結婚前，回顧我的前半生: 後篇(下)
我去到interview…間學校請既係"電腦技術員"
但其實…即係打雜…
in我個陣…校長同我有傾有講…都幾好人
加上我做過義工…
最後請左我。
人工…高過之前。
但間學校有一個問題…
係柴灣…我搭車要成個幾鐘。
不過都唔到我簡…我就去左呢間學校做。
做落先發現…原來都無乜野做…
都係update下個網頁呀，整整個server呀…
有miss唔識駁projector就去幫佢駁下咁
就係咁…8月開始我返左呢份新工。
9月開始我返工返學…我諗今年一定可以畢業喇掛
始終我都唔細…唔係十八廿二。
男人三十而立…如果仲係搵雞碎咁…都唔得掂。
呢年，亦係我同Vicki分手既第二年。
而薑伯亦都返左加拿大。
我呢…又一個人傻的嗎9咁讀讀讀做做做…
不過…搭一個鐘車…其實都有好處…
就係我可以聽好多歌…
為左每日三個鐘車程，我個陣好豪咁用左半皮野買機買amp買耳機聽歌。
有一日，當我搭緊車…聽聽下歌既時候。
我電話響…我一望…係佢。
打比我既，係Wendy。
我當時…無聽佢電話。
我唔知佢想做乜，
亦唔知佢當我係咩人。
總之…我個陣既生活…好平淡…過得好好
一個人有一個人既好。
我可以靜靜地係屋企上網…打機…一個人行街
對比同其它人交流…要冒住被人拋棄忘記既風險…我情願一個人算。
加上我承認我有d憎佢，所以我無聽電話。
我只當佢係我舊同事。
我唔止收起電話，繼續聽歌。
我亦係收起埋自己既寂寞。
之後個幾日…Wendy keep住有打電話來。
但我都係無聽。
但個幾晚，我訓唔著。
我個陣既生活實在太平淡。
當有人想搵你既時候，其實都係會開心。
而我個陣既心態…有少少係：依家我唔理你…你吹咩
直到某日，我如常放工番屋企…見到佢係我門口。
我當時…都唔知比咩反應。
始終我都唔係個絕情既人。
佢同我講左句：Hi
我同佢講番句：Hi...(真係hi,唔係粗口。)
就咁，個晚我同佢食左餐飯…傾下計。
但我無講我個幾年遇到既事…入醫院呀…比人飛…都無講。
我只係講下讀書…講下工作。
最後我送Wendy返屋企個陣…佢同我講…佢掛住我。
我話：我一d都無掛住你…我可以同你做番朋友…但我唔想拍拖，唔想再受傷。
佢喊住上車…但我無理。
一來我唔覺自己有錯，唔想拍拖…好正常，我當年又無欠佢。
二來我唔係隨傳隨到…你今日話掛住我…聽日呢？後日呢？
我成世人…就係太易信人…太為人諗…先搞成咁。
當時既我…的確係咁諗，但後來我知道…我錯了。
就係咁，我拒絕左Wendy。
個日之後，佢都仲有搵我…同whatsapp我
內容離不開約我…掛住我等等
但我無認真理過
我得閒，就應。
唔得閒，就唔應。
幾個月入面，我只係見過佢幾次，食下飯咁。
期間…佢又送電話…又送game…又送衫比我。
全部都係我鐘意既野。
個陣…我真係有d心動。
唔係因為物質…而係因為…我估唔到佢仲知我心水…知我鐘意乜。
但我無心軟，我同佢keep住朋友關系。
直到一晚，佢又約我。
個晚佢又舊事重提…想同我復合。
我拒絕左。
個晚，Wendy發左顛。
個晚，我同Wendy食完飯，飲左少少酒。
我見都成12點幾…就送佢返屋企。
我送到去佢美孚屋企樓下。
佢又同我講…
Wendy：不如你跟我上去？
我：唔好喇，唔係咁方便既。(心諗，一陣又見到你老豆，又sales咁問我入唔入贅，我點搞 )
Wendy：唔會啦，我依家一個人住
聽到咁，我又見佢醉醉地，就勉為其難送佢上樓。
我地飲左少少，但佢真係醉得幾勁。
而我，絕對無非分之想！
我只係想快d返屋企打LOL
於是我就扶佢上樓。
上到樓，佢就搵鎖匙，但搵極都搵我唔到。
我就生勾勾咁等佢搵。
佢搵呀搵…我就無野做四圍望…
望下望下…做乜間屋開左燈…又有電視聲既？
我再望下條"la"
…好似有人影既
當我知道唔對路…度門已經打開左。
我見到佢阿媽開門…sofa仲有佢阿爸…仲有幾個姨媽姑姐既物體。
Hi Hi…說好的一個人住呢？
個陣我、佢、佢阿媽都呆左
而Wendy面紅紅咁轉身問我…「呢度邊座呀？」
Hi…中伏
我個陣真係呆左。
唯有答：呢度6期(心諗：好似係)
佢就講左句：哦…
個陣我心諗…哦你老尾咩…
又話一個人住…點知老豆老母姨媽姑姐出曬來
我就講左句：hi！我同Wendy飲野…送佢番來，打搞曬，唔阻你地。拜拜~
就轉身走。
點知伯母捉住我，叫我留低。
我就話：唔好喇，都咁夜。
點知Wendy又走埋來，叫我留低。
我望真d…佢既眼神…根本好清醒…
走過來仲快過保特，根本唔似醉。
我先知我真係中左伏，比佢呃左。
我就講多次：唔好喇，我唔阻你地喇。
點知當我轉身走既時候…Wendy好大聲咁大叫…
「叫你入來坐一陣呀，係咪唔得呀！！！！！」
我轉身…望到佢開始喊。
我成世仔…最怕就係女人喊。
記得中學有一次，我唔小心篤左女同學個鼻一下，佢喊。
最後我跪左係地下求佢原諒我。
但唔知點解…今次…我無怕。
我望一望後面，見到佢地成家人…望住我。
見到Wendy喊到七彩…
但我無任何感覺。
我唔知佢地搞乜，但我唔想理。
當時既我諗…我無欠佢地丫…點解要我屈服。
最後…有lift…
我即刻轉身射個三分波，入左lift…走左。
依家諗番…我都幾大膽。
個刻我決定以後都唔見Wendy，就算見到…佢都只係我舊同事。
我同佢，再無任何關系。
個晚之後我無再搵Wendy，
我只係繼續返工讀書…
雖然我覺得…Wendy係一個好女仔，
但巴打們，你地應該明…絲打們…你地應該要知…
iq題：一次不忠…下一句係乜？
所以，我情願寂寞d一個人，都唔願意再付出d乜。
我一個人，有屋住，有工返，無人無物，其實樂得清靜。
於是…上年既頭半年…我就係返工讀書，
又再回歸平淡。
無耐…就到大學final…
我用盡心機…做左最後一份assignment。
交個一刻，我心情好不安…好怕又肥…又要重讀。
u know…retake一科…隨時夠我去個旅行。
更重要既係…我好想快d解脫。
終於…到左出分個日…我pass左。
畢業了。
個日我真係對住個mon喊左出來。
可能大家唔明…
我呢世人…無人無物…讀書唔成…廁所都洗過。
但我竟然可以大學畢業。
我真係好開心。
我唔知我媽媽麻麻係上面有無喊…我希望佢地有為我驕傲。
雖然一個degree唔代表d乜
但呢段時間…我真係有血有淚，有苦自己知。
但我真係好開心。
大學畢業，對我來講係一個里程碑。
一個學位唔保證我發達，但我可以抬起頭做人。
雖然我唔係咩港大中大畢業，
但至少…我都係一個有下過苦功…捱過又成功既人。
我一諗起呢幾年…我幾乎每日都頻頻撲撲…
返工返學…(雖然都走左好多堂)
為左讀書…到時到候要死慳死抵儲學費，
又試過因為乙肝搞到肥曬咁滯。
經過咁多野，我終於成功。
個日我真係好開心，我即刻打比薑伯…想同佢講我畢業。
事實上…我都唔知同邊個分享好。
諗落…薑伯已經好耐無搵我。
電話打通之後…聽既人唔係薑伯…而係另一個男人。
個男人係薑伯親戚…同佢傾完…
我先知道…薑伯原來入左院，就快唔得。
我知道薑伯有事之後…真係好唔開心。
本來畢業…係好開心，但一下子我心情跌落谷底。
原來…薑伯半年幾前…已經知自己有事…
至於係咩病…就唔講了…
但薑伯知我要博殺…讀書…所以唔話我知…
到我知個陣…佢已經唔係好掂…開始見親戚朋友…
個陣係七月…我即刻同學校拎左假…飛過去搵佢
個陣我個心真係好亂
係我最唔掂…最需要其它人既時候…係薑伯幫左我…
但係佢最需要人既時候…我竟然唔知道…
我諗…點解佢會咁為我著想…
呢個世界…真係好奇怪…
最親既人…可以不顧而去…
無親無故…反而會咁著緊你…
我係飛機上面…真係好急…好急…
好想見到薑伯…
我一落機…就即刻轉車去薑伯住緊間醫院。
呢次…亦係我第一次搭咁耐飛機…去咁遠既地方。
但可悲既係…我唔係去旅行…
而係去送最後一程。
由搭飛機到搭車…我心情都好沉重。
係我無啦啦有病個陣…薑伯幾乎每日都會來睇我…
又會買下湯水比我飲。
又細到大…除左之前既女朋友…
我未遇過一個咁愛錫我既朋友。
尤其係呢個利益行頭既年代…要有一個咁好既朋友…真係好難。
其實我知自己唔止當薑伯係我朋友…
係我第一次見到佢之後…
不知不覺間我已經當左佢係半個老豆。
當然…佢未必知道我既心意…
一直以來…除左我病個陣佢來睇我，
我最多都係佢悶個陣…陪佢傾下電話…出去食飯吹水我食…
可以講…我為佢…根本乜都無做過。
我一路諗…又忍唔住喊…
我覺得自己欠左佢。
唔止因為薑伯既病…
更因為無左薑伯呢個亦師亦友…
我真係唔知點算。
去搵佢個陣…我真係上車喊到落車…
再轉車…再上車喊到落車…
終於，我用左兩包tempo…喊到完場，到左薑伯住既醫院。
計落…我已經好多個鐘無食野。
就算係飛機，我都無胃口。
但我個陣…真係一d肚餓/唔舒服既感覺都無。
我一心一意…只係想見到薑伯。
一落車…我就跑…(雖然隔左最少幾條街)
點知…人生路不熟…我跑到蕩失左路
我用我有限公司既英文問人…先知原來跑錯方向…
最後，我落左車之後…用左成個幾鐘先到。
個陣我真係急到核爆。
一到醫院，我就照住薑伯朋友講既病房跑跑跑。
終於…我到左薑伯既病房。
入面除左薑伯…仲有佢既親戚係度執野。
我睇到薑伯訓係床上面…插曬喉…要載住個罩呼吸。
個陣既佢…已經瘦到不似人形。
我真係想象唔到…只係一年多d…
薑伯會由一個身壯力健…行路仲快過我既"老人家"…變成依家咁…
我去到個陣薑伯已經訓左…我唔想嘈醒佢…
於是，薑伯親戚比左薑伯間屋條鎖匙我…車我去個度過夜。
個晚我係薑伯屋企…見到我地成班一齊做義工既合照
佢曬左張相…放左係床頭…隔離仲有佢個仔既相
我諗…薑伯應該好重視做義工既朋友…
可能人老左…身邊無人無物…自自然然就會將感情投射去其他人度。
知道薑伯情況暫時穩定之後…
個晚我好早訓…準備第二日去探佢。
第二日，我去到醫院。
見到薑伯既情況都係一樣…要靠部機呼吸…
原來佢維持呢個情況…已經一段時間…
佢親戚話…薑伯個病…只會惡化…唔會好。
簡單來講…即係等 ………
我望住薑伯…見到佢神智不清咁…
對眼好似望住我…又好似想訓咁。
想講野又講唔到…只係口郁郁。
我真係好心酸。
聽佢地講…薑伯個病算係遺傳病。
而佢地家族以前都有人有呢個病。
一病發就無得救咁滯，
而佢地都一早有心理準備。
最後…佢地比左一大疊信我。
原來薑伯知道自己病發之後…
襯情況未嚴重，寫定左一大堆信比佢識既人。
而呢堆信…都係佢係香港既朋友…有好多都係義工中心既義工。
而佢地希望我幫手…等薑伯過身之後派比佢既朋友。
呢個…亦係薑伯既意願。
我可以理解…薑伯呢d老頑童…
應該唔想大家婆婆媽媽…喊苦喊忽。
所以唔想比人知佢就來唔得。
我打開左佢寫比我封信，
入面都係一d鼓勵既說話…同埋預祝我畢業。
係信既最後一段…薑伯寫左幾句…改變我好多既說話。
薑伯係信既最後…分享左佢以前既野…
有d佢講過…有d佢從來無講過。
原來…薑伯後生個陣…
因為爛賭…差d書都無得教
但佢保得住份工…保唔住佢老婆…
佢老婆…係薑伯個仔幾歲個陣，就走左佬。
但薑伯無留佢老婆…
佢覺得自己仲後生…
要搵女人一定搵到。
於是就同個仔相依為命。
但薑伯個仔讀小學個陣…自己放學遇到交通意外，比車撞死左。
佢個陣好傷心…又掛住佢老婆…就去搵佢。
點知佢老婆已經跟左第二個。
薑伯個陣…先發現屋企人係最重要…
但佢已經無能力再愛其它人。
佢決定一個人過世。
佢叫我唔好好似佢咁…要珍惜身邊既人。
唔係老左就會好似佢咁…
我睇完…覺得自己之前咁對Wendy…好似做錯左…
但我無諗太多女人既野…我望住薑伯…
我諗…會唔會有奇蹟呢？薑伯可以捱幾耐呢？
我做左個決定。
我打左返香港辭職…決定一直陪住薑伯。
雖然我個陣比人屌到七彩…但我覺得…有d野比錢比工作重要。
就係咁，我留左係加拿大…
原本我只係打算係度一個禮拜，同學校請假都係一個禮拜。
但見到薑伯咁，我真係唔忍心返香港咁衰仔。
於是…我決定留低。
你可能會問我…做乜咁傻？
請假請耐d咪得…洗乜辭工？傻的嗎？
我個陣既想法…真係好傻。
我諗如果我請兩個禮拜…就好似比左個限期薑伯咁…
所以我決定留到薑伯好番…或者唔得為止
係個度既時間…過得好慢…
我每晚就住薑伯度…每日去醫院…然後同佢個幾個親戚朋友食晚飯…
每日如是…第二日…第三日…第四日…
一切都好平淡…
天氣好…環境好…我心情都慢慢好番
直到我係加拿大rm既第六晚…
我收到薑伯親戚既電話…
薑伯終於走左
我收到薑伯走既電話…確實好唔開心
但對比我第一日來到，見到佢個種震撼…
收到薑伯既死訊…我反而無咁難過。
或者我早就有心理準備…或者我覺得…了結對薑伯來講…反而係一種解脫。
我清楚薑伯…與其叫佢每日殘廢咁…連呼吸都控制唔到…佢可能寧願一了百了…
個晚…我斷斷續續咁諗起同薑伯相處既日子…
我有喊…但唔係失去理智個種。
我好慶幸自己人生有一個咁既朋友…
或者薑伯唔係咪大人物…亦唔係咩超級大好人…
但至少…由我識佢到今日…佢做既野…全部都值得我敬佩。
薑伯係加拿大既朋友…比起係香港更少。
佢既葬禮好簡單…但大家都好凝重。
睇得出…係圈子裡面，重朋友…樂於助人…瀟灑豪邁既薑伯…係個有聲譽既人。
我諗…係呢個世界，99%都係平凡人。
我地一世人做過既好事…包括幫人執番個橙…搭lift時等埋其它人…幫朋友…等等等等
都可能唔顯眼…無人知…無人記得。
但我覺得…只要做到薑伯咁…到死個日…無人話你抵死…唔係who cares無人理…
而係大家都會真心為你傷心…為你喊…已經足夠反映一個人係點
同薑伯親戚一齊，幫薑伯做好身後事…安頓一切之後…
我就番左香港。
落機個一刻…我心情好空虛。
唔夠兩三個禮拜，我人生少左個良師益友…無左份工…無左方向…
成個人輕飄飄咁…好似所有野都要重新開始一樣。
年份Remark：(方便大家)
被Vicki飛->09年
分手一週年->10年
無啦啦肝炎入院->11年
大學畢業+薑伯走->上年7-8年
就快到..我諗應該係大家最想睇既…
差電點差左個bb出來…點解結婚…點解要個唔係自己既肚
我會原原本本同大家坦白…
可能會有人鬧我…預左…
8月…薑伯既事完左
我返到香港…我個人真係好迷茫…
我無心情搵工…無心情做任何野…
每日就係打機…上網…
個排…我不知不覺間痴左線…
我記得個排我上網…唔止上高登…
都會發顛咁鬧人
我會上uwxxts搵五毛來Hi…
又會係高登發顛
如果巴打個陣有比我Hi過…請原諒我…對唔住
因為個陣既我…心情真係好差。
書…我讀完…工…又無左…朋友…都無埋
成個人真係無曬方向…無曬目標。
奈何生活總要工作…
於是我迫自己搵工。
個陣咁岩某電訊商請programmer..
我就去in…又比我得左。
於是我開始返工。
呢份工…無論人工待遇都好唔錯…
老老實實…足夠我買好多cd…一年換幾次電話…去幾次旅行。
但…我都三十有幾…咁樣過生活好似唔係太好。
我決定儲錢…換樓。
經過咁多野…我好想離開呢間屋…呢間我阿爸留比我既屋…
以前…我會等…一路等佢某一日會番來認我。
但依家…我已經無奢望佢會番來。
我唔想再比以前綁死。
雖然話就話想買樓…但因為依家間屋唔係寫我名…
要轉我名既手續好煩…所以如果想買樓…就要重頭開始。
所以…坦白講…呢一刻我已經放棄左。
但幾個月前…我真係有儲錢的。
轉左新工…我既人工扣除開支…其實儲到好多錢。
有錢左…有時諗番以前一日食兩餐麵包過既日子…
真係想像唔到自己當時點捱過。
但正因為我曾經窮過…我先知道錢係得來不易。
所以即使收入高左，我都無亂使錢。
我連返工都盡量帶飯，有時同同事出去食…都唔叫凍飲！
我既新工…係某電訊商既programmer
人工叫做唔錯…雖然返工…成日有返工無放工…
但我單身寡仔…其實又無乜所謂。
就係咁…好快就過左幾個月…
係十二月頭…我記得…個日個天係橙色…
行行下…望望下個天…我係街度撞到Wendy…
個日見到佢…化妝化得好左…靚左好多…
我離遠見到佢…心諗點解會係屋企附近撞到佢…
諗住走佬…
點知比佢見到…走埋來捉住左我…
Wendy：「hi」
我：「hi...」
Wendy：「上次…對唔住呀…我個陣心情唔好…」
我：「嗯…」
我地傾左一陣…
佢仲同我換番電話…(因為佢換左number)
唔知點解…我無左個種憎佢既感覺…
但我心入面…都係諗…「舊同事je....舊同事je...舊同事je...」
Wendy：「係呢…我電話無電呀…可唔可以去你度差電呀？」
佢手拎住部iphone…show比我睇…又真係無電…
我：「下…哦」
我都唔知點解我會應承…
但我當時心諗…「我忍得住既…無事既…差電je…」
就係咁…佢跟左我行番屋企。
上到我屋企…Wendy無同我講乜…
佢只係自己搵左個插頭…係度差電…
然後佢部電話著番…佢就禁禁禁…
而我…無理佢…自己做自己野
然後佢禁完電話…就自己開電視睇
我心諗…「丫你真係當左自己屋企…」
我就走去同佢睇電視
睇左陣電視…佢就走左。
當時既我覺得…Wendy應該已經放開左。
因為佢無任何唔尋常既舉動。
而我…亦係Hi Hi…因為Wendy靚左…我又有少少掛住佢…
個晚…Wendy打左比我…傾左陣電話…
我地傾下呢樣…傾下個樣…有講有笑…都幾開心…
之後幾日佢都有whatsapp我…夜晚佢都有打比我…
我慢慢覺得…我可以同Wendy做番朋友先…
但我始終都好理智…都仲當佢係我舊同事。
點知過左幾晚…以前同我同Wendy同公司既阿輝…打左個電話比我。
「喂！司徒生！你係咪同Wendy一齊返呀！？」
我話無…
然後阿輝講左Wendy當年同我分手後…一d我唔知既事比我知…我先知驚…
阿輝同我講…原來Wendy無同我一齊之後…
同左個TB一齊…個TB係佢大家既同學…
佢地仲夾左筆錢…一齊炒股…玩到悶就玩期指…
仲炒孖展…碌卡透支買股…
呢個情況持續左兩年…
初初Wendy賺到錢…就無搵工全職做炒賣…
結果…唔使兩年…佢由賺變蝕…仲爭落一大筆錢。
個TB就走左佬…
而Wendy唔敢同屋企人講…就搬左出去…一邊做野一邊還錢…
最後壓力大得滯…有埋抑鬱…又唔同人講…越搞越嚴重…
最後…佢入左醫院醫左半年。
後來佢屋企幫佢還清d數…先無事
我聽到咁…真係好震驚…
因為我個幾日接觸既Wendy…真係好正常…
但諗番之前…佢引我上去佢度…又大嗌叫我留低…
真係有少少驚。
所以聽完阿輝講之後…我有幾日無聽Wendy電話…
佢打左好多次比我…我只係whatsapp佢話好忙…
我打算避到佢知難而退算。
到左第四定第五日…夜晚12點…
我屋企有人禁鐘…一睇…係Wendy。
打多篇要訓…
搭正夜晚十二點…有個有精神病既女仔踩上門…
我又一個人住…你都咪話唔驚。
當時我開住燈…我初初諗住扮無人…
但佢不停禁鐘…拍門…我最後都係開左門。
我一開門…佢就問我…
「你諗住唔要你同我個bb拿？」
我當時…真係啞左。
無啦啦…係邊度彈個BB出來？
我就話：「你無事下嘛…一係我送你返去先啦…」
佢無理我…不停問…「你諗住唔要我同個bb拿？...你諗住唔要我同個bb拿？...你諗住唔要我同個bb拿？...你諗住唔要我同個bb 拿？...你諗住唔要我同個bb拿？...你諗住唔要我同個bb拿？...你諗住唔要我同個bb拿？...你諗住唔要我同個bb拿？...你諗住唔要我同 個bb拿？...你諗住唔要我同個bb拿？...你諗住唔要我同個bb拿？...」
無論我講乜…佢都無理我。
佢仲越講越大聲…連語氣都變埋。
不停問…「你係咪唔要個bb呀！...你係咪唔要個bb呀！...你係咪唔要個bb呀！...你係咪唔要個bb呀！...你係咪唔要個bb 呀！...你係咪唔要個bb呀！...你係咪唔要個bb呀！...你係咪唔要個bb呀！...你係咪唔要個bb呀！...你係咪唔要個bb呀！...」
我個陣真係好驚…仲驚到標左少少尿…
慢慢…我層樓d人開始出來睇咩事…
於是我想拉佢落去樓下先…
但佢唔理我…
最後我話…「我要！」
然後佢就停左…
我話「夜喇…有咩聽日先講好無…？」
佢停左講野…開始喊…
我就同佢落樓下，搵左架的士…送埋佢返屋企樓下。
個晚我真係好驚…打比阿輝又無人聽。
第二日…Wendy又開始打來…我唔聽…佢就Whatsapp我…
我block埋佢…
第二晚我打比阿輝…點知佢話要去澳門…
我就上高登問大家點搞…當然我隱瞞左d野…
因為我唔止想避免被人知係我…仲想呃埋自己…
呃自己Wendy係舊同事…痴線既…
但我…心入面仲係關心佢…可能因為我都無乜幾多朋友…
個晚…我好驚…好驚佢又上來…我淨係識避…
結果…搭正12點…佢send左個msg比我…
呢張野我當時有up上來…大家都笑我…
…其實我個陣真係驚到標尿…
收到Wendy msg既第二日…我執曬左d衫褲番工…
我問阿輝借左間屋住一晚避一避先。
因為阿輝成日過大海…佢好爽快應承左我。
我前一晚訓唔到…晨咁早就出門口。
出門口個陣…我仲同樓下看更話可能會有個女人搵我…如果有就話我唔係度…我去朋友度住一排。
個日放工我就咩住d衫褲鞋襪去左阿輝度。
個晚我都仲係幾驚…我唔知Wendy點解會搞成咁…
但我覺得自己好似…都有d責任。
我係阿輝屋企上住高登…希望有d巴打係度無咁驚
無耐…我電話響…原來係樓下個看更打比我…
佢話：「有個女人搵你喎…司生( ...)。」
我個陣驚一驚…好彩我一早叫看更留意…唔好比佢上樓…
我以為我成功避開左佢…
點知無耐…就有人禁鐘…
行去開門個陣我以為係阿輝…
睇一睇…
係Wendy…
點解佢會知我係度…
就係咁…我係門後面一路睇住Wendy禁鐘…
一路驚到震。
我當時即刻返去上高登…話佢禁鐘…
問大家點算好
但大家即刻笑我…
期間佢無停過不停禁…
我行過去…諗住開門既時候…
停左…停左！
我個刻真係好開心…
至少我今晚…可以避一避先…
大佬…我真係幾晚無覺好訓喇…
晚晚都驚Wendy會無啦啦走入來…
鐘聲停左…我就慢慢隊隻眼埋去…
睇下佢走左未…
點知我一望隻防盜眼…
見到Wendy都望緊入來…
即係咁…
而Wendy即時大叫…
「知你係入面喇！開門呀！」
個刻我真係驚到亞太區有一天成為亞太區左係度…
我個陣真係驚到撞鬼咁…
心入面有一大堆疑問…
『點解佢會知我係度呢？』
『點解佢會咁醒…望住隻防盜眼呢？』
『點解我又會咁蠢走去望住隻防盜眼呢？』
『點解呢dHi Hi新樓…鐵閘都無隻呢？』
但我諗左陣…呢度唔係我屋企…一陣驚動其他人都幾煩…
而且…我一路咁避都避唔到幾耐…
不如今日就了結左佢…
於是…我決定開門。
我一開門…Wendy就撲左埋來！！！！！！
攬住我喊。
Wendy攬住我喊個陣…
我真係…心軟…
我同佢入左屋…坐低左…佢仲喊緊…
我諗佢都喊左半個鐘先停…
我無出聲無講野
一直等佢喊完
佢喊完第一句同我講…
「我好掛住你呀…」
我個刻…個腦一片空白。
我覺得自己好想不計前嫌…攬住佢。
但我分唔清自己係真係仲鐘意Wendy…抑或只係自己太寂寞。
之前…當我有同Wendy出下街個陣…
雖然我口裡說不…無應承同佢復合。
但我一直最愛既…都係佢。
我對阿希…係覺得自己欠左佢…多過愛佢。
而且puppy love…我無太大感覺。
而Vicki…更加唔使講…
但Wendy…雖然佢忍唔住家人壓力同出面既引誘…
但佢始終改變左我…亦係我第一次認真拍拖。
有人話…男人一生只會愛一個女人…
如果係真…我諗我愛既就係Wendy…
佢喊完之後…開始同我傾計…
佢坦坦白白咁同我講左好多…包括佢以前爭人錢…入精神病院…等等等等
佢話…經過咁多野…佢知道自己做錯…
佢好後悔當年無好好咁珍惜我。
我聽完…其實好開心…
但問題係…個BB呢？
佢所有野我都可以唔計較，
但個BB…我一定要搞清楚先。
於是我開口問：「咁你話有BB…係咩事？」
Wendy：「咩事？」
我忍唔住問：「我意思係…個BB係邊個既…」
Wendy：「咩邊個呀？你嫁！」
我個陣真係r曬頭…唔知點拆…
唯有話：「你個日來差電…我地又無做…又點會差左個BB出來呢？」
講完…佢又係度喊…
佢一路喊…我根本問唔到任何野。
當時既我…只係諗…我可以不計前嫌…
咩蝕錢…有精神病…
呢d對我來講…根本無問題…
問題係…我係咪大方到…可以幫人養仔呢？
我呢一刻可能唔介意…但以後呢？
難保我一有日改變心意…
始終…呢樣野都要考慮清楚…
而且我仲未搞清楚發生乜事…真係好難決定…
我個樣本身已經似占基利…
載埋頂綠帽真係…
於是我一路安慰Wendy…
一路諗點搞好…
個晚搞搞下都成三四點…
於是我又送佢返屋企。
上左的士…Wendy仲一路喊緊…
個的士話仲口upup
好似當我岩岩姦左佢咁…
到左美孚…我地就落車…
我扶住Wendy返去佢樓下…
行行下…我見到…禿頭佬…即係我外父…
係度等緊我地……………
我一落車…見到禿頭佬…
心諗：唔係嘛…搞乜呀…
我真係一d都唔想見到佢…唔想同佢有任何接觸。
呢個時候Wendy停左無喊…
一路拉住我過去佢老豆度。
Wendy細細聲咁叫：「阿爸…」
我…都叫左聲：「嗯…Uncle…」
我以為禿頭佬會爆炸…會屌我…點知又無。
禿頭佬：「阿力，辛苦曬喇，唔該曬你送Wendy番來。」
我個陣真係打左個突…
我估唔到禿頭佬會咁好聲好氣…咁有禮貌。
我：「唔辛苦…」
禿頭佬：「係呢，不如上來坐陣啦。」
下？我心諗…都成4點幾…仲上來坐陣？一定唔方好野。
但諗落…呢件事始終都要解決。
而且…BB既事…一定要問清楚先得。
於是我就話好…
就係咁…我地一齊返上樓…
期間我地有講有笑…
Wendy老豆仲問我近況呀…做野點呀…等等
好似好關心我咁。
我睇得出…Wendy好開心…
同頭先既佢…完全唔同。
如果佢一直係咁…其實佢都算係個好好既女朋友。
但佢有時…又好得人驚。
上到樓，我就坐低左。
Wendy阿媽訓左。
禿頭佬仲拎左杯茶比我飲。（心諗：有無毒架…）
Wendy就話：「阿爸，咁我沖涼先喇。」
Wendy就走左去沖涼。
突然…我覺得背後好似有陣霸氣。
「阿力！你入一入來先。」禿頭佬用好重既霸氣同我講。
我就跟左佢入書房…
心諗…屌你…點解d態度唔同左既。
我入左書房之後…就同禿頭佬對住坐低左。
我望住佢…佢望住我…
我地應該僵持左幾分鐘。
「呀…Uncle呀…究竟咩事呢？」我話。
「你答我先…你有無搞大我個女個肚？」佢話。
我真係估唔到…個對話會一下子進入氣玉。
「我無。我同Wendy乜都無做過。」我話。
「咁…你知唔知我個女點解會話自己有左？」佢問。
我心諗…我都想知啊屌你個染頭皮…我好多晚無覺好訓喇
當然…我唔敢咁答。
「唔知…我都想知…佢不停話佢有左bb…仲話個bb係我既。」我話。
「咁好…我將我知既野…話比你聽…但你唔可以同Wendy講。」佢話。
於是…佢開始同我講…一d我到依家都覺得好難以置信既事…
個晚…禿頭佬同我講…係我遇番Wendy之後個排，
個人變左好多…開心左好多…
佢地問Wendy…先知佢同我有番聯絡…仲有出街。
雖然…佢地唔係咁鐘意我…
但因為Wendy有病在身…佢地唔想刺激佢…
就無理我地。
但佢地覺得咁都唔係辦法…就想搵我上去佢地屋企…傾下應該點。
仲叫埋幾個親戚上去等我。
即係…Wendy想帶我返屋企個晚。
我聽到咁…真係覺得有少少嬲。
我覺得佢地好似利用我咁 ........
我話：「你地其實想點？」
禿頭佬就話：「我地想你同Wendy一齊番。」
我：「咁咪好矛盾？你地又話唔鐘意我…」
佢：「只要Wendy開心就乜都得。」
我聽到咁…覺得禿頭佬雖然對住我係衰d
但佢總算愛佢個女…
然後…佢就繼續講：「個晚你走左。我地決定唔再比Wendy同你行埋…Wendy因為咁…喊左幾日。過左一排…我地以為佢無事…點知有一日佢同我地講…佢有左bb。」
我聽完即刻話：「我個陣無見過Wendy喎！我同佢乜都無做過！」
禿頭佬答我：「我地知…」
我即刻問：「咁個bb到底係邊個既？」
我估唔到…原來禿頭佬佢地一早知道乜事。
咁點解，頭先又要問我有無搞大Wendy個肚呢？
佢話：「其實…Wendy根本無bb。」
我聽到呢度…真係O左咀。我諗大家睇到呢度…都同我反應一樣。
無bb？一日打幾十次電話來…又上門禁我鐘…竟然話無bb？
但我未開口問…佢已經繼續講。
「個陣…Wendy話自己有左…我地都唔係好信…因為佢根本好耐無出過去…出去都係同我地一齊…又有工人睇住。我地真係好震驚。」禿頭佬話。「我地即刻帶左Wendy去睇醫生…又即刻打比你…但你無聽電話。」
(因為有排我block左Wendy)…
「後來…報告出左…Wendy根本無bb。」
聽到佢咁講…我都唔知好嬲定好笑。
原來…Wendy根本無bb…所謂有bb…我個陣唔知佢係特登諗出來呃佢屋企人…定佢個病令佢真心以為自己有bb
總之…我無載綠帽…至少肉體上無…我鬆左一口氣。
但我諗番頭先…禿頭佬問我有無搞大佢個女個肚…
即刻開口問：「咁你頭先…！」
我未講完…禿頭佬就話：「我地想你同Wendy結婚！」
呢個時候，Wendy沖完涼，走左入來。
wendy：「阿爸，你地做緊乜呀？」
禿頭佬：「無…我地傾緊你地結婚既事je」
下？乜向左走向右走野呀？我都無應承。何況…其實我都仲係唔係好信…
Wendy聽到禿頭佬話結婚…即刻呆左。
Wendy：「老豆你真係比我地結婚？」
禿頭佬：「係呀，你訓先啦，我同阿力仲有野傾。」
我個陣…都唔知講乜好。
只係講左句：「係囉…你訓先啦，我一陣自己走。」
Wendy笑住咁返房之後，禿頭佬同我講…
佢話Wendy個病已經好嚴重…佢拎左幾份report比我睇…
有兩份上面寫住Wendy真係無bb…(佢地真係醫生都唔信要睇兩個
)但…另外兩份…係關於Wendy既病
原來Wendy仲食緊藥…
而且因為我上次咁對佢…
佢情況仲嚴重左。
我到依家都覺得…自己可能真係做錯左。
「如果你同我個女結婚…對佢好好地…錢…唔係問題。」禿頭佬話。
我知道…雖然Wendy炒輸股票期指…但佢屋企其實仲係幾有錢…
除左住緊個層樓…仲有好幾層收緊租。
所以我覺得佢好傻…為左幾十萬…唔同屋企講…搞到自己咁。
我亦知道…佢地將呢幾層樓寫左Wendy名。
而當時既我覺得…自己好似係度交易咁…
我對Wendy確實係仲有感情…
尤其係聽左咁多野…我好想對佢好d…照顧返佢。
但我又怕自己對佢係同情…唔係感情。
我就同禿頭佬講：「錢…我搵到，我已經唔同以前。我有能力照顧Wendy。但我唔想你地介入咁多…我唔係買緊你個女，更唔係收錢照顧你個女。你放心，我會睇住Wendy。」
個晚禿頭佬無講d乜…只係講左句多謝。
我返到屋企…拎番以前我同Wendy影既相。
我覺得自己都有責任…睇番以前…我地真係好開心。
我決定…同Wendy求婚。
你可能會話我傻…話我衝動…但我好清楚自己仲鐘意佢，而佢亦好需要我。
我覺得咁已經足夠。
個晚之後
我決定左同Wendy求婚
我覺得自己好似欠左佢
當年…我可能真係忽略左佢…先搞到佢咁
而且我知道自己仲愛佢
如果我因為佢有病
我就放棄
我一定會後悔一世
與其放棄…我寧願試下接受佢
個晚我診得清清楚楚之後
我星期六就買左介指、花上去佢度
上到去…得佢係屋企…佢見到我咁…
我都未開口…佢已經喊…我地攬埋一舊…
都唔知攬左幾耐…
到佢阿爸阿媽返來…我地先放手
個晚我同禿頭佬同伯母傾過
我地結婚後會一齊住…(住佢地附近,都係美孚)
結婚就簡單而隆重…唔會請太多人…(我根本無乜人可以請…)
不過伯母話衫、場地一定要靚。
不過對我來講…呢d野根本唔重要
我最想Wendy好返
變返以前咁…
我好想追番以前失去既野
個晚Wendy話…佢個幾層樓會加我名
我話唔好…
好老實講…我唔想將呢次結婚變到交易咁。
於是，我地就訂左婚。
訂婚之後…我都好想…好似睇戲咁…一班男人放縱一晚
不過我無咁做到。
我只係阿Q咁上網出下膠post…話自己去左ons…講下笑
有巴打問…對住Wendy我會唔會驚…
好老實講…Wendy其實…好正常
佢最唔正常就係以為自己有左bb…除左咁…乜都無問題…
我覺得佢咁諗…係想用個bb留住我…都係唔想我走先咁
我諗慢慢佢就會無事…
一切都好順利
但最最最最最麻煩…就係禿頭佬
由我第一日應承同Wendy結婚開始
禿頭佬就開始煩我
又話我份工成日ot…照顧唔到Wendy…不如轉工
又話我斷六親…不如入贅
又話我搵錢咁少…(佢以為我仲係1x k人工)…不如唔好做…
我全部都無應承
我只係應承會請個鐘點睇住Wendy
而且伯母住咁近…根本同一齊住無分別…只係夜晚分屋訓
一句講曬…總之就係煩煩煩
最後…有一次我忍唔住…叫埋伯母同禿頭佬入房傾
我話…入贅一定唔洗諗…
工…我可以做多一年半載轉
個次都傾得幾勞氣…
但最後佢地都接受左
其實伯母覺得…我肯同Wendy結婚已經有情有義…都唔要求太多。
我雖然應承照顧Wendy…但有d底線我無得讓
如果一直挑戰我…只會令我反感…
禿頭佬個問題搞掂左…
但Wendy個問題…就係…佢一切都好正常…除左仲係覺得自己有bb
由我同佢求婚開始…佢每一日…都問我bb改咩名好…
又話幾時去照下個bb
搞到我都唔知點
基本上…每日Wendy都會問我諗好bb個名未
有時Whatsapp…有時打電話比我…有時就見面問
初初聽到…我都唔知好嬲定好笑…
我會答佢…等知道男定女先諗啦
每次我咁講…佢就扁起個咀…發一發脾氣。
後來…我會慢慢諗d名出來…亦有用係高登上面睇到既名答佢
Wendy聽完…都會好認真咁諗…個名好唔好。
個刻，我覺得自己好幸福。
有一個女人，為左留住我，令到自己受苦。
我可以唔理佢咩？
可能…每個人係呢個世界，都有一d任務…或者要做既野
我每次望住佢…都會覺得…我依家既任務，就係陪住佢，等佢好番。
然後，我好想同Wendy，追番我地失去過既野。
我知道睇緊既巴打，
有讀緊書，要考公開試既後生仔；
有已經投身社會做緊野既巴打絲打。
無論如何，我覺得…你地都同我一樣，
唔多唔少，失去過一d人…一d機會…一d事
我曾經迷失過，失去過一d對我好重要既人同事。
但我知道…過左去就係過左去。
我依家要做既…係珍惜我擁有既人…同擁有既機會。
我從無諗過自己有機會讀完大學…有機會入大公司…有機會結婚…
曾幾何時，我做好過心理準備…成世人就係一個人過，老左…死左都無人知。
但今日，我擁有既野…好多…好多…多到我無法相信。
打呢個故事出來…無他…對我來講…係一次思考。
對大家來講…我希望係一個參考。
如果你依家有想追求既野…
無論係學業、工作、愛情、理想，
唔好猶豫！
唔好怕自己無左時間…無左金錢…無左青春
與其放棄之後，後悔一世…
不如努力去做，做唔到先後悔！
我應承大家，我會盡我既責任…好好照顧需要我既人
大家都要應承本專家，唔好放棄！
有機會既話，幾年之後，我可能會再講下我既野。
我希望到時，你你你你你…
無論cdrom又好，
lm又好，
回過post話自己有野追求緊都好，
返緊工無野做睇我篇文都好，
拜緊年出來追文又好。
專家約你，幾年後，我地再聚既話，
有機會講自己近況既話，
我地既人生，都係無怨無悔既。
即使唔係100%做岩決定，即使行錯過，無所謂。
你記住，有條Seven Head皮，洗過廁所既，都可以幸福。點解你唔得呢？
我希望第日見到你，我會答你：
「答案岩，我喜歡你的思路！」
《完》