激撚死佢。幾個月之後,我哋十個居然係好一致地攞份Maths卷出嚟,擺埋個timer,計住時埋頭苦幹咁做。喱一刻我哋都明白,即使比你贏咗場口舌之爭,你贏到嘅只有剎那間嘅面子。如果我哋贏到喱個公開考試我哋贏嘅會係我哋將來,仲令我哋可以真真正正係一班想做死我哋嘅仆街面前抬起頭。依家教畜同盧毛的確要對付,但係更重要嘅對手係我哋嘅4C3X同埋自己嘅心魔。所以,我哋唔可以只係一心掛住搞對抗。
 
「嗶嗶…….嗶….嗶」「嘩,兩個幾鐘咁快過嘅,仲有成條Section B咪做!」「算喇,你求Level 5,做淨一條矛所謂喇。」「喂,文仔你咁撚唔小心嘅!喱行寫cos 35度,下一行變咗cos 30度,你搞咩?」「sor9!」




 
其實一班人一齊溫書個氣氛真係好好多,起碼有時你提吓我我串吓你,個人真係精神啲。大家互相鼓勵吓打吓氣,都冇咁易頹。諗返起去到大學之後,通常都係一個人溫書,結果攞起本書睇唔夠兩頁就頹咗。所以真係會特別懷念一班人好似開論壇咁樣一齊溫書。
 
「喂,河童,你成八十幾分喎!」「嘩神喇!」「喂,請食tea喇!」「你都痴Q線嘅。」做完PastPaper之後,我哋通常會交換改,鬥高分。
「叮噹。叮擋。頂當。叮噹」「無驚無險,又到四點。」其實喱兩日啲時間過得特別快,溫一科又到lunch,做多份Paper就放學,啲時間真係仲快過過係課室上堂。
威廉︰「喂喂,大家記住呀,下個星期有好戲睇喇!準時啲返嚟呀!」
我︰「殊……!」我示意叫威廉唔好咁大聲咁興奮,畢竟應該都係唔見得光嘅事。
 
喱個周未,我哋都不停係Facebook Chatroom撩威廉爆少少比我哋聽,但係次次問到喱個話題佢都用「天機不可洩露」嚟回我哋,搞到我哋屌聲四起。
 




「渡日月,穿山水,尚在恨那誰……」「屌,邊個咁早呀!」星期一一朝早,我個電話無段段響咗,我矇住眼聽,都冇睇清楚係邊個。
「喂,起身去廁所喇!」「屌!」電話嘅另一邊係一把好陰森嘅聲音,係邊個?唔洗問喇!
「要睇戲就起身喇!」咪就係個粉腸威廉囉!
 
換好衫之後,我就落地鐵站join埋阿毛同小夫約佢哋一齊返學,一路行一路傾。
「喂,早晨!」「早晨!」
「你估威廉今鋪搞邊科?」「有邊個知呀?佢少少都唔肯講。」
「咁算喇,我哋買定兩包花生。」
「嘩屌,做乜Q事咁多人呀?」我哋個Focus又轉返去阿毛度。
「喂做咩呀,有錢派呀?!」行到學校附近個迴旋處,我哋見到勁多人聚集咗係學校門口,嘈到拆天。