「魯路修你要好好珍惜呢段關係,真愛係得來不易架,同埋唔好同人講今日既事。」 

晨哥最後咁同我講,睇黎佢已經回復正常了。 

我最後都無更改到份出賽名單,由佢維持現狀。 

好似直至決賽日,晨哥都冇同阿欣講野。 

嘛,雖然我好想幫佢,但都係唔好自找麻煩,因為兩邊我都唔想得罪。 





都係等晨哥自己處理啦。 

今日標槍因為小人報名,係上晝已經搞掂,所以我可以周圍走。 

我選擇左同Jason兩個去賽道邊睇比賽,而家係男甲110米跨欄決賽。 

參加既全部都係我識既,咦?阿偉都有份,孩子挺能幹唷。 

結果阿偉拎左個第二,差一個身位到就追到。 





身為朋友既我當然要即時上前恭賀佢啦,但行到埋佢卻發現佢臉有難色。 

我:「唷,恭喜你喎阿偉。」 

阿偉:「多謝…」 

Jason:「你隻腳做乜事?」 

我望一望佢隻腳,發現佢右腳好似企唔直咁。 





阿偉:「仆街啦今次…用錯左力整親添… 」 

我:「我地扶你去救護站先啦,Jason幫我手。」 

就係咁,我地扶左佢去救護站坐。 

阿偉:「今次班接睇黎我跑唔到了..靠你啦Jason。」 

eh?係喎而家要搵後備喎!

「痴撚線我唔會跑,你去搵晨哥啦。」 

呢個係Jason既第一反應。 

咁決斷既答覆都顯示左Jason既決心,我都無謂迫佢,去搵晨哥算啦。 





晨哥咁岩就岩就係救護站出面同低form女女影相,表情好輕鬆,應該唔知咩事。 

我:「喂,晨哥,大件事啦。」 

晨哥:「我知啦,等我黎啦,幫我去同司令台講,正好今日我想郁下。」 

原來佢係知既,咁我都無謂多講了,去搵Cherry先。 

我:「唔該~5C班班接名單有改動。」 

Cherry:「哦?lulu?要改邊個?換阿欣做正選?」 

我:「唔係吖,阿偉整親左隻腳,晨哥代佢出賽。」 





Cherry:「仲以為佢終於肯換阿欣做正選添,得啦我幫你搞掂佢。」 

我:「始終阿欣有傷,佢唔比阿欣跑都好正常啫,唔該你啦,一陣見啦。」 

搞掂完出賽名單之後,我就開始上看台班馬,因為仲有唔夠半個鐘就到班接。 

大家都陸陸續續落到賽道係度打醬油,唯獨阿欣企埋一邊。 

佢好似唔知自己仲係後備,算啦話佢知都無用,都唔會比佢跑。 

晨哥係呢個時候開始換釘鞋,引起其他人注意。 

師父:「喂晨哥乜你要跑咩?」 

晨哥:「嗯,阿偉整親隻腳所以由我頂上。」 





Anna:「咁洗唔洗再練下交棒?」 

晨哥:「無咁既必要,只係順序要改一改,十四你第一棒,我最尾。」 

我:「喂晨哥咁好似…」 

晨哥:「放心,我一定會贏,咁係為左我地班。」 

其實你係想講為左阿欣啫… 

阿欣係呢個時候行左出黎,細細力打左晨哥心口一下。 

阿欣:「我唔䆟許你輸比我以外既人,明未? 」 





睇黎呢兩個人都非常唔老實呢。 

晨哥:「失敗係唔容許既,大家明未?」 

全:「YES!SIR!」」 

氣勢銳不可擋呢。 

Cherry都由司令台出左黎,企係我隔離。 

我:「果日你同阿欣講左D乜?」 

Cherry:「唔?無啊,同左佢去M記傾偈囉。」 

我:「details plz。」 

Cherry:「佢係咁講返晨哥D野囉,原來佢一直都有留意晨哥。」 

我:「哈哈,兩個都係咁。」 

Cherry:「兩個?」 

我:「無野,睇比賽啦。」 

Form 4既班接要開始了,下一場就係我地級了。

Form 4既比賽結束了,而家到我地。 

原本好嘈既我地突然間都靜左落黎,個個眼定定咁望住條賽道 

我估大家都係度諗緊同一個問題:我地真係可以贏? 

其實咁多年黎我都未見過晨哥跑步,佢快唔快根本無人知。 

但事到如今都只可以聽天由命了。 

鳴槍聲一響,十四就好似一隻解除左枷鎖既怪物咁一直向前衝。 

十四好成功咁拉開左大約十幾二十米既距離,交左棒比Anna。 

Anna保持住十四留俾佢既優勢,繼續同其他班留有少少距離。 

可惜到明慧跑個陣,差距已經收窄,A班已經幾乎追到明慧。 

果然,勝負要睇晨哥。 

睇佢同明慧交棒個下,我個心真係好似停左一秒咁。 

幾驚佢會失手接唔到。 

好彩佢順利接到,但A班條契弟都叫跑得快,交棒個一刻已經快過晨哥少少。 

連我都開始忍唔住大叫晨哥加油。 

晨哥回應左我地既期望,一口氣向前衝,速度快到嚇人,甚至快過十四。 

我地班對於佢既速度無一不驚訝,連一向口水多過茶既旁述都突然deadair。 

若然要我用腦海裡面既野形容而家既晨哥,只有兩樣野。 

真係跑得好快既小明同埋衝鋒21。 

最後一如晨哥所言,勝利屬於我地班,只係快A班零點幾秒。 

一直係終點等既阿欣比我地任何一個人都要快咁衝上去攬住晨哥。 

睇黎晨哥唔只贏左比賽呢。