「Woooooo……」「好型呀果下!!!」「未來領袖呀!!!」我哋行到班房門口果刻,成班同學係度拍掌歡呼歡迎我哋。喱一刻個感覺就好似大明星駕到咁樣,成班同學變咗我哋小fans。
 
「你哋今次做得好好呀,一次落晒澤男同埋盧毛面。比掌聲佢哋。」「啪啪啪啪……」「更加熱烈嘅掌聲比立爺,成個抗爭行動嘅領袖。」「Woho…..啪啪啪……」大口仔就好似個炒場嘅主持人咁,帶領住我哋成班嘅氣氛。
 
同時我亦都指住大口仔大聲嗌︰「仲有,比熱鬧嘅掌聲我哋嘅無名英雄……大口仔!」「同埋,你哋每位,幫過手收風嘅!」「Yeah…..........」係喱個時候全場直情舉起晒手,當咗係一個慶祝會咁樣,大呼小叫。係我講到大口仔係無名英雄果時,班上面有三個怨恨嘅眼神投向咗大口仔,唔講以為係大口仔曾經中出即飛過佢哋咁。繼而佢哋用銳利嘅目光掃射全班所有女同學,好似同佢哋全部有仇咁。
 
「喂,你哋開Party呀,唔洗上堂喇依家。」係喱個時候,咁唔應該出現嘅就係個死教畜。當佢出現果陣,我哋全班都用一個好蔑視嘅目光望住佢。
 
「Stand Up!」「……」佢一叫果陣,淨係得三個人有跟住做,其餘都全部坐返低,然後當佢敵人咁望住。
「你哋依家係點呀,咁叫學生呀?咁唔識尊重。」




 
「你咁叫老師呀?做假!大話連篇!是非不分!我相信我哋父母都唔會希望我哋再跟一個咁嘅老師。」我知道喱一刻只要唔係講粗口,道理都會係我喱邊,所以企咗起身當面駁返佢轉頭。我哋都好清楚知道喱個社會如果太講輩份,太講尊卑報從,只會容忍一啲錯嘅嘢繼續,弱者亦只會繼續被欺壓。只有勇於抗拒不公,先可以撥亂反正。
 
「Okay,咁唔洗上堂喇!我亦都唔需要係度喇。」我攤開咗右手,向住班房門口方向,示意佢可以隨便,我哋亦都無任歡迎。
 
教畜攞起佢啲書,拎轉慢慢行出個班房。「你哋唔好以為自己好醒目,今次我唔夠周詳小心,唔代表下次你哋都可以成功。唔好唔記得我同校長權力係大過你,我哋對你做啲咩,唔係所有你都有機會發覺得到。邪係,不能勝更邪!」佢行到門口果陣停低咗,拎轉面帶住鄙夷嘅目光掃視我哋,咀角慢慢向上揚。「你哋好自為之喇。」
 
因為我哋上午係上數學連堂,教畜堂都冇上就走咗去,所以我哋成個上午都係hea,都只係等12點鐘打鐘放學,去食慶功宴。
「叮噹。叮擋。頂當。叮噹」「唉呀,咁又到十二點喇。」阿風打鐘第一個企起身,做一做佢個招牌動作,伸懶腰呻吟再大叫。
 




「喂,去食好嘢喇兄弟。」我喱個膳食部嘅梗係負責call齊人去開餐。「喂,大口仔,join唔join?」「喂,好呀!等埋我呀執埋嘢好快。」
 
「唔等你喇,3秒鐘執唔完就走咖喇。」喱句當然係講笑喇。唉,真係好難得!經過咗中六喱五個月咁多唔同嘅風波,我哋11個男仔終於可以團結埋一齊,齊齊整整咁去食lunch。最初嘅爭執、不和、排斥,喱一刻都變成大家最真摯嘅笑聲、最簡單嘅友誼。喱一切一切,都來之不易。
 
「喂喂,其實你哋想唔想知到底全件事發生嘅緣起係點?」大家食到都差唔多飽,大口仔就問我哋,佢似係知道唔少嘢。
 
「講喇。其實成件事好似你喱個FBI最清楚。我哋都係知少少。」我哋10個都將個目光放係大口仔度。
 
「其實呢,果陣阿菲聽到你哋話咩攦上大區就已經再想開火,但係你哋始終冇up到,佢哋就懷疑你哋放晒比全世界之後restrict唔比佢哋睇,索性嚟招老屈,咁佢哋投訴到教畜果度就梗係幫晒佢哋喇。再加埋佢哋係盧毛面前喊苦喊忽講到個game幾屈辱咁。同埋佢哋最初你果組唱校歌都錄咗片,仲係度屌鬼你哋。所以咪又多項不尊重學校囉。」其實如果唔係大口仔一路通風報訊,叫我哋Hide起Facebook啲嘢,再叫埋全班做證,點得嚟有個100人Facebook Support Group比生果講,有咁多evidence比生果寫。
 




「阿風,早叫你唔好咁hyper。」「屌你喇,鬼知佢咁有創作力咩。」喱個輕鬆嘅時候,我哋梗係要抽吓阿風水喇!
 
「算喇,都過去。咁辛苦抗爭完,之後就專心啲考埋個mock同DSE喇。」
「但係呢,啱啱教畜話邪不能勝更邪,你哋都係小心啲好呀。」大口仔皺起眉頭咁講,好似有啲擔心之後又有事發生。
 
「……」