【好想同你講下野】一隻厹的日記: 1

「喂過黎呀，我好想攬住你。」 


「做咩今日咁熱情？」 


「其實你真係好好攬，好舒服。」 


「我可以畀你攬一世架。」 




我叫阿波，最鍾意係跑步，最鍾意嘅電影係導盲犬小Q，最鍾意嘅人係阿澄。 


阿澄對眼好靚，水汪汪亮晶晶，閃亮到好似天上嘅明星。佢有一把好柔順嘅秀髮，好好聽嘅聲音。 


佢好鍾意攬住我，我都好鍾意畀佢攬住，因為佢對手好舒服，好綿柔。每當佢抱住我，我就會聞到佢身上嘅香味，一陣好芬芳馥郁嘅香氣，好似一種花，但我唔知係邊種花，唯佢獨有嘅氣味。 




我每次都會沉醉咗係佢懷抱上面。 


我好鍾意阿澄，佢總係會陪我去跑步。 


即使返到屋企，佢好攰，但只要佢問：「你係咪好想去跑步呀？」而我答：「係。」 




佢都會陪我去跑步，陪我跑到我無哂力先收手，因為佢話佢好鍾意睇到我做自己鍾意做嘅野個樣。 


「呢個時候嘅你係最迷人。」佢咁講。 


佢成日都會用佢塊臉貼住我塊臉，然後話：「阿波，我好鍾意你。」 


我都好鍾意阿澄，好想陪佢陪一世，我發現唔可以無咗佢咁過生活。 


其實我一直都好想親口同佢講架。 




但有啲阻礙。 


呢個阻礙由唔知邊個發明。 


因為唔知邊個，將呢個世界好多嘅野都分咗類， 


將阿澄佢地分做人類， 


將我地分咗叫 






Canis lupus familiaris 






即係俗稱嘅狗。 








「喂過黎呀，我好想攬住你。」 


「汪汪汪。」 


「其實你真係好好攬，好舒服。」 


「汪汪汪汪。」