[校園][應該純愛][友情]「我想要你，仲有你既世界。」: 替身

林穎欣，好似自從新年之後就冇見過佢。 

一直都覺得自己對佢唔住。 

算啦難得人地主動約我，禮貌上都應該要應約既。 

大概咁係我唯一可以做既補償。 

我：「我今日得閒既，你想去邊。」 



過左幾分鐘，我再收到回覆。 

「十五分鐘後你樓下見啦。」 

呢一刻，我腦入面又響起另一個問題： 

我應唔應該同Cherry投案先？ 

我應承過自己唔可以對佢講大話。 



但係隱瞞，應該唔算講大話？ 

我唔想佢亂諗野，都係唔好同佢講，等佢問起先講。 

十五分鐘後，我落左樓，見到佢。 

佢一身紅色大衣加對長boot，個feel好似Cherry。 

我甚至有一刻以為眼前既人係Cherry。 



我：「唷。」 

林：「多謝你肯陪我。」 

我：「反正今日我冇乜野做，出街轉個圈都好。」 

我又講大話了。 

之後佢帶住我幾乎行哂成個旺角，我一直係佢後面跟住行。 

望住佢個背影，我諗返起個晚好激動既佢。 

而家既佢雖然有笑，仲好似笑得幾開心，但我總係覺得有D怪。 

佢身上有種違和感，我好似係邊度見過呢種違和感。 



反差太大啦，令人難而至信。 

行到咁上下，佢問我今晚想食乜。 

其實我冇諗過要同佢食埋晚飯，但費事打斷佢雅興，我最後都應承左。 

我：「我冇乜所謂。」 

林：「咁平平地食吉野家啦。」 

吉野家？可以話係我至愛，肚餓第一時間想食既野。 

佢話食吉野家係巧合？ 



算啦死毒撚唔好過份解讀。

去到吉野家，我望一望個餐牌，再望一望林穎欣。 

我：「eh…天氣咁凍，不如一人一鍋？ 」 

林：「好吖，我去搵位先，你買左自己個份先啦。」 

我：「唔洗咁麻煩啦，我一次過買哂咪得。」 

當係我請佢食啦。 

一張四人枱，放左兩個爐，隔開左我同佢。 

我既視線一直放係個爐度，除左佢同我講野既時候。 



食到咁上下，佢突然問我： 

「你聽日約左佢..？」 

突然講起Cherry令我有少少尷尬。 

我：「係吖…」 

林：「咁你聽日玩得開心D，呢個送比你。」 

佢係個袋入面抽左一盒野比我。 

盒野好細盒，直頭可以放入衫袋。 



我：「點好意思呀我收禮物…」 

我試圖推卻，因為我知道我收左可能又會比左個希望佢。 

林：「咪咁婆媽啦，又唔係咩貴重野，收左佢啦。」 

我最後都係收左。 

食完野都成九點幾，我想聽日早少少起身，所以同佢講想返去。 

佢都話好，原本可以就此分別，但奈何同佢同一個屋苑，回程既路都一樣。 

回程既路上，大家都無講野。 

我一直係䄛袋度揸實盒野，嘗試猜想入面既係咩黎。 

應該都係朱古力黎架啦。 

返到去屋苑個商場，我同佢Say Goodbye準備走，點知又俾佢叫住。

林：「喂，魯路修，覺唔覺得我今日有乜唔同？」 

咁樣問我，一定要小心答，唔係會出事。 

但係呢D問題，唔係都係女朋友先會問架咩？ 

我：「唔覺有乜特別。」 

林：「唔覺我好似佢咩？」 

果然係咁，今朝我果然冇feel錯。 

我：「咁又如何？你同佢根本係兩個人，你冇可能成為佢。」 

林：「我只係想話你知，你鐘意佢既野我都有…」 

見佢咁講，我忍唔住望下佢。 

唔望尤之可，一望我竟然發現有另一個自己企左係林穎欣後面。 

朝早發完惡夢，夜晚又有幻覺？ 

「喂，人地都做到呢個地步，真係要咁絕情？ 」 

我：「但係我有Cherry啦喎。」 

幻：「你自己咁怕失去佢，點解你唔留個後備比自己？ 」 

幻：「你同Cherry一齊既時候總係拉到自己咁緊，下下迫自己做一堆唔想做既野，唔覺辛苦咩？」 

幻：「Ada佢可以俾你䆁放自己所有既軟弱，自己諗清楚啦傻佬，我就係你，我最了解你。」 

幻影就此消失。 

林：「我真係唔介意做佢既替身…」 

我深呼吸，長嘆左一口氣。 

我：「每個人都係獨一無二，模仿他人只係為左認清自己，你咁做係無意思。」 

「若然我係你，我會搵出自己比任何人都優勝既地方，用佢黎吸引人。」 

應該只有用道理，先可以令我離開呢度。 

「今日多謝你，祝你情人節快樂。」 

我錫左佢一啖，就轉身離開。 

當時我唔知呢下舉動到底係岩定錯，完全係意識驅使。