第一次去到阿澄屋企,我發現佢爸爸其實唔太鍾意狗。 


「阿澄,妳真係買咗返黎呀?」 


「唉,我寧願你養貓,貓夠馴,唔會亂咁走。」媽媽加口,明明岩岩都無講呢啲。 


一開始就黎個唔歡迎嘅態度,佢地仲用個好鄙視嘅眼神望我。 




阿澄爸爸係一個四十幾歲嘅中年男人,永遠戴住一副老花眼鏡,佢走過黎好仔細咁打量一下我,然後皺眉問:「呢隻咩黎架?」 


「呢隻係柴犬呀爸爸。」 


「柴犬?」 




「我都係覺得貓得意啲。」媽咪插把口。 


「唔係呀,佢好得意,我好鍾意佢。」阿澄抱得我更緊,將塊臉都貼埋過黎,真係好溫暖。 


佢無幾耐就帶咗我入房,阿澄間房係全粉紅色,有一陣佢嘅香氣,仲有好多公仔,不過我都係唔識,除咗多啦A夢。 




「喂,狗狗,我幫你沖完涼,你就可以同我上床訓啦。」佢好開心咁同我講。 


「呀係,我仲未幫你改名啵!」 


佢諗咗陣然後話:「不如叫旺財?我見電視啲狗通常都係咁叫。」 


「旺財?好老土。我唔太想。」我說。 


「做咩?你都好鍾意?」 




「唔係呀!唔係呀!」 


「哈哈哈,咁就叫你旺財啦。」 


我馬上成個狗生都灰哂,無諗過我第一個名係咁out。 


「呀,都係唔好,叫你阿波啦,你成個波咁樣。」 


阿波?呢個名好似都唔錯啵! 




我嘅人生,啊唔係,狗生充滿返希望。 






阿波,阿澄。