[校園][應該純愛][友情]「我想要你，仲有你既世界。」: 先知

「晨哥你意思係指你一早估到會咁？」 

我開始對晨哥有少少防範。 

佢好似可以睇穿所有野。 

「唔…雖然過程有少少唔同，但結果都係一樣。 」 

晨哥講完就打開左粒可樂味珍寶珠食。 



「只係我冇估到係肥豬自己爆響口啫。」 

我：「你意思係有人會講呢件事出黎？」 

晨哥冇答我，只係繼續食佢既珍寶珠。 

我：「晨哥，點解你會知咁多。」 

其實肥豬示愛呢件事，只有五個人知。 



究竟晨哥點樣知道？ 

晨哥：「我諗你而家一定係想講冇人可以係我面前講大話？ 」 

嘖，我完全被佢睇穿。 

晨哥：「魯路修，你一直都講大話但又要人對你講真話，唔覺得自己好矛盾咩？」 

佢講得好岩。 



我一直都對唔少人講大話。 

晨哥：「肥豬件事，你就當我係先知啦，唔好諗太多。 」 

晨哥講完呢句，就拍左我背一下走左。 

7-11入面，得我一個呆呆咁望住個雪櫃。 

我冇買到支雪碧就繼續上路。 

沿途都冇再見過晨哥或林穎欣。 

條街上面好似只有我一個人。 

我抬起頭望住個天，開始傻笑。 



原來我，都一直被人睇穿。 

晨哥話我矛盾，一D都冇錯。 

我一直都對身邊既人有所隱瞞。 

好似最初呃肥豬佢地去見Cherry。 

仲有同Cherry一組件事，呃佢地話幫肥豬溝女。 

但係我又要求所有人對我坦白。 

真係好矛盾。 



哈哈。 

但係只有一個人我唔會亦唔可以呃佢。 

Cherry。 

因為直到呢一刻，佢就係我既世界，我既一切。