[校園][應該純愛][友情]「我想要你，仲有你既世界。」: 神之怒
唉，次次都係我幫晨哥頂，簡直就好似毒撚要幫MK埋單咁。
我已經預見到自己今次會有一個修羅之旅。
唉好彩「副組長」呢個title應該同「副主席」一樣，都係花瓶黎啫。
少做少錯，應該唔會有位比人入既。
之後我地去過關同其他學校既人會合，坐旅遊巴去第一站參觀。
哇同一堆唔識既人一齊真係令我周身唔自在，抖唔到氣咁濟。
坐到我隔離既Cherry見到我咁以為我唔舒服，猛咁問我有無事，要唔要藥。
我：「我無事，只係有少少唔自在啫，搵D野分散下注意力先。」
晨哥：「要唔要鋤Dee？我有喎。」
坐我地隔離行既晨哥係jacket內袋抽左副啤牌出黎，都痴痴地缐隨身帶住。
但若睛話已經見到水壩，應該好快到，所以我地都係無玩到。
落到車之後例牌要點點人數，要睇下有無邊個on9仲訓緊無落車。
呢d小事梗係由我做啦，點敢麻煩到晨哥。
我望一望，十個人係哂度，搞掂。
等埋其他學校D人搞掂之後我地就由一個導賞員帶住參觀，開始入去。
我對呢D講解完全無興趣，寧願用自己對眼去睇，所以我周圍望，點知比人拍膊頭。
我擰轉頭一睇，係D班既Roy同Chris，我同佢地都有兩句偈傾既。
我：「咪拍我膊頭啦第一日識我咩。
」 Roy，Chris：「邊有拍你膊頭啫。
」 我：「屌咁唔通我撞鬼？
」 「Hello，係我拍你膊頭架。」
我隔離個男仔突然開聲，嚇左我一下。
男：「Sorry呀我唔知你唔鐘意人拍你膊頭，我叫Ray呀。」
呢條友睇落唔似其他人喎，個feel好陽光，應該又係男神class。
我：「不知者不罪，你叫我lulu得啦。」
Ray：「咁lulu，可唔可以話我知前面果個男仔叫咩名？應該係你學校既。」
佢指既方向只有晨哥係我學校既。
我：「果個？佢叫藍洛晨啊。」
Ray：「果然係佢呢，唔該曬你呀lulu。」
佢之後就無再同我講野，怪怪der。
之後我地被領至一個比較大既展覽廳，仲俾左張工作紙我地叫我地自由參觀。
我望一望張工作紙已經唔想做，所以打算去搵Cherry，但見佢同若睛一齊睇緊野就費事過去了。
我自己搵左排櫈坐低，拎部新換既iphone 6PLUS出黎聽下歌。
一插起耳機，成個世界都唔同哂。
唔知大家有無試過望住一個熟人，再聽住一首歌就突然感觸起黎？
我而家正正就係咁，我聽住Aimer既《今日から思い出》再望住Cherry就突然有種悲傷。
我自己都解釋唔到點解會咁，可能係因為Aimer唱得好sad掛。
唔得，我覺得自己再聽落去會喊，都係唔聽去個廁所洗個臉先。
洗完個臉成個人都精神哂，不得不提天朝既廁所真係好難頂，留多一秒都唔想。
行到出去轉個彎我就見到晨哥，佢仲要一臉唔耐煩。
唉又邊個唔知死惹佢啊，死左就乜都無架啦。
我又行左兩步，發現原來同晨哥講野既係Ray，個樣仲好有敵意咁。
等我又八卦下佢地講咩先。
晨哥：「唔想玩咪唔玩囉，反正每次都係贏，覺得哂我時間。」
玩？玩乜？
Ray：「你肯定知自己會輸所以先唔敢再出學界啦，怕輸比我。」
晨哥：「哦，隨便你點講，反正你件垃圾無贏過我，你點都證明唔到你好過我。」
我發覺「垃圾」呢個字只會係晨哥好認真個陣先會講出口。
「垃圾」呢個字好似一支穿心箭咁一下ko Ray，即刻無聲出。
「係想贏我既，今晚返左酒店黎搵我，鬥乜我都奉陪。」
講完之後晨哥就行黎我呢邊，一手搭落我膊頭「的」我走。
晨哥：「咩都唔好講唔好問，我而家好嬲。」
晨哥帶住我去搵Cherry同若睛，中途都無放開過我，直至行到去Cherry隔離。
晨哥：「Sorry，啱啱搭你膊頭。」
我：「放過你一次咁多啦，代價係話我知個阿Ray係咩來頭。」
晨哥：「我唔想講，若睛你話俾魯路修知Ray Chow係咩人啦。」
若睛：「Ray Chow？勁人黎架喎，兩年學界100m冠軍，咩事啊？」
晨哥：「因為我無參加學界佢先有冠軍啫。」
我：「無，頭先晨哥被佢串，話咩晨哥怕左佢，之後晨哥叫佢有種就挑機，唔好得把口。」
若睛：「唉，阿欣叫左我睇住你架，第一日你就搞事，快D同人道個歉算啦。」
晨哥：「道歉？我無即時打佢已經好剋制，而家係我被人睇小，我絕對唔可以接受。」
Cherry：「唔可以衰比人睇架！我支持你！」
我硬係覺得呢句野係同我講。
我：「嗱，晨哥，我一直都睇你頭既，我一定撐你，但佢會挑戰你D乜？」
晨哥：「佢無膽既咪包剪揼囉，不過應該多數係籃球，佢好似幾擅長。」
Cherry：「我睇過酒店好似有個室內籃球場架。」
我：「咁有無乜我可以幫到手？」
晨哥：「有，叫阿Roy同Chris準備下，我要炒佢一鑊甘，等佢以後無面見人。」
哇，一個唔小心輸左既話晨哥就遺臭萬年架喎…
晨哥：「放心，我唔會輸，因為我要佢為挑釁我而後悔。」
呢個氣勢，銳不可擋。
晨哥：「不過如果佢真係揀包剪揼既話我都唔知點算啦哈哈。」
無人敢笑。