Diana其實都無乜野,只係被人寵慣咗嘅狗啫。 


即係好似啲公主咁,嬌生慣養,屋企個個都鍾意佢,佢都享受慣。 


只係我唔鍾意。 


結果被佢搞咗我勁耐。 




「你有無聽過人類有句:『有食唔食,罪大惡極。』」佢好嬲咁問我。 


「我咪講咗,我唔食肉架。」 


之後佢鬧我和尚狗。 




和尚狗?痴線呢個到底係咩名黎。

不過咁,如果作為一個朋友,其實佢都算唔錯......如果只係朋友嘅話。 



「喂!到底你主人有咩咁好啫?」 




「佢好溫柔善良體貼愛心......」我不停係度balabala,佢終於頂唔順叫停我。 


「哼,我會令你後悔架。」 


去到阿澄返返黎香港之後,我終於脫難,就好似終於坐完監咁。 


最終我都守到我嘅貞節。 


「阿波!」阿澄離遠一見到我已經大叫我個名,然後衝埋黎攬住我。 




「有無掛住我呀?」 


「當然有啦。」 


「我好掛住你呀。知唔知我係日本掛死你。」佢好似好開心咁,仲錫咗我一啖。 


呢次應該係阿澄第一次錫我。 


佢帶咗我返屋企之後,講咗好多係日本嘅野。例如東京好多野買,好多大叔會飲醉酒,啲舖頭又會收得好早,唔似香港咁,越講越開心。 




「不過我都有買手信畀你架。」佢由一個袋裡面拎咗一件狗裝嘅衫,著咗好似人類嘅西裝咁。 


「哈哈,你著咗之後幾型呀。」 


其實,我真係唔鍾意著衫,好不倫不類。不過阿澄鍾意,著下都無妨。 


「呢袋係畀同學嘅。呢袋係畀親戚嘅。」阿澄一路數住佢啲手信。 


不過我發現佢仲有一袋無數到。 




「咁呢袋呢?」我問。 


但阿澄無講到畀我聽。