【好想同你講下野】一隻厹的日記: 28

「阿波，我地去跑步啦！」 


哩排阿澄好似好返好多，個人都有返精神，唔似之前咁受好大打擊，雙眼都叫有返神彩。 


落到公園，阿澄好似十年無做過運動咁，跑得勁快，同我一樣咁快，而且佢平時跑四個圈左右就無氣，今日跑咗足足七個圈。 


跑到我都差啲斷氣。 




出咗一身汗，佢好似更開心。 


所以話，唔開心做下運動都係一個唔錯嘅選擇黎。 


「阿波，你係咪跑得好攰呀？」 




「係呀。」 


「咁就好。」佢笑一笑話。 


唔知點解，我覺得經過哩排，阿澄好似聽得明我講野咁。




好多時，我講啲野，佢都好似知道我講嘅意思咁。 


好似上次咁，我去安慰佢，同佢打下氣，講鼓勵佢嘅說話，佢就同我講：「多謝你呀阿波。」 


唔知係我多心定係乜野，諗多咗？ 


我地跑完之後，坐係公園嘅長櫈嗰度，天色好黑，月色皎潔，街燈暗黃，樹葉就係咁擺下擺下咁。 


阿澄坐低係度用毛巾抺汗，我就去咗小一小解。 




當我返黎之後，阿澄問我一條問題。 


「點解你地屙尿要抬起隻腳嘅？」 


雖然我讀得書少，但起碼哩個都知道，我開始講：


「話說好耐好耐以前，二郎神有兩隻狗，一隻公，一隻毑。 


有一日，神仙開會，二郎神就帶住兩隻狗去。 




咁狗唔准入場都好正常啫，佢地兩個係南天門處等。 


會開咗好耐都未結束，狗毑突然急水，想搵個地方去廁所，睇呀睇，天上一片開闊，得南天門隔離一棵樹可以考慮，於是立即去解決。 


屙緊時，畀南天門看門嘅神仙發現，神仙大怒，大吼一聲：「689，膽敢係度屙尿！」 


只見一道閃電，「轟」一聲，樹被劈到，狗毑被結結實實咁砸咗係下面，死咗。 


哩一件事，畀狗公完全睇到哂。從始以後，狗公要屙尿，就用一隻腳翹起，撐著樹，驚砸死自己。」 




我一路講，阿澄一路好認真咁望住我，好似一個聽緊故事嘅小女孩，好專心，好好奇咁聆聽。 


直到我講完之後，阿澄用佢好精靈嘅眼睛望住我話：「哈哈哈哈，好搞笑呀阿波你。」 


然後企起身，伸一伸懶腰，再同我講：「好彩有你啫。」 


雖然我知道我唔會令佢完全開心返...... 


不過...... 









不過，今晚個月色好靚，好靚。