佢走左喇。 

唔係返屋企果種走,而係,去左好遠地方果種走。 

啊,五年呀,我捱唔捱到呢? 

無左佢,我真係可以繼續生活? 

所有野都貌似回歸原點,我變返一個單身死毒撚。 





但都只係似,其實好多野都唔同左。 

我個心好似俾人挖去左一部分咁,成個人感覺都唔完整。 

失去左既部分,可能係佢帶走左掛。 

畢竟,佢要左我既世界嘛。 

美星車左晨哥同阿欣返去之後就同我直返屋企。 





啊,好羨慕佢兩個,可以咁樣成日係埋一齊。 

我開始係度傻笑,仲笑得好大聲。 

笑並唔係因為我開心,而係我已經再無眼淚可以流,頭先已經流哂。

而且再喊都無再辦法解決D乜,反而會令身邊既人擔心我。 

所以我只可以笑。 





美星:「喂你無野呀? 」 

我:「會有乜野啫我,開心咪笑囉我。」 

美星:「開心?有乜好開心?」 

我:「咁幾好吖,終於都結束啦,我又自由啦。」 

美星無再理我,繼續專心揸車,雖然都係揸到成架「凰呀」咁。 

好辛苦先返到屋企,我就咩都唔諗準備直接行入房。 

但係入房之前,我停低左一下。 

我望向間已經無人既客房。 





「哼。」 

我拋下一個單字,就行左入房。 

我將自己鎖係房入面,一個人攤係床上。 

啊~好攰呀,攰到標哂眼水添,都係訓陣先。 

我拉起被,一下就及過自己個頭,將自己收埋係被窩入面。 

只有咁,我先覺得安心。 

訓到咁上下,有人揭開左我張被。 





我有一刻,只係一刻,以為揭開既人會係Cherry。 

當然,咁只係幻想,現實邊會有咁夢幻。 

揭開被既人係美星。 

我:「咩事呀俾我靜下啦。」 

美星:「你有朋友黎搵你。」 

朋友?邊個? 

我急急腳行出廳,睇下係邊個搵我。 

係Ada,佢坐低左係餐檯前,身邊仲有一個紙箱。 





我:「你搵我..?」 

Ada:「嗯,受人所托。」

受人所托?邊個托佢? 


我原本已經好心煩,而家仲要加多咁多問號落我度,我真係想死。 

算啦我都係唔諗太多喇,再諗又唔知會死幾多腦細胞,直接問佢好過。 

我:「邊個委託你? 」 

Ada:「你女朋友啊,Cherry。」 





Cherry!? 

我聽到即時瞪大雙眼望住佢。 

我:「你幾時見過佢?」 

Ada:「兩日前,佢叫我今日黎搵你,呢箱野都係佢叫我交俾你既。」 

我隨即將視線放係佢身邊個箱度。 

Ada:「佢話你睇完呢箱野就會明架啦,咁我走先啦,學校見喇。」 

我:「唔該哂你,麻煩到你真係唔好意思。」 

我望住個箱講。 

Ada:「舉手之勞啫魯路修。」 

「不過...佢真係好鐘意你…我..比唔上。」 

eh… 

我唔敢望佢。 

「所以,唔好令我失望呀,我知你得架。 」 

「嘭!」 

美星:「佢走咗啦。」 

我:「嗯,我知道。」 

美星:「咁你想自己一個人拆,定係我同你一齊拆..?」 

我:「唔洗啦,我自己一個拆就得。」 

我知佢擔心緊我。 

我都擔心緊自己,我唔知自己開左呢箱野會有乜反應。 

嘛,擔心咁多都係無用,老子甚麼鬼都不怕!開黎見我! 

一打開個箱,發現有本簿,一個美國隊長既盾牌,仲有一個盒仔。 

呢D係咩黎…

美國隊長個盾同個盒都吸引唔到我既注意力,反而本好平凡既簿深深咁吸引住我。 


本簿就好似有魔性咁吸引住我。 

我伸出手,拎起本簿,好快咁揭左幾頁。 

頁頁都係字海。 

原來呢本係日記。 

我真係好想靜靜咁睇哂呢本日記,但好可惜,而家既我無辦法做到,我個心好亂,靜唔到。 

但我決定點都要睇一篇先,所以我揭到去最後一頁有字既黎睇。 

「魯路修。 

如果我無估錯既話,呢一頁應該係你睇既第一頁,我有無估錯?」 

只係第一句,我已經嚇左一下,佢咁都估到? 

「呢篇,係我最後寫既日記喇,雖然比起日記,呢篇更似係信。 

我估去到20/8,我會有好多野好想同你講,但我知道自己到時候一定咩都講唔到。 

所以我就寫左呢篇野,請Ada到時連埋兩份禮物一次過交比你,希望比你知道我既諗法。」 

禮物?果兩件野係比我既禮物? 

我繼續睇落去。 

「其實,我唔想走。可以的話,我想留係你身邊,陪你考DSE,升大學。」 

「但奈何我應承左我屋企人,無得反口,Daddy仲叫我呢五年唔可以搵你,當係一個考驗。」 

「而且我知道,若然我唔走,你一定會好內疚,覺得係因為自己拖累左我,影響左我既前途。」 

「所以我最後都係決定走,為左你可以好過D。」 

「不過,應承我,唔好因為咁而唔開心,唔好將所有野都攬哂上身,我唔想你咁。」 

「我應承你,五年後就會返黎接你,所以,等我。」 

「我好想同你講,我真係好需要你。」 

「P.S,箱入面果兩件係你呢兩年既生日禮物吖,原本想買哂五年既份量比你架,但一時之間我真係搵唔到咁多禮物比你。」 

「五年後,我一定會補番比你,所以等我。」 

「記住呀,魯路修,你同你既世界,都係我架。」 

嗯,我知道。 

我會等你,係呢個無妳既世界等你返黎。 

心情平靜得奇怪,無想喊既念頭,亦無開心既念頭。 

我要搵D野做。 

我打開箱入面個盒,發現入面裝住《Cyber Formula》 Asurada既車匙吊飾。 

啊,兩份禮物都係我鐘意既野。 

果然,佢太了解我。 

咁叫我點離開佢呢?叫我點過呢五年? 

我對住天花板長嘆一聲。 

「我要開開心心咁過呢五年,為左見到五年後既佢。」 

我唔敢dup低頭,怕眼淚會流。 

沒有妳的世界,不是我想要的世界。