【好想同你講下野】一隻厹的日記: 24

好似話狗其實最原本係為咗守門口而存在。 


因為古時嘅治安並唔係而家咁好，所以唯有有一個狗肉鬧鐘係度，提醒人有賊入侵。 


不過去到而家，好似都唔需要我地咁樣。 


養狗嘅意義到底係邊？ 




原來我都無諗過，究竟點解阿澄要養我。 


係因為街度見到我所以養我？ 


唔會架，到底養我係為咗咩呢？ 




可能佢本身想養狗，又咁岩先揀岩我啫。 


又唔係，話排哩一帶治安不嬲麻麻，可能阿澄買我返黎真係想我看門口。 


諗起都覺得白痴。
又或者係幫爸爸揼骨。 





爸爸照樣係好醉咁返到黎。 


一返到黎就亂叫，然後訓門口，再爬到去梳化。 


不過，其實爸爸身上除咗酒味，仲有一陣味。 


就係我上次話好奇怪嘅味。 


或者人類唔太覺，但我地對哩方面好敏感，爸爸嘅身上，除咗有酒味，仲有一陣味，唔屬於哩個屋企嘅任何人。 





一陣，香水味。好微好微，但的的確確存在。 



因為媽媽唔會用哩種香水，阿澄都唔會用香水。（佢有獨特香氣）
剩返嘅..... 



其實哩種情況，係咪就係人類所講嘅背叛？ 




爸爸背叛咗媽媽？ 



我記得阿澄講過，結婚係人生裡面一件大事，因為代表住對另一個人許下一生一世嘅承諾，要照顧同對佢不離不棄－－無論咩情況。 



我成日都覺得哩件係人類少數做得好嘅事，一生一世對一個人負責啵。 


幾咁浪漫，幾咁難，就係浪漫在好難仍然做嘛。 


雖然狗無結婚制度，但狗都有老婆仔女，其實，有時都幾羨慕人類哩種制度，邊個唔想有隻人可以陪自己一世。 




無奈，總係會唔知足。 


所以我有啲憎爸爸。 


雖然，哩啲都係我估計啫，不過狗嘅直覺好準。 


爸爸都好有可能係對媽媽唔住。 





但咁樣又點？我可以做啲咩？ 


我最擔心，係阿澄嘅心情會點。 















究竟點解唔可以對另一半忠心？