[校園][應該純愛][友情]「我想要你，仲有你既世界。」: 離別之刻
呢一日，看似漫長卻又很短暫。
我按照佢既意思，全日都留係屋企陪佢。
除左食飯，沖涼去廁所之外，我都同佢一齊坐係梳化睇碟。
佢一直都挨係我膊頭，大家都無乜點講野。
我就因為覺得無聲勝有聲先唔特別搵話題，但佢諗乜我就唔知喇。
煲碟以馬拉松式既方式進行，當中從無暫停，直至第朝太陽伯伯出黎我先醒覺原來已經天光。
嗯..膊頭好攰…俾佢責左咁耐唔慌唔攰…
我：「喂..天光喇…你快D去check下有無野漏喇…」
佢無任何反應，繼續挨係我膊頭，郁都唔郁下。
我伸個頭望下佢，原來佢訓著左。
佢明明已經訓著左，但仍然緊緊咁攬住隻1/1 小埋毛公仔，想拎走都無辦法。
睇黎佢真係好鐘意隻小埋呢。
我小心翼翼咁將佢個頭由我膊頭上移開，再用個枕頭墊住佢個頭，等佢可以繼續係梳化度訓。
望住佢抱住隻小埋係梳化度訓個樣，十足十一個睡公主。
我好想影低佢呢個樣，但我無咁做到。
我個心叫我唔好咁做。
「唷，醒左嗱？」
我被人係背後拍左下頭，又係美星。
尋日美星完全無理過我地，自己一個出左去，一返黎就入左房，為我地盡可能製造更多獨處既時間。
我心入面幾感激佢，我講真。
我：「細聲D，佢仲訓緊。」
美星：「咁你而家諗住做乜？等佢醒？」
呃…其實我都無諗過而家做乜好，只係因為天光，個膊頭又攰先放低佢企起身鬆下筋骨。
我：「無idea啊..或者打鋪機等佢醒去食早餐掛…
」 我又食左美星一掌。
我：「做乜打我呀！
」 美星：「你on9咪打你囉，呢d時候仲打機，食懵左？
」 我：「吓咁我做乜好？落街買早餐比佢？
」 美星：「買你條命咩買！自己煮啦懶撚！
」 我：「吓但係我唔識煮早餐喎..」
美星：「而家又唔係要你煮酒店水準，最重要係份心意呀魯路修！
最多家姐係你旁邊教你！」 佢開始推我入廚房，我無反抗。
其實我都有諗過煮早餐，畢竟佢煮過咁多次野比我食，至少最後煮返比佢一次都好，但我怕自己煮唔掂。
而家美星話會幫我，咁就無問題啦。
我係美星「親切」既指導下，一手一腳咁整緊份早餐出黎。
多士同煎火腿就完全唔係問題啦，問題係炒蛋，對我黎講好麻煩。
「唔好比D蛋殻跌落去！」
「打蛋打快D啦你男人黎架！」
呢D就係我所講既「親切指導」，我俾美星鬧到一臉屁。
不過我都無諗住反駁，因為我而家需要佢先可以做好眼前既呢份早餐。
唔知出左幾多汗同受左幾多下罵之後，我終於用自己既力量整好份早餐。
我：「呼…終於搞掂…
」 美星：「快D拎出去再叫醒阿妹食啦。
」 我：「嗯。
」 我好想快D俾佢試下，好似以前幼稚園整完手卷想第一時間俾阿媽食咁。
我小心翼翼咁捧住份早餐出去，佢仍然躺係張梳化上，郁都無郁過一下。
我放左份早餐係餐檯上面，擦擦對手就行過去準備叫醒Cherry。
問題又黎啦，用咩方法叫醒佢好？
可以的話，我想用個比較特別既方式叫醒佢。
唔知錫啖佢，佢會唔會醒呢？
諗多無謂，試下咪知，反正最多俾佢笑兩下鬧兩句。
我撥開佢額頭前既頭髮，深呼吸左一下就輕輕錫左落去。
但佢咩反應都無，仍然郁都唔郁。
果然唔得呢..我真係傻..又唔係咩童話故事，有乜可能錫一啖就醒。
算啦都係拍醒佢啦。
「嗯~~」
唔！？
佢突然發出奇怪既聲音，嚇到我即刻退後兩步。
我：「你醒左架..？
」 Cherry：「係吖~聽到你係咁俾家姐鬧，嘈醒左。
」 我：「咁做乜仲詐訓。
」 Cherry：「想睇下你想做乜囉，係咪有野想比我呢。
」 嘖，咁咪冇哂驚喜囉，豈有此理。
我擺出一個無哂引既樣，展現俾佢睇為佢準備既早餐。
話說，今次好似係我第一次煮野比屋企人以外既人食，莫名其妙有少少緊張。
我：「呢份係魯路修流早餐，請隨便享用。
」 Cherry：「噢…
」 佢好似有少少感動，計劃通。
Cherry走到去餐檯前坐低，望實份早餐郁都唔郁。
做咩呢佢？
美星呢個時候都係廚房行出黎，仲拎住一個好靚既杯。
美星：「係咖啡黎架，專登配合阿妹你既口味去調配，當係家姐我既小小心意啦。」
美星一邊講，一邊將杯野放係餐檯。
但Cherry無任何表示，仍然傻傻咁望住餐檯上既兩樣野。
我：「芷睛..？」
唔知係咪因為我叫佢中文名，佢好似回過神黎。
Cherry：「啊…唔知講乜好添…
」 佢開始傻笑，開始拎部電話出黎影低係佢眼前既野。
我一直係佢後面望住，佢好似突然恍然大悟咁成個人震左一下，擰轉面望住我同美星。
Cherry：「不如我地自拍一張？
」自拍？咁麻煩我唔想喎。
講下笑啫，佢開到口我又點會拒絕。
我默默咁企左係佢後面，擺出一個V字手勢，仲專登單眼扮型。
佢亦都嘟起個嘴，用港女十式影相。
至於美星？我無留意呀，點會留意佢。
影完相之後，Cherry終於開始品嚐我份早餐。
佢好優雅咁用刀叉切開火腿同分開堆炒蛋再放入口，成個畫面都好靚。
我望佢食望得太入神，到回過神黎個陣佢已經食完，飲緊美星杯咖啡。
我：「點啊？好唔好食？」
Cherry：「唔..還可以喇，家姐杯咖啡就好好飲。
」 還可以咋？唉我仲諗住會好食到爆衫添。
算啦起碼佢無話難食，無留個壞印象比佢。
我dup低頭，望住個地板自言自語。
「不過，好多謝你吖，魯路修。」
唔？
我即刻將視線重新放番係佢身上，但佢並無望住我，只係好專心咁飲美星既咖啡。
Cherry：「好喇，我都應該要行嗱，媽咪叫我今日晏就陪佢地飲茶，我而家返去先。」
佢放低個咖啡杯，行過去門口個喼度，仲拎起左隻小埋毛公仔，完全係一個走既signal。
「呢幾個月，多謝你地既照顧。」
我好似尊佛咁棟左係度，咩都無做，咩都無講。
美星：「我車你去啦阿妹。」
Cherry：「咁我就恭敬不如從命啦。
」 「Bye Bye啦，魯路修。」
「嘭！」
佢兩個就咁離開左屋企，留低我自己一個係度。
我究竟係度做乜…
我頭先就好似中左卡莎碧雅大招咁，咩都做唔到，只可以眼白白睇住佢地走。
唉..我果然好無用..
佢兩個出左去之後，我一個人坐左係梳化。
我頭先點解咩都唔做…
呀！！！
我好似德國瘋小孩咁係屋企大叫，怨自己既無用。
嗌到喉嚨都痛我先停低，坐係間客房入面發呆。
果間兩個鐘前仲屬於佢既房。
呢間房仲有少少佢既氣味。
我打開電話，睇番佢既相。
呢一刻我先發現，我電話入面好少同佢既合照，大部分都係我偷拍佢。
我唔甘心，我摷銀包，拎番子琪係ball幫我地影既合照出黎。
唔拎由至可，一拎我就突然崩潰，無端端開始爆喊。
果然，我係唔想佢走。
但我想佢開心。
我知佢都想我開心，所以只要一日仲見到佢，我就會扮到毫不在乎，好似好接受到咁。
呢個亦係「最後的謊言」既其中一環。
就算晨哥叫我隨心所欲，但我去到呢個關頭我都係選擇左隱藏左自己既情感。
始終，我都唔想佢咁掛心，去到外國都仲有咁多牽掛嘛。
有時候，其他人既感受係重要過自己既情感。
尤其果個係你愛既人。
呢個時候，我聽到開門聲。
美星條友，車Cherry返去洗唔洗兩個鐘啊，肯定又唔知去左邊度行街。
我離開間客房，輕輕咁關上道門，走出街廳，迎接美星並準備鬧佢一餐。
但我完全比眼前既景象嚇親。
美星唔係一個人返黎，身後仲有兩個人。
晨哥仲有阿欣。
晨哥：「唷~魯路修，成個月無見喇我地。
」我：「點解晨哥你會黎我屋企…」
晨哥：「嘛..我被人拜託去拯救迷途既小羔羊，所以就黎左嗱。
」 啊…應該係講緊我。
我：「返去啦，呢度無人需要你救。」
晨哥：「咁不如你話我知，你甘心就咁係度完？」
「你甘心連一句再見都唔同佢講就俾佢走？」
「你唔想再見佢一次？再聽到佢叫你個名一次？再攬住佢一次？」
我：「我想吖！但我驚呀！我怕自己會忍唔住係佢面前喊呀！我唔想令佢傷住心咁走呀！
」 我忍唔住大聲喝晨哥。
晨哥：「所以你就連機都唔諗住送？」
呢句直頭插到入我心最深處。
因為我到呢一刻仲猶豫緊去唔去送機。
晨哥：「果然係咁，我就估到。」
晨哥：「白癡，你覺得你唔去送機，佢會更加好過？
」 晨哥：「去啦，我保證你去左唔會後悔，當我係兄弟既就信我。」
我：「不過..」
晨哥：「你到時候就唔會喊，我寫包單。」
「因為你總係會顧及其他人既感受，所以你一定唔會喊。」
「你唔去，佢一定會更加傷心同失望，可能五年後就唔會返黎搵你架啦~你諗你啦~
」 我一聽到咁即刻登大對眼。
晨哥：「唉我都唔想講咁多，要講既都講哂，你唔去既我只能話我睇錯人。
」 嘩你講到咁？我無得唔去啦咁。
講下笑啫，聽完佢講我就已經下左決心。
果然我係個死蠢，自以為好顧及人地感受，但又睇得唔夠徹底，總係忽略左唔少野。
我居然無諗到我唔去送機既話佢會點諗我，會對我有幾失望。
我要去送佢機，好好咁將所有仲想做一次既事盡量做埋佢。