《最重要的人，就坐在我身旁》: 第十二章:小小的夢想
第十二章:小小的夢想
在十六強的當天，剛好碰上情人節。
「我地已經十六強㗎喇，只要嬴多四場，我地就攞冠軍。」教練說：「未食野嘅而家快啲出去食啦，仲有一個鐘時間旅遊巴就送我地去球場。」
啦啦隊成員都會與球員坐同一架旅遊巴一起出發，所以全部人都是十時正回校集合。
「你地啲啦啦隊有冇料到㗎？」我拿著吹氣棒。
「緊係有啦，唔洗擔心喎，出去食野先啦，冇乜時間喇。」愛晴放低打氣工具。
「喂阿鋒行啦，做咩呆咗係度，心不在焉咁嘅...得你一個前鋒咋，唔好諗咁多野啦。」歐佬推著我行。
我們並肩而行，本以為我們三個一起去食，期間有位啦啦隊隊員都與我們一起同行，這很正常沒什麼特別，但再行多一會，她與歐佬的互動變得親密起來。
「喂歐佬，新女喎。」我看他們兩個行為愈來愈親密：「幾時嘅事呀？」
「唔好嘈，阿鋒幫我求其搵兩個一樣嘅餐。」歐佬說跟他女朋友說：「去搵位囉BB豬。」
「...記得搵埋我地兩個位呀。」我說。
「似乎佢地已經行埋咗一齊喎。」愛晴在看餐牌。
「咁就大獲啦...我之前同佢講過話佢溝到女嘅話，我要切柒。」我嚇了一嚇。
「你傻㗎？」愛晴按著肚子大笑。
早餐到來的時間，歐佬和他的女朋友十分甜密地進餐，完全沒有理會我和愛晴的存在。
看到他們兩人十分肉麻，真想拆散他們，令人妒嫉。
「食快啲啦傻佬，見到佢地兩個你一啖，我一口都火滾。」愛晴打一下我大腿。
「喂歐佬，我地兩個返去集合先，你唔好同我搞到腳軟就得。」我說。
我與愛晴一起行回校集合，等待旅遊巴的接送。
「洗唔洗叫埋你女神幫你打氣呀？」愛晴問我：「一早就見你心不在焉咁，一睇就知你想叫女神睇你啦。」
「千其唔好，有你地啦啦隊就夠啦，廢事煩到佢。」我又被她識穿了：「其實你係唔係識讀心術啫，不如你去讀心理學啦，有前途呀。」
「同你識咗咁耐...緊係了解你喇。」愛晴拿著墨鏡幫我戴上：「俾你試下戴黑超，唔好行住先啦。」
「哇，好型呀喂，影張相先啦。」愛晴拿出手機和我一起影相。
「真係幾型嘅，加上我本身又靚仔。」我看一看照片。
「咁自戀㗎你，如果你嬴到冠軍嘅話，送俾你又點話。」
「嗱...你話㗎，唔好反口呀。」我與她勾手指尾。
早上十時正，接我們去球場的旅遊巴已經到了，我們逐一上去，這場景十分熱血，又戴著墨鏡，真的好像球星一樣。
幸好歐佬都準時到達集合地點，教練點完人數後，就最後上車。
正當我想行到旅遊巴的後排座位時，卻被愛晴阻止了。
「喂傻佬仲行，坐呢度啦，唔想坐咁後呀。」她推我入坐位上。
「俾我坐入面啦，我想望風景呀。」愛晴十分渴望。
「咁多要求㗎...仲成日叫我傻佬。」我發覺她在這個月經常叫我做傻佬。
「吹咩傻佬。」
她偶爾真的很小學雞，不過這樣都好，不用經常被她打。
如果女神都有出席幫我打氣的話，我會更開心，但我不想開口問她，因為我怕會浪費了她的時間，而且她升到中五後，女神經常溫書在學業上發奮，我都不找她幫我溫習。
為了可以有最佳狀態下比賽，我就趁這段時間睡一會兒。
「好啦...已經到咗目的地，起身喇喂。」教練大叫。
我一醒來，就發覺自己睡在愛晴的肩膊上，又可能要被她打了。
「醒咗喇？頭先已經影咗你相啦，咁鍾意抽我水。」
「吓！？係抽都唔抽你啦。」
我們一眾球員十四個行到更衣室更衣，再與教練一起討論最後作戰準備。
「阿鋒你照舊打單箭頭，唔好行太後，小心越位就得。」
「中場你地五個一有波就傳，唔好帶得太快，最好猜散對面隊，幫多啲矮鋒手，同埋一有機會就俾直線。」
「後防一定要守緊啲，左右閘可以推前少少，中堅你地兩個守住最後。」
「歐佬俾個重任你，今場俾隊長你做，臨場變動好重要，一出問題歐佬你指揮佢地，唔好令隊友俾敵方控住。」
「出去熱身拉筋先，今年係你地最後一年學界，一定要嬴，收唔收到！？」
「收到。」我們大聲叫。
出到球場熱身時，看到看台上的啦啦隊都開始掛上橫額，足球啦啦隊比起籃球啦啦隊規模細得多，可能籃球隊有又高又大又帥的球員關係，真可惜，不能看到女神幫我打氣。
看來兩隊都已經準備好了，到了比賽時間終於要開始了，歐佬就到中場握手，首先我們拿到開球權。
哨子聲響起了，我將球傳到後場，待隊員們組織一下再帶上來，我眼看敵隊的後防都沒有我想像的強，中等身材，希望能夠順利突破吧。
開場頭十五分鐘，控球權都在我方，試好對方的實力後，我們開始慢慢推上前進攻。
「鋒，睇波。」我接應中場的球後便帶球上前。
幸好我速度本來都不太慢，很快地到了禁區位置，前方有一個後衛守著，我選擇傳球給隊友，而隊友都能成功配合，很順利地撞牆，突破了後衛我再推前一步，順腳就射球，當然是入了，我到看台下慶祝。
「好波呀阿鋒，返到去打少啲你。」愛晴大叫著。
因為我們打得太前的關係，突然被一個反擊令我們緊急回防，幸好後場有歐佬指揮守著，他們連起腳的機會都沒有。
他們嘗試將中場推前一些，完半場前我更接獲中場的直線傳球，令我有一個單刀機會，用假動作欺騙了最後一個後衛，射入了學界的第二球。
半場我方領先二比零。看來很大機會會勝出。
到了下半場，我們的戰術依舊一樣，可以清楚看得出敵隊開始進攻起來，我們失了一球，眼看對方的體力漸漸下降，我們就一直攻上前，到了最尾的五分鐘，我再入多一球。
「嗶！嗶！」完場的哨子聲響起了。
結果以三比一勝出，順利進入八強。
「大家今場發揮得好好，照數據嚟睇，阿鋒你暫時係神射手第一位。」教練拍一下我的頭。
「咁請我地食飯啦，教練。」
「大家都知今日咩日子啦，我有要事在身，下次先請。」
「屌...你忍心留低我地呢班小毒撚係度咩？」
「走先下次見，今日就係咁多，解散。」教練像火箭沖回家：「遲啲再慶祝，拜拜。」
唉，今年的情人節又是要自己一個，阿飛今天一定很忙。
「喂歐佬，你陣間冇野做㗎啦？」我說。
「唔好意思呀，鋒鋒，今日陪唔到你。」歐佬對著啦啦隊的女朋友說：「行喇我地。」
世界真是陰暗，死黨們都已經有女朋友，我還是獨自歸家吃即食麵吧。
「喂傻佬，咪走住。」剛換好衫的愛晴叫我：「睇你個死樣陣間都冇街去㗎啦，洗唔洗姐姐陪下你呀？」
「咁好死呀，冇約其他仔咩。」
「咪約你囉而家。」她又踢了我一下。
「喂今次咁大力㗎，啱啱先踢完波，好痛呀，返去放低野換衫先喇，而家三點都未到。」我與愛晴一起搭巴士回家。
不知道女神今天有沒有人約呢？如果有的話，我很想知道他會是誰。
由於剛才踢完波的關係，我上到巴士上層，找了位坐後，很快就睡在巴士上，車程大約一小時。
「喂，到總站啦起身喇，你啲口水流哂我膊頭度喇。」愛晴說：「訓得咁甜...一定好舒服啦！今晚請我食飯當和數呀！」
這次仆街了，又睡在她肩膊上，今次還留了口水。
「我都唔想㗎，你又唔叫醒我，唉是但啦。」
回到家後，再睡一會兒，然後再整理一下自己，就到鐘出去了。
手機響起來，看來愛晴催促我，我看一看螢幕原來是女神打給我。
「喂？」我接聽了電話。
「一陣間有冇人約你呀，好悶呀。」
女神竟然在情人節約我，難道這是唯一的進展機會嗎？但她已經拒絕了我，不過現在女神主動約我，我沒有理由拒絕，又或是我還愛著她，我都不清楚。
我想了一想，但我已經約了愛晴，真的要放她飛機嗎？這樣就會令她很傷心，不過她應該會體諒我的處境吧。
「喂阿鋒聽唔聽到。」女神問我。
「好呀，反正我陣間冇野做。」我回答。
「咁而家巴士站等啦，拜拜。」聽得出女神的聲線有點高興。
我立即Whatsapp愛晴。
黃耀鋒：「喂靚女，對唔住呀，我女神突然約我出街，我冇拒絕佢...最多下次同你食返餐飯啦。」
黃愛晴：「咁...好啦，你地玩得開心啲。」
女神穿著一身性感的打扮，短牛仔褲加白色T恤，特顯了她的身材，可以與女神共渡情人節，短幾年命也可以，與她並行時，更嗅到她的體香和清香的頭髮，果然是愛晴的相反。
「去邊好呀，阿鋒有咩好介紹。」女神問我。
「金鐘有玫瑰燈海園睇喎。」
「哦，有好多白玫瑰燈嗰個？」
「係呀，不過要快啲佢喎，一定勁多人排隊。」
在搭地鐵期間，我發覺有很多途人望著我們，被眾人妒嫉的感覺，令我心中自喜，可能是因為女神太美麗，好像令我配不上她，與女神行街的感覺真的很開心。
「喂，不如唔好去住先啦，我想影貼紙相呀，陪我影呀。」她拉著我的手。
貼紙相我一生人都沒有影過，因為我覺得實在不是男生的玩意，不過難得女神拉我去，我沒有理由拒絕，我甜笑了出來。
「緊係冇問題喇，你帶我行，我一次都未影過。」我笑著。
感覺就像成功追到女神一樣，雖然我現在都不太清楚她的想法，又或是她只是想跟我出街玩，因為她之前已經表明做回好朋友的關係，她應該沒有其他意思吧...到底她對好朋友的定義是什麼？可能我想多了，但我會珍惜與她相處時間。
原來影一次貼紙相需要六十元，這張相真的要好好保存。
「三二一之後，擺個Pose，咁就得㗎啦，當係平時嗰啲影證件相機。」女神教我。
女神從我後面雙手拉住我兩邊的面頰，令我笑容加倍，我就擺出一個無奈眼神，舉著勝利手勢，這個接觸有點溫馨，也令我怕羞起來，面都紅了。
能夠有屬於女神與我的貼紙相，用多一些金錢也值得。
「你好熱咩，張相影到你塊面好紅，而家都係，不過又幾可愛喎。」女神笑著。
「少少啦...未至於熱嘅。」
「而家去睇白玫瑰啦，到你帶我去喇。」
「好呀，唔好走失呀，嗰度好多人。」我牽著她的手，希望她不會鬆開手吧。
「有你睇住我，唔會有事嘅。」她並沒有鬆手。
這一次牽女神的手特別不同，上次是因為用一些『屎撟』，今次是光明正大地牽。
她的手掌很滑，而且很溫暖，要是她的手幫我打飛機，我都已經想像不到這種爽，這時我下體開始有反應了，腳步開始緩慢，誰叫我幻想得瘋狂。我又不禁笑起來。
「你又笑咩呀？聽人講通常啲男仔無啦啦笑即係諗緊啲衰野。」女神說：「冇見你咁耐，變得咁衰㗎。」
「我冇呀，只係諗起啲白痴野咋。」我笑得有點尷尬：「頂，都唔知你係邊度學返嚟。」
我一直拖著女神的手，直到了玫瑰燈海園。
「哇，呢度真係好多人喎。」女神說。
「冇計啦，對對情侶都嚟呢度。」我望著四周，只看到一片人海。
「行去一個靚位影相啦，跟我過嚟。」女神又捉著我的手。
不知道為什麼每次牽著她的手，我都覺得很幸福，很像一個家庭般溫暖，大概是因為我愛過她吧，在我心中佔了一個很重要的位置。
不過我很清楚知道，我們一定不能成為情侶。
「就呢度啦，仲望咩呀，快啲攞部手機出嚟影相啦。」女神說。
「我影？我好少影相㗎喎。」
「我教你咪得囉，你之前都教過我射箭㗎。」
我拿著手機出來影相，一當我影相時，她就會捉住我的手放在更好的方向。
「啲花係下面㗎，緊係由高影落嚟啦，你係我地嘅水平線影，點影到啲花呀，要咁樣先得㗎。」她捉住我的手向上移。
「咁樣咪幾好，Send俾我啦，俾我放上Facebook呃下Like。」
「好呀，不如行多陣去食野啦，我有小小肚餓。」我提議。
「嗯。」女神望著手機，準備將相放上Facebook。
相片好快就上傳完成了，我立刻就打開手機，她一放上去不到十秒，就有很多個讚，不過我好奇看看她寫的標題是什麼。
『情人節都冇人約，又唔敢約男神同我出去，唯有約最好嘅朋友出去玩啦。』
最好的朋友...
其實都不太意外，畢竟收了好人卡後，感情都依然能維持。
「雖然我地唔係情侶，不過我想食個情侶套餐呀。」女神說。
「冇問題呀，我地可以用朋友嘅身份食㗎。」其實我有點心酸：「我學界足球踢入咗八強，遲啲嚟唔嚟睇呀？」
「應該都唔會嚟，球類對我嚟講好悶，溫書仲好喇。」
「都係嘅，學業重要啲。」
我們進餐後，就一起回家。
「多謝你今日陪我，其實你唔想知我鍾意嘅男神係邊個咩？」
「唔想，知咗都冇用啦。」
「咁好啦，下次見啦。」
這天過後，我們一直都沒有約對方，只是在學校見到時，打個招呼，說個再見。
學校運動會就來到了，我看一看手冊，日期是踢完學界足球四強之後的一星期，希望能夠在八強勝出吧。
運動會報名表發了出來，我決定參加男甲四百米和男甲一千五百米，因為這兩項是我的專長。