【為左老友，我將佢女神變成我女友】: 【第二十四回：肥龍】

※※※※※※※※※※※※※※※※※※※※※※※※※※※※※※※※※
【第二十四回：肥龍】

「自從我成為肥龍個日開始，我就好鍾意蘇小玲。我好鍾意佢，鍾意到我決定要追求佢。點知你嗰日冇啦啦爆左佢個名出嚟，我心諗：今次乜鬼計劃都畀你搞衰哂。

如是者我嬲左好幾日。但我為免小玲佢亂諗野，就諗住趁佢入醫院既時候同佢解釋清楚，仲諗住藉機問下佢想唔想同我一齊。

點知，當我去到醫院既時候，我發現小玲同小美傾緊計。

小美道：『家姐，你唔係真係鍾意左陳英傑掛？』



小玲一臉甜絲絲咁回應：『唔得咩？佢讀書又叻，又識打網球喎。文武雙全既才子又有咩唔好先？』

小美又說：『才子？唔係卦？佢個日畀我拉去課室個陣鬼咁驚，仲以為我想食左佢咁。我就真係唔覺得佢有咩咁叻。』

小玲沒有爭辯，反而問：『吓？佢有冇嚇親呀？之後佢仲唔小心踩到我，可能佢會覺得好內疚。死喇，你話今次點算好呀？』」

我笑了一笑，笑着當時的情形。

肥龍繼續說：「當時既我係度諗，究竟我應唔應該去講清楚一切。但當我聽到佢仲咁關心你既時候，我先醒覺到愛情並唔係佔有，而係保護。老實講小玲根本唔鍾意我，就算我向佢表白，我既心意，我既愛，佢會領情咩？如果我真係鍾意佢，我係唔應該令佢難堪，反而應該令佢快樂。然而，其實只有你先可以令佢快樂。我知道，佢希望每朝起身掰開眼見到既第一個人唔係我，而係我眼前既陳英傑。」



「肥龍你……」我呆訥地看着眼前的肥龍，一位真漢子。

原來喜歡小玲的，並不單單只是我一個。

原來有心讓愛的，亦不只有我一個。

原來為小玲默默付出的那個，並不是我。

只懂得擁有對方的愛情，原來是多麼的幼稚。



「咁所以你就向小玲講左所謂『善意既謊言』？」

肥龍點點頭，作個微笑，輕鬆道：「冇錯，我話畀佢知話其實係你對佢有意思。

我當時咁講：『英傑個死仔應該係怕醜兼內疚先唔嚟既啫。不過我都欠你一句對唔住。』

小玲問：『怕醜？對唔住？』

我答：『我都係近排先知原來英傑佢鍾意你。』

小玲臉泛羞紅，雙眼不敢碰上我的視線。

我續道：『當時我又唔知佢鍾意你，所以咪千方百計逼佢講佢鍾意邊個囉。咁啱佢又見唔到你係邊，而又被我啲亂估亂噏激到沉唔住道氣咪自爆囉，哈哈。』



小玲恍然大悟道：『唔怪之得啦。我本來就係約佢嚟想問佢係咪鍾意我添。最衰係我個日食得飽得濟，再食個包嗰陣有少少啃親先暈左問唔到佢。』」

相隔多月之後，我終於明白了她當日昏倒的原因。

「就係咁？」我問肥龍。

肥龍搖頭，説：「當時我係度諗，究竟點先可以令你同佢一齊，諗左陣，我諗到一個方法。

我同小玲講：『其實英傑真係好鍾意你㗎，不過，佢份人成日擔心好多野，所以如果你貿貿然話同佢一齊呢，佢可能會變左拒絕你。』

小玲被我嚇唬，雙眼開始沾濕，眼角冒出了淚光，答説：『吓！咁我應該點好呀？』

『唔使驚，我有計。』

小玲破涕為笑，說：『快啲講啦！』



我回覆她道：『你一定要爭取主導權，唔好畀佢有咁多野講，咁佢自然就會乖乖就範。』

小玲一想不錯，但仍問：『咁樣會唔會好似逼佢咁？』

我心諗：我就係要逼佢同你係咪一齊嘛。

但當然呢樣野係唔可以畀小玲知道啦。

所以我話：『信我啦，一定無野嘅。我同佢咁熟都話冇事，咁又點會有事呢？』

之後佢就向你示愛啦，不過我都係怕你之後會有啲咩脫身之計，所以就先行一招苦肉計。」

「唔怪之得我當時想拒絕都拒絕唔到啦，原來係你係度攪鬼！」我罵道。



肥龍露出滿意的笑容，説：「全靠我好了解你，好了解我自己。」

我一臉不解地看着肥龍。

「我其實唔係肥龍，我真正既身份叫陳英傑。」

我糊塗了。

倘若肥龍的真正身份是我，那麼我是誰？而我又怎麼會有我的記憶呢？假如我也是陳英傑那麼又怎可能有另一個陳英傑同時出現呢？

世界被烏雲蓋上了一道陰影。

「你係陳英傑？咁我同你……」

「都係陳英傑。」肥龍不緩不急地説。



「吓？」我彷彿墮進了重重迷霧。

「呢個，係另一個故事。」肥龍黯然神傷。