(爸爸no.1)我老豆係口靚妹: 阿政no.44
阿政no.44 團年飯
「習習........」
「唔好食啦,你唔係想食晒佢吓?」
「阿嘉話食唔晒要扔晒佢嘛,d蛋糕又唔留得!」噹噹
「仲嬲佢呀?」我
「冇!佢哋成班乜都唔知,阿嘉又係乜都噏一餐嘅人,係啦頭先我出手好重阿嘉冇事嘛?陣間都要同佢
講聲對唔住.......」噹噹
「咁啱嘅阿嘉又話想同你道歉喎,其實你哋係好朋友有乜嘢事都可以同佢哋講,唔洗收埋響個心度喎!」
「好朋友?依家可能係,但過多幾年佢就係一間大公司嘅老闆,而我可能連一份工都未必揾到嘅人,我哋
兩個係唔同圈子嘅人,所謂嘅友情根本唔會長久!」噹噹
「唔好咁灰啦,如果咁講我哋全部都係小市民,幾年後唔通佢同我哋絕晒交咩?」我
「政仔!響香港生活真係唔容易,爸爸想揾多d錢就要返上大陸做嘢,媽媽做護士要成日輪班,如果佢哋
有錢d每晚可以響屋企可能唔會搞成咁!」
「噹噹.........」
「細細個我成日同爸爸講我會努力讀書揾多d錢等佢唔洗咁辛苦,但原來唔係咁易,我連讀書都讀唔好!」噹噹
「我咪話過我會幫你囉!」我
「但就算上得到大學,將來出到嚟我可以做乜嘢工作?乜嘢工作我先應付到?」
早熟嘅噹噹原來已經為前途擔憂,而我仲響度混混噩噩,中學生涯已經完結,好快我就會踏進依個社會,如果唔
靠爸爸(嘉)我自己又可以做到乜嘢工作?我將來嘅路又應該點行?
「好!我要學媽媽做一個護士!」噹噹
「護士?」
「係呀!護士人工高福利好而且人口老化應該好易揾工,又好小比人炒而且我又唔怕血(直頭血腥添啦),應該幾
啱我--------如果讀到嘅話!」
「放心!我會全力踢你入醫院!」我
「政仔你依句說話冇第二d意思個可?不過如果我真係做到護士我會第一個比你睇我個白衣天使look!」噹噹
望住噹噹,腦海中突然浮現出醫院惡死阿姐嘅畫面,白衣天使?暫時feel唔到,不過嬌小嘅噹噹著起護士制服
又真係幾cute幾可愛嘅!
「喂!做乜望到我實一實呀?」面紅
「諗緊你個護士look!」我
「十劃都未有一撇,食蛋糕啦生日快樂呀!」成支叉隊埋嚟
「唔!」
「哈!你好得意呀成隻小動物咁劈大口比我餵!」噹噹
「我想話如果我唔劈大口我會比你支叉插死!」我
「又講埋d衰嘢,不過你就好啦有人同你興祝生日!」噹噹
「你都有啦吓?」我
「冇喎!爸爸媽媽成日都唔響屋企!」噹噹
「你有咁多friend都冇人同你興祝?」
「你唔係唔知我8月生日架啦,放暑假呀d人都唔知去晒邊,唔通逐個打電話叫佢哋同我興祝咩?」
「咁阿茵佢哋呢?」我
「咪得阿茵囉!不過隻死嘢嗰次買舊蛋糕仔插支蠟燭放響地下,十足十燒街衣咁!」
「係喎你舊曆7月生日,又幾應節吖!」我
「講多次吖!」噹噹笑得好得人驚
「我只不過想有個正常嘅生日啫!」
「咁啦今年生日我同你興祝!」我
「係你先好講!」
「到時同你搞個生日會啦!」我
「唔洗啦!到時有你響我身邊就得啦!」噹噹
「又係嘅,生日只要有家人朋友響身邊已經夠,搞到依家咁反而有d唔自然!」我
「你嘅阿嘉搞乜嘢都搞到大一大架啦,記住呀我係8月16日生日,到時唔好唔記得吓!」噹噹
「8月16..........」
「乜嘢呀?」噹噹
「冇!」
竟然同爸爸同一日生日,依d算唔算係緣份呢?但點解阿嘉又唔同我講嘅?
「係呢唔知阿嘉佢有冇事呢?去睇睇佢囉!」噹噹
「我咪大大個企咗響你後面囉!」嘉
「你幾時響度架?」噹噹
「啱啱!」
「你有冇事呀?」噹噹
「整到隻手踭!」嘉
「睇過............」
「嗱一人一次打和啦!」嘉
「不嬲都冇嘢啦,不過為表誠意食咗依舊蛋糕先啦!」噹噹
「飽啦扔咗佢啦!」嘉
「咪講埋d折墮嘢啦,嚟我餵你!」隊
「你係咪想我爆管.........唔!」
睇住佢哋兩個十足十鬥氣冤家,雖然話真正蔣泳嘉同阿詩係最好朋友,但我覺得依家嘅阿嘉同噹噹先係
最夾,希望佢哋永遠都係咁好朋友,唔好為咗小小事反目成仇!
「喂!大家聽我講一講嘢!」汁
「年三十晚我哋搞咗個行年宵,9:30pm響銅鑼灣集合,有興趣嘅可以PM我!」汁
「阿汁竟然做搞手?」茵
「十幾年都冇人陪佢行花市,襯住依個機會想你哋同佢一齊行囉!」傑
「邊有十幾年呀最多咪十年!」汁
「其實我都想行吓,如果啱嘅一齊囉!」嘉
「好!全體出席!」
「睇嚟今年新年都幾熱鬧!」政
「拜拜!」
「走晒!」
「你嘅生日會正式結束啦!」嘉
「我哋洗唔洗幫手執吓嘢呀?得瑪利亞佢哋兩個好似好辛苦!」我
「傻仔有專人處理唔洗我哋做架,而且平日都有中點同廚師響大屋做嘢
,只不過唔過夜之嘛,咁大間屋真係想做死佢哋咩?」嘉
「不過佢哋兩個話以後每兩三日會上嚟我哋屋企幫手執嘢!」
「唔洗啦!」我
「算啦!其實我都想見吓佢哋,始終都一齊生活咗幾個月,以後我哋兩邊走日頭上多d去玩!」嘉
***********************************************************************
年三十
「小姐,扔埋依袋冇架啦!」瑪利亞
「阿政,我幫你抹隻窗啦!」姬樂
「麻煩晒,我連抹隻窗都唔掂!」我
「男仔一般都係咁架啦,我哋以後多d上嚟幫你哋清潔啦!」姬樂
「會唔會太辛苦你哋呀?」我
「大屋有專人打理,好似依幾日有成十個人上門大掃除,我哋只係行行企企!」瑪利亞
「你哋今年唔返鄉下呀?」嘉
「下年先返,今年我哋會響香港過年,小姐依幾日要多d返嚟得我哋兩個嫻悶!」
「得得!今晚我都會返嚟食團年飯!」嘉
「阿政會唔會一齊上嚟呀?」姬樂
「佢要同佢媽媽食團年飯!」嘉
冇錯!今晚我哋要各自返自己屋企食團年飯,雖然話佢唔鍾意小柔同佢爸爸,不過始終嗰個都係我媽媽,
佢都冇阻止我同媽媽食飯,至於佢宜家嘅身份係蔣泳嘉,依d大時大節一定要返屋企食飯架啦!
仲以為佢做咗學生時間多咗可以一齊團年添,結果都係唔得!
「阿政今晚9:30pm響維園集合,電話聯絡!」嘉
「唔!到時小柔都話要跟埋嚟喎!」我
「得啦得啦!」嬲
6:30pm 青衣
應該係依間酒樓,聽媽媽講佢哋團年飯一般都會同小柔爺爺好嫲嫲一齊食,但陳uncle想見我又唔想我太尷尬,
所以今日只有我哋四個人,講到咁我都唔好意思唔嚟啦,不過都係食餐飯啫,食完就走啦!
「哥哥!」
「小柔、媽媽......陳uncle!」
「你就係阿政?你好!」陳志聰
「你哋唔好咁生保啦,哥哥你可以跟我叫佢爸爸架!」小柔
「小柔!」陳uncle
「阿政!叫我陳uncle可以架啦,其實今日最主要想見你同你食餐飯,唔洗太拘謹,另外我亦都要向你道歉,
雖然我同你媽媽係真心相愛,但都係因為我而破壞咗你家庭,連你爸爸都........」陳uncle
「志聰已經過咗去啦,嗰次意外大家都唔想!」媽媽
「已經過咗去啦,陳uncle媽媽你哋都唔好再放響個心度啦!」我
真係過咗去啦!望住媽媽同陳uncle,比我有一種幸福夫妻嘅感覺,比著以前三日唔埋兩日鬧交,我覺得媽媽
已經揾到個真正關心佢嘅人,媽媽能夠開始一段新感情,反而有一種放下心頭大石嘅感覺,至於我同爸爸亦要重新開始!
「好啦入去啦!」媽媽
「我要坐哥哥隔離!」小柔
「阿政!新年過後我會轉做地勤!」媽媽
「以後你媽媽就會多d時間見你,而我亦打算4、5月搬返出九龍住,到時我哋可以經常見面!」陳uncle
「爸爸其實想你搬嚟一齊住,佢話留間最大嘅房比你!」小柔
「小柔!」媽媽
「其實我哋最希望係能夠多d見到你,一唔一齊住唔係最重要,始終我哋都係第一次見面,但我相信最後我哋會成
為一家人!」陳uncle
「依家已經係一家人啦,以後我會上去哥哥屋企做家務!」小柔
「好似你響屋企都冇乜做家務!」媽媽
「哈~~哈~~」
有講有笑比想像中輕鬆,陳uncle都係一個好易相處嘅人,睇住佢哋依個幸福家庭反而有種失落感,雖然佢哋已經將我
當做家庭一份子,但對我嚟講我就好似一個街外人望住佢哋有講有笑!
到依一刻我終於知道,無論陳uncle對我幾好佢始終唔係我爸爸,依一個跟本唔係我嘅家,我嘅家.........突然間好想見到佢
,唔知佢宜家點呢?
**********************************************************************
「咁多位uncle你哋好!」
「阿嘉真係越大越靚,遲多幾年返公司幫手你就可以舒服d啦!」uncle
今日係團年,響大屋嘅都係蔣家嘅親戚,但係我一個都唔識,連外號答嗲王嘅我都唔知講乜好!
「睇嚟阿嘉之前滑雪受傷已經完全康復!」另一位uncle
「滑雪受傷?」我
「阿嘉之前滑雪撞親個頭,醫生話佢有小部分失憶,佢連自己點受傷都唔記得!」大老闆
睇嚟大老闆冇將蔣泳嘉情緒爆煲嘅事講出去,咁我都唔好亂講嘢!
「聽講你見返阿政!」uncle
「可惜阿雄就意外去咗!」又一位uncle
「聽阿政講佢爸爸好好人又叻又幫到公司手,可惜我一次都未見過佢!」我
「未見過?聽講你出事第一個飛去英國嘅人就係阿雄!」uncle3
「張俊雄去英國揾我?」我
「阿滔最信就係阿雄,佢第一時間就派阿雄去睇你嘛!」uncle2
「而且你響香港休養依一年,阿雄一直都有嚟大屋照顧你架?」uncle
「點解我唔知架?」我
「你失憶嘛!」成班uncle
失你老味我扮之嘛!但點解好似斷晒片咁乜都唔記得?
乜張俊雄有成日上嚟探我咩?唔係唔係,乜我有成日上嚟探蔣泳嘉咩?
好似有小小唔妥?
等等!當日我響天台見到蔣泳嘉,我好似唔識佢佢又唔識我架?
但我哋見咗成年冇理由唔識架?
咁我之前墮樓嘅記憶到底係真定假?
仲有蔣泳嘉同阿政係青梅竹馬,而我又照顧咗佢成年,咁佢跳樓嗰晚我又無啦啦響天台撞到佢,真係咁啱?
究竟我同佢一齊跌落樓係意外定另有內情?
究竟嗰一晚發生咗乜嘢事?