「聽日放半晝,不如我地去街? 」 

一睇到呢句Whatsapp,我連口中飲緊果啖水都噴左出黎。 

實在太令人興奮了。  

「好啊…幾點邊度等?」 

「二點旺角站等啦,我想換件衫先。 」 



「好啊無問題。」 

我好辛苦咁回佢Whatsapp,因為我成隻手都震緊。 

回左Whatsapp之後,我終於忍唔住係屋企大叫。 

你地可能會話,夜晚係屋企大叫唔會被屋企人屌咩? 

怕乜,我自己住既。 



我父母長期係外地做野,一年先返香港四次左右。 

我仲有個家姐既,不過又係成日唔見人。 

雖然唔會被屋企人屌,但會被兄弟屌。 

因為原來我RC開左音量感應。   

被一眾兄弟問候完之後,我決定退下火線,早d休息抖足精神。 



星期六一早我就起左身,梳洗好就精精神神咁落樓。 

Cherry又係同一位置等緊我。 

Cherry:「早啊,今日好精神喎。 」 

我:「係啊,今日約左你嘛。 」 

我好似係第一次敢望住佢講野,好事黎既。 

同早兩日一樣,Cherry一落車就自己走左去。 

諗諗下,只係四日,個「謠言」已經冇人再提起, 

我同Cherry一齊左,都只係四日,呢一切,都好似黎得太快。 



到而家,我都未係好明點解佢要揀我。 

但我已經暫時放棄思考,只想好好享受。 

星期六日既補課都只係返半日,可能班教畜都想快D收工,所以大家都抱住返黎玩既心態上堂。 

好快星期六既補課就係一片喧嘩聲下結束。 

「喂魯路修,去G-Force? 」肥豬開始周圍搵人。 

「唔啦,家姐今日返,我要執屋。」 

我又講大話了。原諒我啦各位兄弟,我會補償架。  



返屋企換套衫洗個臉,我就急急腳出門口,因為出旺角都要八個字。 

更何況,第一次同女女出街梗係唔可以遲到。 

結果既係,我早左半個鐘到。 

我唯有周圍望去打發時間,見到一pair pair情侶真係眼火爆。  

咦,唔係喎。我都係等緊女,應該無資格話佢地。 

1:50左右,我見到Cherry。 

佢著住一件灰色Tee,加條熱褲,看似平凡但又不平凡。 

佢呢身裝束將佢既優點完全表露出黎,白滑既長腿,傲人既身材。 



不得了不得了。 

我feel到我心跳開始加速,紅都臉哂。