[校園][應該純愛][友情]「我想要你，仲有你既世界。」: 父母

雖然好少見父母，但我又未誇張到會唔記得佢地個樣既。 

上一次見佢地係幾時呢？八月？定六月？ 

但呢一刻我有樣更重要既野諗緊。 

「喂，你幾時考到車牌架？架車點黎？ 」 

家姐：「唔？一年前囉，部車就上個月上網買。 」 



我：「咁你揸過幾多次？」 

家姐：「今次第四次。 」 

FUCK MY LIFE。 

去機場既車程我唔敢訓着，怕一睡不起。 

去到機場泊好車，家姐係車尾箱拋左一個紙袋比我。 



我一睇，係我平時既衫黎。 

家姐：「快D換左佢，我係接機個度等你。 」 

又幾細心喎衰鬼。 

我拿拿聲搵個廁所換走套校服，不得不提機場廁所真係好一般。 

我一換完就去接機大堂想搵返家姐，但話咁易咩機場咁多人。 



我搵極都搵唔到家姐，仲比人撞左幾下。 

正當我想打電話搵家姐個陣，有人係後面搭我膊頭。 

比人搭我膊頭係我好唔鐘意既事，僅次於俾人叫我口靚仔。 

「口靚仔，我地好耐冇見。」 

罪該萬死。 

我：「放手。你知道你踩緊我底線。」 

「你都係冇變。」

隨着佢放開手，我都擰轉身。 



我：「三個月可以點變啊，老豆。 」 

無錯，做哂兩樣我最憎既野既人就係我老豆。 

啊媽同家姐都係老豆後面拖住兩個喼咁慢慢行過黎，家姐仲對我奸笑。 

唉，佢又做左D乜。 

我：「你地今次返黎做乜？」 

老豆：「掛住我個仔嘛。 」 

我：「無人可以係我面前講大話，連你都唔可以。 」 



我已經好嬲。 

啊媽：「魯路修冷靜D，今次我地返黎係參加你大伯既喪禮。 」 

大伯死左我都唔知添。 

老豆：「就係咁啦，所以我地至少會留係香港一個禮拜。 」 

我：「咁你地住酒店？ 」 

老豆：「梗係返屋企啦。 」 

我：「我個邊得番間單人房喎，美星搬左過黎。 」 

美星：「叫我家姐。 」 



老豆：「咁呀，我地去美星度住咪得，魯路修幫手拎行李。 」 

我真係好唔鐘意佢。 

係送佢地去家姐屋企途中，我冇講過野，自己打橫訓係最後個排。 

唔知過左幾耐就到左，家姐叫我落車幫手搬行李，佢話佢留係架車到等我。 

雖然好唔情願，但始終係血親。我結果都有幫手搬行李，送佢地上去。 

幫佢地安頓好哂之後，我都準備走，點知俾啊媽叫住。 

啊媽：「魯路修。 」 



我：「咩事？」 

啊媽：「你大個仔啦，拍拖都好正常既。」 

嘖，家姐真係講左出黎。 

我：「係既… 」 

啊媽：「啊媽都後生過，都有拍過拖，好明白你而家既感覺。你要記住黎緊既日子你可能會好開心好幸福，但都可能會有傷心難過，失落既時候。你一定要有心理準備。」 

「黎緊既路可能會好難行，雖然我地唔會時時刻刻係你身邊，但你要知道，就算所有人都唔鐘意你，我地永遠都咁愛你。 」 

聽到呢度，我頭也不回咁走左。 

再唔走，我怕我會喊。 

原來，我好愛我父母。 

至少，我愛我啊媽。