我記得佢話呢排鐘意《四月是你的謊言》,買呢隻碟應該無死。 

我速速磅水,將呢隻碟收入袋。 

師父:「你有睇《四月是你的謊言》咩。 」 

我:「我鐘意Seven Oops唔得咩,行得未呀,差唔多要返去啦。」 

Jason:「嗯,走啦,返去LOL。」 



我地離開信和,各自返屋企。 

大約五點鐘左右,我收到Cherry Whatsapp。 

Cherry:「返左屋企未?」 

哎,開始Check我行蹤啦。 

我:「差唔多啦,仲有兩個站左右。」 



Cherry:「有無買禮物比我呀? 」 

噢,原來係為份禮物。 

我:「買左啦,你應該會鐘意。」 

Cherry:「咁你幾時俾我?」 

我:「UT最後一日先啦,咁心急做乜。」 



Cherry:「好想快D知嘛。 」 

如是者,為期四日既UT就開始左。 

回望上次UT,好似半年都無。 

上次我都認真左,都係因為Cherry。 

不過今次有少少唔同,我唔再係要守住佢,Cherry應該唔會咁易離開我既。 

今次既動機更為單純,係因為Cherry想我考好。 

當然,可以免役補課同我唔想俾人睇死都係原因啦。 

死啦,點解溫左書好似仲緊張D咁既? 



份卷我明明識做架喎,點解我仲係咁驚? 

我係怕失敗?定係怕辜負Cherry對我既期望? 

「喂,唔洗咁緊張喎,衰左咪繼續同我地一齊補課囉。 」 

Jason係臨考歷史前拍一拍我膊頭。 

我應該有講過,我最憎人掂我膊頭,但呢下,我出奇地接受。 

種感覺就好似一個朋友係你浸親果陣拉返你上黎咁。 

所以話,人生難得一知己。有個知你煩緊乜,仲肯出手拉你一把既朋友真好。 



簡單一下拍膊頭,驅散哂我既煩惱。 

我:「低能,邊個緊張,我贏硬。 」 

而家既我,只係一個挑戰者,無野好煩,無野輸唔起。

我抱住呢種心態去考剩低既科,感覺即刻唔同哂。 


無哂D所謂「重擔」,發揮都好似好左,可以話係揮灑自如。 

話咁快,已經去到UT既第三日,今日考既係數學,可以話係我最怕既野。 

我好早就返左上班房,坐係度等,等自己可以係考之前load返D公式出黎。 

係我冥想既同時,晨哥同阿欣一齊返左黎。 



晨哥:「咦,因乜解究咁早呀魯路修。」 

呀,係喎問下晨哥識唔識子琪都好。 

我:「喂,晨哥,識唔識一個女仔叫子琪,英文名係Kelly?」 

晨哥:「識呀,friend介紹既。 」 

一聽到佢話識,阿欣即刻踩晨哥隻腳。 

阿欣:「邊個Kelly? 」 

晨哥:「咩呀,咪同我地搞聯校singcon果間架囉,我最近開會都係同佢開。 」 



哦,原來係隔離校,唔怪得知佢話應該好快再見啦。 

我:「唔該哂晨哥。」 

晨哥:「我就真係唔該你呀,點解問起佢既?」 

我:「無,原來佢係我小學同學,最近撞到佢,佢話識你咪問下你。」 

晨哥:「佢都幾靚架喎,咁有女人緣既你。」 

我:「咪玩啦,我有Cherry就夠。 」 

晨哥:「哈,夠專一,似我。 」 

阿欣:「我唔覺你專一囉衰人。 」 

再傾多一陣就開始考數學,六個字概括,盡人事,聽天命。 

不過我覺得自己都考得幾好既。