中仁城,位於中土大陸中央地帶的其中一座大城池。由於位處中央地帶,且是河流交匯之地,自古以來就是交通樞紐的中心點,所以中仁城是一個集經濟與軍事於一身的超級大城。正因如此,此城是一個十分重要的軍事要塞,從古到今四面八方的勢力都想得到它,所以五十年前,中仁城一直處於頻繁的交戰狀態。

「五十年前? 咁你意思係而家呢個城好安全? 」我問。

我和楊兄趕了大半天路,終於在黃昏前抵達中仁城。此時我們身處於中仁城的一間飯館的二樓,望著臨街的位置吃飯,亦即是古裝電視劇常見的那一種,木桌木椅,要大喊小二的那種。

「最少表面上係安全。自從五十年前四大勢力一場大戰之後,佢哋發現再咁互鬥落去唔係辦法,一來自己嘅實力受損,二來中仁城長期處於戰亂亦令經濟無法發展。所以當時四大勢力嘅話事人就約出嚟講數,最後達成協議,四大勢力各派一個人組成聯合政府,以後中仁城有咩重大決策都要投票決定。至於城裏嘅經濟收益就平分四份。」

「四個人? 咁二比二點算? 」



「其實除咗四個最高決策人,底下都仲有一班呢個城嘅名流紳仕、富戶同埋實力高強嘅人組成嘅議會,當上面拗唔掂數就會靠佢哋投票,就好似立法會咁,不過呢個立法會並唔會有平民選出嚟嘅人。」

窮人含撚這個事實,原來無論去到哪個世界都是一樣。

我回想起剛才入城時,看到位於北面的貧民區,以及眼前坐在二樓吃飯的達官貴人,其實這裏,跟香港又有甚麼分別?

「原來又係一班既得利益者喺度圍威喂,我仲諗住古人啲思想會單純啲添。」

楊兄冷笑一下﹕「人類,無論去到邊,身處喺邊個時間,人類始終係人類,佢哋嘅劣根性根本就唔會改變。」他喝了一口白酒,又道﹕「人類為咗滿足自己嘅慾望,再恐怖嘅嘢都做得出嚟。」



楊兄此時說得咬牙切齒,似是曾身同感受一樣。

「喂,你無嘢呀? 」

他的眼神又變回正常,舒了一口氣道﹕「我無嘢,諗起一啲事啫。」
 


此時,突然有一只黑黝黝的東西從昏暗的戶外跳進來,並跳上楊兄的肩膊上。



我嚇了一跳,定睛一看原來是一只黑貓。

我見那黑貓彷彿在楊兄耳邊喁喁細語(okok,我知貓係唔識講嘢,但我真係覺得隻貓喺佢耳邊口噏噏嘛),然後楊兄一個彈起,道﹕「呀南,我有緊要事要走先,我遲啲再嚟搵你。」接著他竟然就從窗外跳出去。

我這才想起我沒錢在身,我連忙喊道﹕「喂大佬我無錢埋單呀,借住啲嚟先走呀喂!」

然後我就聽到「篤」的一聲,一條尾指長的小金條正插在桌子上。

「大俠即係大俠,請食飯都型棍過人......」
 


飲飽食醉,又已經找了客棧落腳,這個時候正好去同貴錢莊找呀牛他們。

剛入黑的中仁城大街也是燈火通明,相比起剛到埗時的小城池,這裏確是繁華得多。



雖說我想去找同貴錢莊,不過我也不知道在哪裏,而且異世界的一切新鮮事物都吸引著我,令我不禁像一個遊客般在鬧市閒逛。

「炎公子炎公子,好久不見了,怎麽最近都沒有來? 」一個濃妝艷抹的中年婦人對著一個路過的公子哥兒拋眉眼。

那炎公子看來頗為受落,馬上回應﹕「蓉姨,今天小翠在嗎? 前陣子找她她都沒空陪我。」

叫蓉姨的大媽(叫佢做大媽係因為佢同跳大媽舞嘅大媽係同一個style)滿臉堆笑﹕「炎公子,小翠想你想得緊啊,來來來,我帶你去見她。」然後就拉了他走進身後的建築物。

我瞄了一眼,招牌寫著「芙蓉閣」三字,門口站了兩個彪形大漢,大概是護院之類吧,另外還有幾個年輕姑娘向著途人搔首弄姿。

老老實實,喺自己世界無撳過鐘仔,嚟度呢度,都真係想見識見識咩係青樓。

反正現在身懷幾兩金,正所謂有錢就鳩痕,於是我就想走進去。



「那來的臭小子,你要幹甚麼? 」彪形大漢伸手攔住了我。

「幫襯囉,唔入得呀? 唔係要打埋呔先入得妓院呀? 」

正被蓉姨挽著手臂的炎公子剛好在我旁邊經過,他跟蓉姨笑道﹕「蓉姨,最近很不景氣嗎? 怎麼連這樣的鄉巴佬也招待的? 」

蓉姨聞言馬上跟護院使個眼色,那護院推了我一下﹕「小子,滾遠點,別礙著我們做生意。」

超!懶巴閉咩!睇蓉姨咁嘅款啲囡都唔方正啦!

我也沒當一回事,不給進就不給進了,就打算轉身離開。

那炎公子卻輕笑道﹕「要進芙蓉閣也先看看自己的身世,這些地方是窮鬼應該來的嗎? 哈~」

我回了一句﹕「出嚟玩唔帶套,因住花柳生上腦呀。」



那炎公子當然不明白我說些甚麼,不過他卻能理解我是不懷好意,他悶哼一聲﹕「我看你是活得不耐煩了。」然後我就感到一股火元素的灼熱感從後而至,我心知不妙,頭也不回的向前疾跑,才走出幾步果然聽到一聲輕微爆炸聲,回頭一看卻是我剛才站立的地方給燒得焦黑一片。

你老味呀!一出手就想攞我命? 好彩我閃得快啫!

我瞥見地上焦黑的範圍,猜測他剛才發出的火球約有網球般大小,而且他剛才發動的速度很快,若不是我感到元素波動,我也逃不出這一擊,看來我是打不過這個火系的五行術師,還是溜之大吉為妙。
 


逃走之後,我東轉西轉,有點迷失於城內。這時我看到一個在路邊行乞的老人,我給了他一個銅板,讓他把我帶到同貴錢莊。

跟著老乞丐走了十分鐘,他果然將我帶到了目的地,我又再多給他一個銅板,他千恩萬謝的離去了。

眼前的同貴錢莊,門面闊大華貴,似是有錢人大宅多於一間錢莊。我心想大城市裏的錢莊果然零舍不同。



眼看裏面的伙計好像正打算收拾打佯,我連忙走進去。

那伙計瞄了我一眼,懶洋洋道﹕「客倌,我們要打佯了,你明天再來吧。」

「我想問你哋司徒老闆喺唔喺度? 我有事要搵佢。」

「老闆嗎? ......」他又上上下下掃視我一遍,然後道﹕「我也很久沒見過老闆了,他的生意遍佈中州,等閒沒能見他一面。」他說罷將我推出店外﹕「好了,我要關門了。」

呯的一聲,我就這樣被拒於門外。

吓? 就咁比人趕咗出嚟?

我又走上前拍了拍門,喊道﹕「咁前幾日有無一個叫呀牛嘅後生仔嚟過搵你老闆呀? 喂喂? 」

「沒有沒有!甚麽呀牛呀豬甚麼都沒有!」

無? 無奶油㗎,咁呀牛佢哋去咗邊?

我也不知道到底發生甚麽事,反正事實就是告訴我現在是找不到呀牛他們了。

那唯有明早再來吧......
 


一覺醒來,赫然發現楊兄就在房間內悠悠的喝茶。

「嘩!乜咁早呀? 你又知我住呢度嘅? 」

「仲早? 就嚟午時啦!」楊兄白了我一眼,道﹕「噚晚我臨走前喺你件衫度做咗啲手腳,所以我知道你嚟咗呢度。」

做手腳? 裝咗追踪器呀?

我馬上檢查我的衣服,卻沒有任何發現。

他笑道﹕「唔駛搵啦,係呢樣嘢。」他從懷裏拿出一個瓷瓶。

我走過去拿起瓶子打開一看,好像是一些白色粉末,嗅了嗅,甚麽味道都沒有。

「呢啲係落痕花種子嘅粉末,你要用內功吸少少入體內,先可以聞到一陣特別嘅味道。一公里範圍有效,噚晚我彈咗少少落你件衫,所以我咪可以搵到嚟囉。」

噢!內功!我幾時先有?

我見楊兄精神奕奕,紅粉緋緋的,似是遇著甚麼好事。

「楊兄你心情好似好好喎。」

「嗯,我件事有啲眉目。」

「真嘅? 即係你搵返你個小龍女? 真係恭喜你!」

他笑著點了點頭﹕「其實未係好肯定,不過我想你幫幫我。」

「講笑咩!我又唔識武功啲五行術又屎,點幫你呀? 」

「就係因為你夠屎先唔會引人注意,而且我今次唔方便出面。仲有就係,件事同你要返去都有啲關係。」

接著,他就將他的計劃告訴我。
 


「做臥底? 玩逃學威龍? 楊兄你係咪睇得周星馳太多? 」

「哈!你講起又幾似喎,不過你應該無周星馳咁好打。」

我白了他一眼﹕「你知就好啦,一陣我入到去比人打點算? 」

「哈!你唔係想學輕功咩? 仲有易筋經呀,降龍十八掌呀......呀我仲有辟邪劍法,你啱唔啱? 」

我雙眼發光﹕「成交!不過辟邪劍法就唔駛喇,你留返自用啦。仲有一樣嘢,我要去搵咗呀牛佢哋先,我仲要同佢哋講老伯過咗身。」

唉...諗起老伯,我都唔知點同佢哋交代。

「好,反正我暫時都無乜嘢做,我同你一齊去。」

有個免費保鑣,又唔拘呀!
已有 0 人追稿