結婚前，回顧我的前半生: 前篇
大約三十年前，有一個細路，
人人都叫佢做問題少年， 佢天生好鐘意問野…乜都問…
起初，細路只會問屋企人一大堆問題，
『點解個月亮追住我？』
『點解我地有手指甲？』
阿爸阿媽都覺得個個細路都係咁，
於是每次都會答細路，即使係亂咁答。
直至一日，細路既媽媽被驗出有絕症，
細路知道，媽媽就快離開佢，
於是問爸爸，『點解媽媽會病架？』
起初爸爸無答佢，再三追問下，
爸爸情緒被刺激，呢次係佢第一次打細路。
可憐既細路自此唔敢再問爸爸問題。
無耐，媽媽離開左。
又無幾耐，細路既爸爸將細路交比麻麻之後，就走左。
起初細路都會問麻麻問題， 『麻麻點解你唔行路既？』
但麻麻只可以訓係床上面，唔會答細路問題，
而細路於是轉向送佢返學放學既姨姨問問題。
但姨姨只會睇書做自己野，亦唔會答。
於是細路就係學校問問題，問同學…問老師…問到個個都驚。
而自從一次細路上常識堂問老師
『點解人要屙殊殊？』
老師就叫佢『問題少年』，同學開始大笑。
自此，因為呢個名，無人再同佢玩，
細路就唯有每日問自己問題…
『點解爸爸媽媽要走？點解無人同我玩？』
呢個係一個幾年前有少少自閉…自稱"IQ題的專家"既毒撚，平凡不過既童年。
無幾耐，細路就上左中學，變成少年，
佢亦開始無咁多野問。
因為轉左學校，經歷多左，性格亦變左。
佢對自己既命運唔再咁多『點解』， 而係面對同接受。
老豆走前擺低既錢唔多，根本唔夠佢同阿麻生活。
於是中二開始，呢個少年就做ｐｔ。
每日放學就去送外賣，一做就１２點先放工。
有假期就訓，亦因為咁，少年依然好少朋友，
雖然佢無講出來，但心底入面， 佢對自己既際遇好不滿。
『點解人人有阿爸阿媽？我有阿爸等於無。』
『點解人地放學打機唱ｋ，我就要做苦力？』
不過呢ｄ心入面既不滿，反而係佢努力向上既原動力。
佢成績無因為part time而好差，反而因為佢比心機讀書， 而有唔錯既成績…
不過直至一次，佢一生人都改變左。
因為少年既努力，有一次佢得到一個機會，
代表學校出席一個辯論比賽。
個次，比賽變成其次，
少年遇上一個少女，
唔知邊度來既勇氣，
少年主動問少女電話，
佢地開始傾電話…慢慢變成情侶…當時…佢係我唯一既朋友…唯一既知己。
雖然少年因為返part time、返學，好少有時間陪少女，
但少女亦體諒佢，無咩不滿。
終於，佢地升上中四，雖然唔同校，
佢地許下諾言，一定要比心機考好會考。
當時既專家，唯一既朋友就係呢個女仔，佢好想有能力照顧佢。
所以，少年同自己講『我要努力，改變自己既命運！』
因為咁，少年一放假就會努力咁溫書，
而同少女相處既時間，亦都越來越少。
雖然係咁，但少年相信，
只要自己考好個試，有好既前途， 一切都係值得既！
但佢唔知道，其實少女個心一早變左，
有一日，當少年懷住興奮既心情，
迎接佢同少女一個月一次既約會，
少女帶住一個外表成熟、完美到令少年心底打次震既男仔出來，
只係講一句：『我地完喇，我想有人陪，但你做唔到。』
而個男仔就話：『唔該你以後唔好煩住我女朋友。』
兩個人拂袖而去。
少年崩潰…佢由以為好快獲得一切，有生存目標咁生活，變成一無所有…
無父母、無朋友、無知己、無人需要自己。
望住周圍既同學一堆堆、一對對，出外有朋友，番屋企有屋企人。
睇番自己，佢問…『點解？點解？點解？』
個一刻，佢真係想死。
之不過，少年唔想就咁就死，亦唔敢去死。
佢只係用工作麻醉自己。
雖然做part time既地方忙到令人透唔到氣，
但反而令少年得到喘息既機會。
而且同事同老闆都算好人，
呢段時間，對少年來講，呢間餐廳係佢第二個家，甚至係唯一既家。
無幾耐，中五會考完，少年因為掛住搵錢，加上生存無目標，成績平平。
於是佢聽餐廳老闆既勸告，去左做全職，無再讀書。
每日返十二個鐘頭工，返到屋企照顧麻麻，
少年已經無時間再理會自己既命運，
生存先係最重要。
至此，少年既生活，每日就係一早起身返工＞忙＞放工＞照顧阿麻＞訓。
放假就訓教或者加班，
佢有好一段時間，無思考自己既價值，無再問任何問題。
但好境不常，到左少年１９歲，餐廳終於因為加租結業。
而一向好人既老闆，竟然為左逃避債務，一走了之。
少年一時間不知所惜，短短一個月，係搵工既同時，
又受到雙重打擊，長期臥病在床既麻麻終於去世。
少年用２年來儲既錢，幫佢唯一既親人辦好身後事。
當時我根本乜都唔識，阿爸都搵唔到…好彩都算搞掂。
安穩既生活被打亂，少年又再一次一無所有。
無錢、無朋友、無家人，只有一個人問…『點解？』
過左幾個月，當時我剩低既錢就快用曬，唯一既工作技能…就係做待應，
但飲食業…係當年最受衝擊既行業，我根本搵唔到工。
少年問始困惑…經濟差…中五畢業…無經驗… 轉行又轉唔到…
自己到底可以做乜？
於是，有一段長時間，無朋友，無人際網絡，無自信既佢，
每日就四圍奔波搵工，但每次唔係因為學歷唔夠而打退堂鼓，
就係因為比人請食閉門羮…
最後我硬下頭皮，做左一份至今仍記憶猶新既工…
洗廁所…
(有巴打話…20歲仔點會去洗廁所…我話你聽…當年我見左3份洗廁所先有人請…有得簡…唔係走投無路…我點會做？)
不過…洗廁所都有好處，就係當你急個陣…好快可以解決，
同埋我會掛個《清潔中》既牌係其中一格，留個私人空間比自己。
但除此之外，我每日既生活都好似地獄一般…
每日見到無數既人入來"釋放"…仲要受人白眼…
更唔好講洗廁所有幾核突…幾難頂…
而事實上，由第一日返工，已經有唔少同事講，
"十幾歲仔來洗廁所，唔係下話…"
但佢地唔明少年因為種種因素，
根本只係迫於無奈…
為生存，為生活，少年知道呢度只係一個踏腳石…
所以無得計較，只有默默咁承受。
某日放假…我罕有咁走出街，(當年我完完全全係一個毒撚…試過大約半年除左返工就唔出街)
個日我食左個魚蛋河，飲左杯荳漿…
一路行一路行，慢慢發覺自己已經脫節…
以前雖然放學就返工，
但總算從同學同事口中聽到好多野，
但依家竟然連自己屋企附近有個新起既商場…我都唔知…
不過呢個時候，更令我唔開心既事發生
佢竟然撞到當日離他而去既少女…
被問到既第一句就係…『咦！咁岩既？你近排幾好丫麻…』
我更加顯得慚愧…無地自容…洗廁所喎…點同人講…
當時…我講左一個大話：『我依家仲讀緊書呀…』
少女：『係呀？我依家做緊ｓａｌｅｓ呀…』
交談中我知道佢同當年既男仔分開左…
而當少女留低電話叫專家得閒搵佢個陣
專家決定做一件事…就係搵過一份工！
(當時既我…最怕就係著住制服…洗完廁所行出來…見到佢就仆街…)
之不過…中五畢業…無經驗…會考只有幾分，
要搵一份工又談何容易？
有好一段時間，少年因為未搵到工，又怕比少女知道佢做緊既工作，
而唔敢搵少女…不過，皇天不負有心人，
少年終於搵到一份比較好既工…一份傳銷既工作…
呢份工係一個５年無見既中學同學介紹既，
當呢位同學打來個陣，少年甚至講唔出佢個名，
不過少年諗，既然有工，又何樂而不為？
於是就去左間公司，戰戰競競咁見工！
一去到間公司，少年就比個種氣派嚇到…
公司每個人都好忙咁打電話…每個人都西裝筆挺，
仲未回到神，Ｈｅｎｒｙ（中學同學）來到，
『喂，好耐無見呀，過來丫！』
就開始向少年講公司既運作、規模等等…
不過最吸引少年既，恐怕係Ｈｅｎｒｙ既存摺…
少年簡直唔敢相信…同佢一樣只係中五畢業既Ｈｅｎｒｙ
存摺竟然有７個零既存款！
Ｈｅｎｒｙ既一句：『我得…你都得既！』
令少年覺得人生終於出現一絲希望！
當時，少年無多作考慮…就交左培訓所需要既錢，(依家諗番真係on99)
亦依照Ｈｅｎｒｙ所講買左兩套西裝，
開始跟Ｈｅｎｒｙ做野，
所謂做野，其實就係要幫公司搵客人買貨，
只要搵到，就會有公司分既佣金。
但無奈少年無朋好無親人，
所以一開始既工作，只係靠打電話同ｈｅｎｒｙ既介紹。
無耐，少年開始心急，
因為佢想快ｄ有足夠既收入，咁先有面目見佢既少女…
於是Ｈｅｎｒｙ同佢講
『你咁唔係辦法喎…不如你交多６００００蚊，等你佣金多５０％啦。』
少年無計可施，唯有同財務公司借呢筆錢， 盡地一鋪！
不過，雖然交左呢筆錢，但專家既收入根本無變，
每個月只係靠ｈｅｎｒｙ既介紹…得幾千蚊…
無耐…ｈｅｎｒｙ同佢講，公司要減省人手…
於是業績低下既少年…就咁比人炒左…
本來一份工無咩大不了，
但因為問左財務公司借錢…
計埋利息少年要還１３萬…
當時我無辦法…無計可施…唯有向少女坦白求救
少女知道之後，並無即刻表示ｄ咩…
只係冷淡咁講左一句…『你比少少時間我諗下…』
而事實上我亦唔想少女幫佢還…只係想講一聲…
不過我當時比人迫入死角…初初只係有d西裝友上門叫還錢
後尾噴紅油…日日上門拍門…塞鎖匙洞…乜都齊…
個陣既我…每日都怕比人上門收數…係屋企都要扮無人…
少年再一次諗…唔通真係要死先解決到？
就係咁…過左差唔多一個禮拜…
我就收到少女既電話…
少女話：『ｄ錢我入左比你架喇…其餘個ｄ你自己諗啦…不過你要還架…雖然個ｄ只係我既姑婆本…都唔係急住用…不過你好正正經經搵份工喇…』
收線之後…我喊左好耐…因為我知道錢既問題雖然解決左…
但自己作為男人既尊嚴已經蕩然無存…
亦唔會諗少女同佢有咩發展…
於是，我又再一次一無所有…
我還清左ｄ錢…又要重新出發，
一方面我吸收過教訓，唔會再諗賺快錢…
但另一方面…佢想快ｄ還清ｄ錢比少女…
於是今次我腳踏實地，搵左兩份工，
一份係老本行…做待應…
另外我考左個保安牌(其實只係去上幾個鐘堂)…夜晚就去做看更…
就係咁，當時既我過住每日做２０個鐘，食兩餐既生活，
好彩既係做看更可以訓下…唔算太辛苦
而且，兩份工加埋，每個月我都有萬幾蚊剩
一個月可以還到一萬蚊比個女仔…
其實計落，只要１年，我就可以重新做人！
１２個月後又一條好漢，於是當時我頂硬上！
日食兩餐(當年漢堡包無記錯仲係5蚊定6蚊，腸粉就5蚊7條)，返工返工返工
話咁快…我就過左９個月呢種生活…就快22歲生日
因為新年有花紅…所以我提早左儲好筆錢…
個陣我唔怕瘀…硬起頭皮約少女出來還錢比佢…(其實我心入面仲好掛住佢)
其實其間我地都有見面，但都只係一兩次…氣氛都係奇奇怪怪
今次再見，少女又再成熟左，(又靚左…對比之下…我真係好毒)
當我將錢交比少女個陣，
少女就話：『算你啦…我遲ｄ要去外國讀書喇…阿爸唔比我再做ｓａｌｅｓ喇…』
(其實佢屋企好似幾有錢…只係經濟差左先做sales…後來聽佢講屋企做番生意…又有番錢)
我無留佢，我好想留…但我知道根本無咁既能力…根本留唔住佢…
無幾耐…佢就走左，無留低任何聯絡辦法…我唔知佢係嬲左我定點…
就係咁…十二個月…我完成一個目標(還錢)，但我又一次失去目標…
我辭左夜晚份工， 又開始過番一直以來無人生目標既生活。
就係咁，我變成一個２２歲既後生仔，
係餐廳老闆眼中，我有經驗，唔會遲到早退，不失為一個好員工，
係同事眼中我實幹，可以做埋自己個份，不失為一個好同事，
但係我自己眼中，自己只係一個無未來、無理想、無六親既侍應仔。
不過我根本無能力去改變呢一切，
一來自己無積蓄，二來經歷咁多野…我唔再問點解，開始認命。
直到有一日，我放假經過一間書店，
隨手拎起一本寓言書睇，
估唔到再次激發我向上既動力！
我一打開本寓言書，見到一個叫『蒼蠅與蜂蜜』既故事，
內容大約係一班蒼蠅掛住食蜂蜜，無留意比蜂蜜痴住，最後死曬。
雖然個故事只係一個小小既寓言。
但故事令當時既我諗到…
自己都曾經因為太安於現狀而失敗…
如果又比人炒點算呢？
如果自己六十歲係咪仲負擔到侍應呢種工作呢？
我係咪真係甘心一世做一個無出息既人呢？
呢d問題又一次令我萌生另覓出路既念頭。
於是，我開始考慮自己係咪應該重拾書包…讀番書
畢竟我都不過二十幾歲…
於是，我開始搜集資料，睇下有咩可以裝備自己。
當然，係心入面，我亦想重頭來過， 令少女返來會對佢另眼相看。
事實上…係我做野個幾年…
因為同同事年齡既差距同性格關系，
仍然識唔到一個朋友，
我依然一個人住，無野做就上網…
當時我覺得自己對電腦…都有ｄ天份，
於是我終於搵到一個目標。
就係專業學院既電腦文憑。
好彩既係，以我會考既成績岩岩好可以報讀，
而且又有資助，雖然少d…
但為左改變自己既人生，
我決定重新上路。
當時我報既文憑係關於電腦ｓｅｒｖｅｒ既野
雖然我有用開電腦…
不過就完全無ｓｅｒｖｅｒ方面既知識，
所以起初讀都有ｄ吃力…
加上我唔想比公司既同事…知道我公餘去讀書，
廢事比人知我有離心，
所以有好多堂都唔上而去返工，
不過我每日返到屋企一定會溫習，
所以慢慢都有ｄ成績。
如是者，我又捱多一年。
一年制既課程讀完…我決定再讀埋高級文憑，
其間，我辭左餐廳既工…搵到一份ｐｔ既文員…
呢個時候，另一個改變我生命既人出現…
係個段時間，我一直都係自食其力。（事實上我想靠人都唔得靠…）
住係阿爸留落來既３００呎單位…(公屋，偏遠，廢單位，不過都唔好比教父見到)
每日唔係茶記就ｍ記，
日子真係有ｄ枯燥…
好彩既係雖然搵既錢唔多，
但唔洗交租供樓…只係水電煤等等，生活總算穩定…
不過試問有幾多人二十幾歲人一個朋友都無，
主要原因係公司同事多數認為後生仔悶…唔岩傾…太細…
而同學同自己年齡又差太多，多數２０歲未夠…
後生仔根本無途徑識到朋友…
不過有一日，亦係我２４歲個日，
公司來左一個新女同事，同佢一樣係ｐｔ…
佢個名我唔方便講…姑且叫做Ｗｅｎｄｙ…
佢既出現，同樣令我既人生有所改變。
起初，我只係當Ｗｅｎｄｙ係一個同事，
但因為負責教佢做野，而且我寂寞得太耐，(真係好毒…)
慢慢對Ｗｅｎｄｙ有感情…
雖然Ｗｅｎｄｙ樣唔算靚，但絕對係一個好女仔。
事實上我地因為一樣係ｐｔ…返工時間差唔多…
所以成日一齊食飯…放工亦會一齊搭車…慢慢開始傾電話。
言談間我知道左Ｗｅｎｄｙ係個讀旅遊既副學士學生…
而有一次我鼓起勇氣…約Ｗｅｎｄｙ出街…佢亦應承左！
個次係我自從中四之後…第一次約女仔出街！
當時我認為…我既黑暗時代終於結束。
無阿爸阿媽無親人無朋友唔緊要，
呢個世界上，了解自己既人一個就夠！
當然…依家睇番…真係好傻。
第一次約會…我一早計劃好曬…
首先去睇戲…跟住去西餐廳食飯，
然後再去新開無耐既迪迪尼…出面個迪欣湖睇煙花！(無錢係咁上下…)
我連禮物都買埋，係一條水晶鏈…
雖然對一個月搵四千蚊既我來講， 係幾大既負擔。
不過第一次約會，我唔想失禮…
終於到左約定既日子，我特登早左半個鐘…
於是等呀等…等左九個字， Wendy終於出現。
咦…咪住…做乜多左個人…
『唔好意思呀…我今日遲到…呀呢個我朋友…呀ｃａｔ』
我見到一個女仔同Ｗｅｎｄｙ一齊
即刻心底一沉…點解會多左個人架呢…咁我個計劃…
今次慘喇
『不過你放心啦…我岩岩同佢買完野…佢走架喇…』
阿ｃａｔ就話『係呀，你地玩得開心ｄ呀！』
我即時精神為之一振！ 準備今日既安排！
等阿ｃａｔ走左
我就即刻將鏈拎出來…送比Ｗｅｎｄｙ
『拿…送比你架…』
『咩來架？』Ｗｅｎｄｙ一打開…就話『哇…洗乜咁破費呀！』
我就話…『第一次同你去街丫麻…』
就係咁，事隔多年我第一次同女仔去街。
之後我地就去睇一套有關命運既戲…
睇完套戲，我覺得自己既命運一定可以改變…一定要成功追到Ｗｅｎｄｙ！
於是我地就去食飯…
埋單個陣要成５００蚊…
Ｗｅｎｄｙ就話『乜咁貴架！』
其實我都覺得貴，比錢個陣仲手震震…不過就話『唔緊要啦…哈哈…』
食完飯， Ｗｅｎｄｙ就話『我要走喇，太夜呀爸會罵…』
我唯有送佢返屋企…到佢樓下…
佢又話『送到呢度得喇…比阿爸見到會罵架…ｓｏｒｒｙ呀』
咁我就諗住走啦…點知Ｗｅｎｄｙ從後拍一拍後生仔…
仲錫左我面珠一啖…就走左…
我知道…我既黃金歲月來喇！
個晚返屋企…我搭巴士個陣，嘴角都仲甜笑緊。
自此，雖然我同Ｗｅｎｄｙ無表明…
不過我地已經默認成為一對…
返工個陣一齊不特止，
一有時間唔洗返學，我就會同佢去街…
同佢拖住手個種感覺，簡直令人甜到入心再由心度甜番出來！
當時我認定Wendy會係自己一生入面既最愛，
自細無阿爸阿媽，一直為其它人付出既我，
個陣發現自己原來好需要被愛既感覺，
只係一直收埋…唔表現出來，寧願被生活麻醉
而同Ｗｅｎｄｙ一齊，我就好似解凍咁，（久旱逢甘雨？）
所以我將一切都寄託係佢身上，
我開始更加努力咁讀書，
為既係同佢第日有更好既生活！
不過過左三個月，當我習慣呢種兩個人互相依賴既平淡生活之後，
當日既對我有恩少女竟然讀完書(?)番左來…
個日係一個平靜既朝早…我岩岩起身，
準備同Ｗｅｎｄｙ出街…
就有一個我覺得把聲好熟…但又差d唔記得係邊個既人…打電話過來…
『喂，知唔知我係邊個呀…』熟悉既聲音傳入既耳朵…一聽我就知係邊個…
『知…點解你會打比我既？』
『我番左來喇…你今日得唔得閒呀？』
『…得…得閒。』
『咁一陣１１點係我樓下等啦。』
個陣…我都唔知自己點解會答佢得閒…不過最後我同Ｗｅｎｄｙ講我唔舒服…唔出得去…
就去左少女既樓下…（其實佢叫阿希…英文名叫阿kay…呢個講名唔緊要…）
我一見到佢…個心就好似中左箭咁…
比起以前…佢又靚左喇…始終男人都係犯賤。
當時我見到佢…個心真係好亂
因為當日如果唔係佢幫過我…我可能一早被人斬死左/自殺死左…
而且阿希又確實係我一直追逐既目標…
個日見番佢，老實講…我覺得自己仲係鐘意佢…
佢仲要一開口就話『咦你型左喎！』
當時我只係笑一笑…話『你都係丫…』
然後好似情侶咁比佢打左一下…跟住就一齊行去食野…
言談間我知道原來佢讀唔成書…就返左來…
仲已經一段時間，依家係佢老豆間公司做野…
對比我…唉…我依然襯佢唔起…
個日我同佢講左好多野，好似重拾番以前既感覺…
不過咁…話曬都係專家，我都好清醒既…我知道自己已經有Ｗｅｎｄｙ…
唔能夠太多心，而且阿希根本唔會，亦唔需要再鐘意我…
個日之後…我同Ｗｅｎｄｙ感情無變…
直至１個月之後…
終於，我畢業喇…而且當時經濟好好，
我好快就搵到一份工…係一間私營機構做ｓｅｒｖｅｒ…(即係乞食it)
但我敢講到咁大個仔…個段時間…係我當時自出娘胎最開心既日子…
有一個好女友…有一個好朋友…有一份可觀既工作…
不過其實個陣我都仲有一件事擔心…
我成日係Ｗｅｎｄｙ口中聽到佢阿爸好惡又點又點…
都有ｄ擔心第時見家長……
而且因為我個陣份工要輪班…而且個年對Ｗｅｎｄｙ既學業來講係好重要既一年…
所以我唔似以前咁…可以成日見ｗｅｎｄｙ…
雖然我有ｄ唔開心…不過亦因此更加珍惜同佢相處既時間。
無耐有一晚… 一件我估唔到既事發生左
有一晚…我好夜放工…１點幾返到屋企…
去到門口竟然見到阿希係度…
佢一見到我就話…『咁遲架…』
當時我好驚…但又幾開心…『你點解係度既…？』
佢叫『入去先講啦…好唔好？』
個陣我懷疑自己發緊夢。
於是我同佢就入左屋…
佢就話『我同阿爸嘈交…唔返去呀…！』
“我當時心諗…點解個個女仔都會同阿爸唔岩架呢？”
我就話：『哦…咁你無朋友架咩…做乜來呢度呀…？』
『咁你當唔當我朋友丫！』
於是我就話…『係…咁你自便啦…我沖涼先…』
沖緊涼個陣…我個心真係好亂…
首先我無同阿希講過自己有女朋友…
而且半夜以前個女朋友上自己屋企…真係好易出事…
於是我決定唔理佢…沖完涼就訓！
沖完涼…我見到阿希係度食杯麵…
於是就無理佢…我話…『拿我訓喇…你聽日走之前話我知啦…』
佢就無咩表示…於是我就入房…閂埋門。
但老實講…我根本訓唔著…
雖然我訓唔著…不過我依然無理阿希…
一來我唔夠膽…二來我唔會令Ｗｅｎｄｙ唔開心
所以我狠下心腸！鎖門！
我知道個晚阿希有拍過門…
不過我無理…跟住阿希就去左我阿麻以前度訓…
而我不知不覺亦訓著左…
依家諗番…雖然有d後悔…但我真心覺得自己做得岩！
個日之後，阿希好耐都無再搵專家
反而Ｗｅｎｄｙ原來安排左好多節目
我當時醒覺…我愛既只係Ｗｅｎｄｙ…而阿希只係一個接觸唔到既夢幻…
我亦接受唔到自己同時鐘意兩個人
所以第二日…我就決定就打比阿希，同佢講清楚
不過…我第二日打比阿希…
佢已經無聽後生仔電話…
我諗，佢個日已經知道Ｗｅｎｄｙ既存在
可能佢嬲我個晚無理佢
亦可能佢唔再需要我…
我個刻唔知道…我只知道我可能永遠見唔到佢
雖然因為Ｗｅｎｄｙ，我無左個朋友…
不過我無後悔…
而我同Ｗｅｎｄｙ感情越來越好
個次之後兩個月…Ｗｅｎｄｙ就同我講…
『下個禮拜你得唔得閒呀…不如來我屋企食飯丫』
我：『…你老豆知我地一齊喇咩』
『知喇…上次講比佢聽都無事…咁你下個禮拜放假個日來架喇』
…就係咁我又踏入人生另一個階段…我憧憬我會有新既屋企人
有新既目標…就係同Ｗｅｎｄｙ儲錢結婚…
但現實總係殘酷既。
話咁快到左見家長個日…
我特登拎番幾年前做傳銷個陣套西裝（我平時份工唔洗西裝）
執到靚一靚先去…
仲買左個成千蚊既果籃！
我當時諗，第一次見面，一定要比個好印象未來岳父岳母…
於是我去到佢屋企…
『Ａｕｎｔ Ｕｎｃｌｅ～』
『入來坐丫』"未來岳母"歡迎我，比較親切
而Ｕｎｃｌｅ就無出聲…一直坐係度…只係望一望後生仔…就繼續睇報紙…
ｗｅｎｄｙ就拉住後生仔去岳父度…
Ｗ：『阿爸呢個係阿力呀…』
我：『阿爸你好』
但佢依然無理後生仔…
我見勢色唔對，就雙手奉上個生果籃…『呢個特登買比你地架…』
佢終於出聲：『哇咁大手筆…好貴咁喎』
我：『唔會…』
佢：『咁咪用左你半個月糧？』
我：『……………』
Ｗｅｎｄｙ：『阿爸講笑架咋…好啦食飯喇…』
於是我地就食飯…點知食飯個陣情況仲差…
食食下飯，本來都係"岳母大人"問一句，我就答一句…
點知食食下…"岳父"（其實唔太想咁叫佢…下面姑且叫佢禿頭佬）就開始來料…
禿頭佬：『阿力你做電腦架可？』
我：『係呀…』
禿頭佬：『咁你阿爸呢？』
我：『我…我阿爸一早死左喇…』 （廢事解釋）
禿頭佬：『哦咁你阿媽呢？』
我：『…佢同阿爸一齊去架…』 （廢事解釋x2）
禿頭佬：『哦…你一個月搵幾錢呀？』
我：『……』
Ｗｅｎｄｙ：『阿爸你依家查人家宅咩！』
伯母：『係囉你問咁多做咩丫…食飯啦』
禿頭佬：『咁唔問下點知第日養唔養得起後生仔個女呀！』
我：『世伯你放心啦…我會盡力照顧阿儀既…』
禿頭佬：『有ｄ野唔係話你有心就得既…要有力…最緊要有錢！』
我：『……』
由個陣開始呢餐飯變得毫無意義…
我又再一次感受到『高攀唔起』個種感覺
（Ｗｅｎｄｙ老豆有幾架的士…對當時既我來講，算幾有錢）
聽到一句咁尖酸刻薄既說話之後
我無再出聲…
『見家長』亦係一個唔多好既氣氛下完左…
個次之後一個禮拜…
我無論食飯番工寫ＰＧ去廁所
都諗緊自己係咪真係未來岳父口中講得咁無用
我知道Ｗｅｎｄｙ屋企算係小康
而且又係獨生女…
人地老豆緊張都正常…
而我無用又唔怪得邊個…
不過個陣真係無計可施…
一個月搵唔夠１００００蚊…
而且外型唔討好…
又無咩家底（其實係連家都無）
到底有咩方法可以令呢個禿頭佬心服口服
將隻雞脾…丫唔係…將個女交比自己呢？
我真係諗唔到…
不過我更諗唔到過左一個月…
未來岳父竟然有個唔係人人接受到既要求…
就係咁，過左一個月多ｄ…
當我慢慢唔記得見家長時，禿頭佬既說話之後…
有一日Ｗｅｎｄｙ打比我…
Ｗ：『喂…你下個禮拜邊日放假呀？』
我：『做咩呀？你想去邊？』
Ｗ：『無呀…我老豆叫你去食飯呀…』
我十萬個不願意：『………下』
Ｗ：『佢話有野要同你講呀…』
就係咁…過左一個月多ｄ…
我又去左佢屋企食飯…
今次我只係買左盒金莎…廢事錢又用左，仲要比佢老豆單打
一去到…禿頭佬就話…
『阿力你跟我入來丫…』
跟住我就同禿頭佬就入左房…
個陣我心諗…唔係叫我分手下話…
點知，禿頭佬第一句就話…
『你…阿爸阿媽過左身喇可…？』
我聽到呢句…面色一沉… 唔知呢個禿鷹怪又想點…
我唯有話：『係丫…』
禿頭佬：『其實呢…今次叫你來係想商量ｄ野既』
我：『係咩事呢？』（心諗：都唔方好野）
禿頭佬：『你知啦…我地就得阿儀一粒女…咁…………』
我：『…下？』（佢好似有口難言咁）
禿頭佬：『其實我同我老婆一直都想追個仔既…不過…』
我：『……？』
禿頭佬：『你知啦…我地都想繼後添燈…有自己姓既孫仔架麻…咁…』
我：『……咁即係…？』
禿頭佬：『你想我交個女比你都得…不過你第日要入贅來我地屋企…』
我：『…下』（當時我個心真係嚇一嚇…我估唔到依家仲有人咁保守)
禿頭佬：『其實你地ｄ後生依家都好開放架啦…而且你父母都唔係度…唔會有人反對…咁啦你諗下啦…出去食飯喇…』（個次係佢對我態度最好既一次！）
我：『……好』
個晚食飯…我只係講左幾句野…
『係…』『唔係…』『唔該…』『拜拜…』
就係咁，我就走左。
個晚我諗左好耐，
雖然我唔太介意咩入贅，反正我無屋企人，
但心情真係好複雜…始終我都係個男人。
個次之後…我真係好唔開心…
我為左Ｗｅｎｄｙ…
無左一個曾經幫過佢好多…
後生仔一生中最好亦係唯一既朋友 - 阿希
但換來既竟然係又一次不幸…又一次出賣男人既尊嚴！
個晚，我同Ｗｅｎｄｙ講呢件事之後…
Ｗｅｎｄｙ竟然無咩表示…
只係話：『你自己決定啦…我都改變唔到我阿爸既決定…』
而事實上…係我眼中"無咩表示"亦代表Ｗｅｎｄｙ都唔反對我入贄
原因好簡單…Ｗｅｎｄｙ真係好怕佢阿爸…
而係顧及尊嚴既同時
我又唔想傷害到Ｗｅｎｄｙ
所以我諗左一個方法 — 就係拖！
我無再主動提呢件事…亦無再去Ｗｅｎｄｙ屋企…
我當時覺得…唔結婚都無乜大不了…
況且Ｗｅｎｄｙ仲讀緊書…
我希望係拖既呢段時間…
盡量爭取表現…
而時機似乎就快到…
當時，我既上司將會唔做…而最有可能升上呢個位既…
就係我！
於是…我當時非常努力！！！
雖然其實我份工無咩做…(只要無意外發生)
只係update下個Database…打下報表…有港女同事整壞機我又去睇下咁(即係it雜工)
不過個段時間…
即使係個server有少少事，
我都即刻仆去搞掂佢！
為既只係唔好再比人睇死…
『我努力左咁多年…做過咁多野…有乜理由今日仲要抬唔起頭做人！？』
而同事都睇得出我對呢個位係志在必得…
仲講笑咁講話…第日我升左…要關照下佢地
終於…到左我上司走之前一個禮拜…
出左通告揭曉邊個係下一任Ｓｕｐｅｒｖｉｓｏｒ…
答案係全部門最靚女既Ｃａｔｈｙ…
係個陣…我真係唔太開心…
因為我估唔到自己做既一切都係白廢…
雖然Ｃａｔｈｙ成日遲到…做野又推三推四…
不過佢同上面關系好… 真係無辦法…
而我亦無計可施…
唯有繼續做低級員工…
每日返工…有野做就做…
無野做就上下網(上下高登)
而同Ｗｅｎｄｙ既關系亦慢慢開始淡化…
Ｗｅｎｄｙ因為要返學返工…
而且又有自己既朋友、同學…
會同佢地出去玩
同我一個月最多見得２，３次…
而我又再一次變得孤獨…
返工放工上網訓教日日如是…
有少少有女朋友等於無既感覺
佢成日同朋友出去，但我又無朋友…真係幾難受
有好幾次…我又諗起以前既事…
自己係床上面喊…
依家諗番…真係好幼稚…
但有時我地雖然知道自己唔係最慘…
非洲大把人慘過我地，
我地都會將自己既痛苦放大。
人…始終有軟弱既時候。
然後有一日…
我聽到ｄ同事討論得加火如荼…
原來佢地討論緊股票！
話時話…我以前一直覺得股票係高不可攀…
覺得自己生成咁既命，只係可以腳踏實地…
不過聽到班同事討論得咁高興…
更加有個同事話自己一個月賺到５、６萬！
我就忍唔住…過去問左句…
『講緊咩呀…』
『喂，力仔…好少見你出聲喎！過來聽下龍叔講佢ｄ賺錢大計啦…』
係錢！
我當時最需要既野！
唔通今次真係一個機會！？
聽下聽下，我發覺買股票無想象中咁複雜…
開個戶口…簡個ｎｕｍｂｅｒ…
只要升我就有錢賺…（當然我後來發現其實係好複雜…）
於是有一日放早…我就約埋一個同事…
去銀行開戶口…用我儲埋既幾萬蚊
開始驚心動魄既股票之旅…
首先我聽公司最有經驗既華叔講…
買左一隻叫１１６６既股票
當時我連隻野叫咩名都未知…就買左…真係好on9
不過唔使兩日…我就賺左二千蚊！
於是我開始覺得股票市場可能係我搵錢既地方
而且返工個陣又可以ｃｈｅｃｋ住，
我就開始自己研究點先可以賺大錢！
就係咁，我就開始投入股票市場
一早起身我就望住個股市…
同事ｕｐ個ｎｕｍｂｅｒ，我又跟住買少少…
而且多左留意時事…同埋睇d同財經有關既書、節目…
個段時間我個腦就只有股票！
當時個市幾好，短短兩個月…我竟然賺到接近５萬蚊！
當然，Ｗｅｎｄｙ知道我有ｄ成績都開心…
但其實呢個時候佢應該已經唔太在乎我…（我唔知…只係感覺）
而個兩個月…我同Ｗｅｎｄｙ只係見左三次…
而且已經好靜…兩個人都無咩講咁…
但當時我雄心壯志…覺得一切都唔洗講…
只要賺到錢…我就有能力照顧自己愛既人！
更唔洗再比人睇唔起！
當時既我…唔知係窮得太耐…定係錢來得太快…
我既眼中…就只有個"錢"字
由兩個月前，同事講股票…我完全無興趣…
兩個月後，我成為同事口中既『畢菲力』…
兩個月多少少…
我係個市賺既錢已經有差唔多７萬幾
雖然當時買股票確實輸難過贏
但作為一個新手…我真係賺得好多…
之不過…當時既我，不知不覺間忽略左我心底認為最重要既野…Ｗｅｎｄｙ
原來人既心…真係會變得好快。
有一日…當我又係個市賺左錢…
早收工諗住去Ｗｅｎｄｙ樓下等佢既時候…
我見到一個令我呆左既情境…
Ｗｅｎｄｙ竟然同一個男仔一齊…
雖然佢地只係分開行…
無拖手無接觸…
但我個心一樣好唔舒服…
當Ｗｅｎｄｙ見到我既時候…
就問：『點解你會係度既…？』
我：『無呀…我諗住接你去街咋麻…』
呢個時候…個個男仔…
咪住…細心ｄ睇呢個係女仔來…
就話：『咁我唔阻你地…我走先喇…』
等個女（男？女？男？）仔走左之後…
我就問wendy『個個邊個來架…？』
『無呀…同學之麻…行囉…』
當時我就不以為意…
知道個個只係貌似男仔既普通女同學…
我個心就放低左呢舊岩岩拎起既石喇。
個次之後…我就繼續我既股票生涯…
無對Ｗｅｎｄｙ起疑心…
其間我地兩個依然佢有佢忙…我有我忙…
一個月見一兩次咁…
話咁快…我地一齊左一週年…
我亦搵到人生第一個十萬…
而且…經歷過９７、０３衝擊既一個同事…
好言相向咁同我傾左一次好長既計…
『唔好買住喇…個市好瘋狂…差唔多要停架喇…』
於是…我當係保險又好…靜觀其變又好…
放出左手上大部分既股票…
只留少少當玩下…
估唔到個位恩人果然厲害…過左真係唔係太耐…
好多人都損手爛腳咁離場…
而我蝕既錢…只係等於跌左個五蚊入坑渠…
我亦開始醒覺…咁樣買股票始終係投機…有風險…
靠股票始終唔係辦法。
唔知係咪上天終於肯施捨少少運氣比我…
個次我係個巨浪中安然渡過…無輸身家
不過我見到周圍好多人都受重傷…
就知道自己唔應該再沉迷股海…
我就開始諗方法…
到底點樣可以將儲落既十萬多d
投資成更加可觀既金錢？
諗起以前既上司、諗起Ｃａｔｈｙ、諗起坐係十樓既經理們…
我發現個班人有一個共通點…
就係學歷比自己高…
我眼見自己升職無門…高不成低不就…
被禿頭佬睇唔起…
加上個排上高登見到好多大學生討論咩o camp…gpa…
我想再出發…再讀書…
之不過…自己係咪真係應付得來…
同埋係咪真係值得…
個一晚我又訓唔著…
諗完又諗
最後…專家同自己講左一句…
『經歷咁多…點解唔得？』
於是就下定決心…我至少都要有個大學學位！
於是我下定決心
去到OU報左『電腦及網絡學理學士』(唔係hku…係ou…唔好笑本專家，柒頭皮)
加埋自己份糧同埋有得轉高級文憑既學分過去
我知道(以為)只要３年，
自己就可以有更好既前途，
抬起頭同禿頭佬講：『我要娶你個女！』
呢個時候…我好似有一個好飢渴既野心…
我要由當日既廁所仔…變成一個其它人睇得起既人！
但有一日，一個電話、一個約會，令我飢渴既心…
又變成世上其中一個寂寞既心。
一個平凡既星期五…
我好平凡咁返工…
當我將一個又一個新客戶既資料打入電腦既時候…
我收到一個信息…
【今晚放工去食飯？】
我仲懞懞下咁微笑…「哈…個傻女掛住我喇…」
【好…咁我去你學校接你啦…】
於是兩個人見面…
一路上…開話題同講野既都係我…
『我就快要返學喇…』『我一定會比心機既…』
一句又一句我希望分享既喜悅… 由我口中講出來…
但Ｗｅｎｄｙ好似無聽我講野咁…
終於…我忍唔住…
問左一句…『你係咪唔舒服呀？』
亦終於…Ｗｅｎｄｙ講左一句…
『阿力呀…其實我有ｄ野想同你講…』
就係咁，我知道我最愛既人…亦係我唯一既生存理由
接受唔到我只係掛住做野…唔陪佢…
承受唔到佢屋企人既疲勞轟炸…
忍受唔到佢男朋友有個唔正常既背境…
而更重要…佢無講出口…但後來我知道…
佢抵受唔到外間既誘惑…一個大學同學既追求…
對Ｗｅｎｄｙ來講…我並唔係咁罕有…
我只不過…將會係一個陪左佢年幾既舊男友…
Ｗｅｎｄｙ有朋友有家人… 而且有埋追求者，
根本無必要珍惜一段淡化左既感情…
但對呢個我來講…
一切都無喇…
『為佢我放棄我最愛慕既紅顏知己…為佢我先咁努力…一切都係為佢…』
到頭來…我好似有左好多以前無既野…
但又再無左最重要既野…
又再變番一個人生活。
就係咁，我又再次變成一個人…
無幾耐…ｏｕ既課程開始…
我一個禮拜有三日放工就返學…
當時我覺得…礙於我既性格…
我又會繼續一個人既校園生活…
感覺就好似以前小學中學既時候咁…
總係做一個被忽略既角色
唔同既係… 今次我身邊一個人都無…
阿爸…阿媽…麻麻…餐廳老闆…當日既少女…女朋友…
我人生中既過客…一個接一個咁離我而去…
或者呢ｄ過客唔明白…
佢地每一個對我來講，都非常重要，
不過無論如何…佢地已經唔係我身邊…
睇緊呢個post，又試過寂寞既巴打絲打就會明白，
當你知道呢個世界無一個人需要自己既時候，
而自己又無人可以傾訴可以依賴既時候…
真係會不自覺咁流眼淚…然後有一日，眼淚就會流乾。
我失戀之後…試過搵阿希…但搵唔到。
試過同一ｄ唔熟既同事相處…但根本唔係個回事。
始終…人地有自己既圈子…實在好難進入。
經過咁多…我今日變成一個男人…
今日，呢個男人…自稱"IQ題的專家"
無聊時候會上網…
會上高登…會問人ＩＱ題…
唔夠幾句又會比人用粗口問候…
仲會比人洗版…幾無癮…
哈哈…不過又有乜所謂丫…
每個人上網都有佢既背後…
都有佢既原因理由…
上網又洗乜咁介懷丫
幾年前，呢個係一個返工蛇王上緊網…
大都市入面一個平凡不過既男人…成長既故事…
我講呢個故事…
只係想大家珍惜所有…
唔好成日埋怨命運…
因為大家都仲有好長既路…
而本專家，係寫完呢個故事，離開高登之後，
呢幾年發生既事，令我對人生，有唔同既睇法。
(前篇完)
外傳：
我變番一個人之後，無幾耐就開始左半工讀既生活。
如我所料，係ou入面，大家都係進修，
為張沙紙，所以無諗過要識咩朋友，大家都係hi-bye。
開學後…我因為太悶…咁岩舊ac被人bam左，
就開左呢個ac…開始上高登問iq題。
起初，其實都好地地…最多有人話我d iq題on99。
但有一日，唔記得邊條仆街開左個iq題post，又唔開估，
不停淨係回："答案錯，但我喜歡你的思路。...答案錯，但我喜歡你的思路。...答案錯，但我……"
咁班高登仔就燥啦，不停屌鳩佢。
本身都唔關我事，但個post 1001之後，唔知邊個開個post點名叫我開估。
我心諗，做乜鳩…
丫屌你個陣班高登仔又集體失憶…個個當左條友係我…
係咁派膠比我…又叫我開估…又上大典寫我…
大佬…我叫IQ題的專家je…唔係全部iq題都關我事下話…
就係咁，從此我係高登開任何post…總有一兩個染頭皮回"答案錯，但我喜歡你的思路。"
最後我決定屈服…用呢個reply番你地班失憶撚算！
就係咁…大家知道我上網都可以黑成咁。
最後，幾年前我用呢個故作結，算係離開左高登，開始比心機半工讀。
p.s.專家後來有另一篇故事叫"如果我是陳奕迅"，有興趣可以睇下。(我個2xx支酒好似有一半係呢個故的)
呢篇"如果我是陳奕迅"，曾經有出版社pm搵我出書，專家無理佢。如果唔係我可能係第一個(或頭幾個)係高登寫故寫到出書既人… 不過我唔想被人起底