《搵唔到Exit既23層大廈》－驚嚇！香港都市詭異紀錄: 第六十話：《三重噩夢》

 
      「哇我屌啊。」

      這已經是阿毛五分鐘內第十數次從口中吐出這句氾濫的髒話。

      我終於把所謂的「夢境」敘述完畢，從醒來到14樓的詭異事件都一併交代，眾人不禁詫異的低呼一聲。

      他們固然無法體會到，真實面對如此詭異，受到的衝擊是何之嚴峻及刻骨銘心。

      電筒的光線照亮了儲物房狹小的空間，灰貓朗朗在一旁乖乖的舔著後腿。





      當然，我並沒有把Ashley張開怪獸般的巨口的部分說出來，我只是一直心有餘悸的偷窺著這咬著下唇的睡衣女孩，留意著她的神緒變化。

      然而，Ashley只是偶爾露出訝異的神情，只是一聲不吭，似乎沒有異樣，完全沒有知情的蛛絲馬跡。

      長了天使面孔的魔鬼，最難應付……

      「即係……有14樓？」Ashley終於吭聲，四周環視著，一副坐立不安的模樣。

      大家陷入沉默的寂靜氛圍。





      「呢度根鳩本係冇14樓……」阿毛勉強的乾笑著。

      沒錯，我剛才已經檢查過了，13樓的上一層是15樓沒錯。

      「等等先，你好肯定你聽到係呢首歌？」Toby把顯示著Jumping Out the Window歌詞的手機屏幕向我遞來，我毫不猶疑的點著頭。

      Toby皺起眉頭，從口袋裏掏出了一條芝士腸，重新按下「播放」的按鈕，輕快的饒舌音樂在這個時刻顯得煩躁以及詭異。

      良久，待歌曲快要播放完畢，Ashley揉了揉眼睛：「會唔會……阿騰個夢係有D implication？」





      怎麼了，你現在想進行解夢嗎？

      還在裝傻……然而，清醒的我絕對瞭解到已經無法靠一己之力趕走這個人。連Mktor也無法對付的女人，功架絕對超群絕倫。

      而且……我對她的印象已經來到了一個不能更複雜的地步，她實在太過神秘莫測了。

      眾人把目光焦點轉移到她的身上，她尷尬的撫摸著臉蛋：「例如……例如跳出窗口可能係一個救贖既方法……我唔肯定，不過好似歌詞咁講，跳出窗口係自我幫助既行為……我唔知道夢有冇實質意義呢樣野……但係係有呢個機會。」

      跳窗逃生？真的可以嗎？

      「屌，你唔Q記得咗Mktor係點死架喇？」阿毛苦笑著，好幾條頭髮被他抓斷了。

      大家再次靜默了下來，回想著Mktor當時跳窗的情況。





      Mktor從1樓下的後樓梯通風窗跳下，接下來便發出了淒厲的喊叫聲。

      儘管我們沒辦法斷定那喊叫是來自Mktor的，然而若果不是來自他，又會來自誰呢？

      從那喊叫聲可以判斷，Mktor應該是遇到了致命的危險。由於這棟大廈樓底不高，在該位置跳躍，應該不會受很大的傷害。

      因此，可以猜測Mktor是遇到了另外一些危險，至於是什麼我們則無從知曉。

      「或者……14樓同後樓梯既窗係唔同？」Ashley緊張的拉扯著身上的黃色連身裙，衣服早已沾滿了污血。

      「係wo……」阿毛霍然的一本正經起來，「會唔會……後樓梯既窗通往既係災難，而電梯大堂……14樓電梯大堂通往既，係呢棟大廈既Exit？」

      我思度著。

      「阿騰。」





      我凝望著Toby，思緒雜亂如荒草。

      「你係咪肯定係呢首歌？」

      「肯肯定。」

      「其實，你講果段14樓既記憶，其實我可以嘗試解釋一下。」

      我也很希望有人能夠為我釋除植根心中的畏懼……

      「你以前有冇聽過呢首英文Rap歌先？」

      「冇……」我猛地搖頭，「肯定冇。咁先令到我咁驚……我根本就冇聽過首歌，如果聽過仲可以話係我長期記憶係潛意識中出鳩咗嚟姐。」





      「阿騰，唔好講粗口。」Toby如家姐一樣拍打著我的大腿，我感到了一陣昏眩，「阿騰啊，夢中出現既野，除咗潛意識既內容之外，仲有受到睡眠周圍既環境影響架。」

      「我好似聽鳩過……Sor鳩唔講……Sor唔講粗口，」阿毛向著鼓著臉蛋的Toby裝了個笑臉，「我聽過一個講法，係局促既環境係容易發惡夢。」

      「類似啦，Anyway，我想講既係，若果阿騰你發夢聽到呢首歌係一D都唔出奇。」Toby淡然一笑，我卻立刻作出反駁：「但係，問題係我係個記憶入面係狂聽首歌wo。」

      每當憶起那些詭異的歌詞，每一個單詞均引人心寒。

      「呢個就係我發現到件事既原因，」Toby莞爾一笑，卻作出了精密的推敲，「因為我當時都係狂播首歌。」

      「播咗幾多次？」

      「至少幾次。」

      眾人包括我也不聲不吭，等待著短髮少女的推論。她把吃完的芝士腸膠套丟在地上，拭抹著櫻桃小嘴：「凡事都唔能夠講絕對，我地只可以相信probability。呢個夢，實在好難說服到我係一個真實既體驗，即係好似阿騰你擔心既，呢個係預言，或者真實發生過既事情，因為唔知咩怪異超現實既原因，時光倒流。」





      我心中訝異無比，Toby竟然說穿了我的憂慮。

      「作為一個機率主義者，我實在無法完全杜絕你既擔憂，不過我好相信係一個夢嚟。若果係我冇播過呢首歌既情況下，你又唔識呢首歌既情況下，你都會係『夢』度聽到呢首歌，而且岩岩聽你仲唱到出嚟，咁其實你真係有詭異經歷既機率係好高。不過，若果我係你仲訓緊果時，係不斷咁播呢首歌。」

      我不住的點頭，Toby的推測全都說進了我的心底裏。

      「首先，我播呢首歌同一時間你又發夢聽到呢首歌，個情況實在係太罕見，個機率可能係講緊萬分之一，話說呢首歌都唔係我favourite，我真係咁岩聽下。」Toby的手勢呼喚著小貓，「萬分之一都會發生既，好難令人信服，更何況係你夢境中歌曲係不斷播放，而係現實中我都係不斷播放歌曲，呢個重疊個機率可能係一億分之一Only。所以，我完全唔覺得會係真實體驗，相反只係夢。」

      「但係，咁一億分之一，都唔可以杜絕架嘛。」阿毛隨口反駁。

      「唔係杜絕，問題係，宜家唔通寧願相信一億分之一既機率，都唔相信另外一億分之九千九百九十九既機率？更何況，有科學研究顯示，發夢既內容係會受外在環境所影響既。唔好講到咁academic先，講下日常生活啦，我個親戚就試過發夢比人淋鏹水，事實上就係訓係隔離個女賴尿賴濕咗張床。」

      說起這個，我倒甚覺有共鳴，小時候有一次發夢正在踢球時，灰濛濛的天空猝然傳來女人的吵鬧聲，事實上只是現實中的母親嘗試叫醒我早起上課。

      Toby撫摸著捲縮著的朗朗：「若果大家同意呢個推測既話，咁真實體驗根本難以成立，因為阿騰你所描述既經歷裏面，Jumping Out the Window呢個情節係好重要，不可能抹去，若果冇咗成個經歷就唔完整，所以我想講既係，呢個經歷好可能係夢境。」

      Toby精辟獨到的見解，震撼了在場的每一個同伴。

      這女孩，就像是一個解謎高手一樣。

      就像……情感豐富，不撥動左手無名指的Mktor。

      「好，非常好，即係係惡夢Only啦，即係冇事啦，完。」阿毛鬆了一大口氣，彷彿從夢魘中得到解脫。

      「但係，Ashley同埋阿毛，你地有冇發過惡夢？」Toby鼓起了臉蛋。

      Ashley搖頭，阿毛疾速回應：「訓咁……L……少，仲要發惡夢，個天未免太殘忍喇。」

      「你講到個天宜家仲未夠殘忍咁既。」我苦笑著，臉上透露著無可奈何。

      「Exactly，我都冇發過惡夢啊呢幾日。」Toby咬開了芝士腸的膠套，「但係阿騰你呢……」

      「我做咩？」

      「你同我講過，自從發生事故之後，你發咗三次惡夢。」Toby咬了一口芝士腸，「你訓咗幾多次？」

      我呆了一呆，數了一數，其實我才睡了不過三次……第一次被Mktor叫醒，第二次在儲物房被火警鐘吵醒，第三次，則是最近一次的睡眠。

      只是睡了三次，便發了三次的惡夢……

      一個人發惡夢的次數可以如此頻密嗎？

      「阿騰，」Toby按著我的手臂，「你岩岩講個夢境好似有D唔完整wo。」

      我抬頭凝望著短髮女孩，她又道：「因為夢裏面，你冇講到Ashley，定係個夢根本冇Ashley？」

      一個心思細密、記憶力驚人的女孩，程度絕對不下於推理怪物Mktor。

      我忖度著，若果眼前的女孩能夠釋除我的疑惑，或許坦然相對是最好的處事方式。

      「Ashley……係14樓大堂……行出嚟……然後口裏面有個窿……好似想襲擊我……」

      儘管我的言辭隱晦非常，還是使得Ashley花容失色，喊叫著：「點解會咁啊，好恐怖……」

      我置她於不顧，事實上心中劇烈交戰中。

      Toby說那只是夢境，我亦不多不少被她的言論所說服了，然而Ashley詭異莫測的形象一早牢牢植根於心中。

      我總覺得她只是一直裝扮著弱小的角色。

      「阿騰，你以前係咪成日發惡夢？」Toby緊閉起眼睛，靜待我的回應。

      「嗯？唔係……」我回眸著過去，「你講起，我以前真係唔會半夜驚醒。」

      「但係你呢三日，係訓三次，發惡夢三次，」Toby擦擦鼻子，「當然可以用一句精神壓力大解釋，然而我地其他人都冇事，而你以前都冇咩發惡夢顯示咗，你一向都唔係一個壓力太大、Capacity好小既人，若果係咁，事情真係有D唔對路。」

      「呢三次發夢既內容，你都同我講過，所以容許我整理一下，第一個係……你跌咗落個井，然後同伴置之不顧，離棄咗你？」

      我回想著，Toby的記憶力實在驚人，我只是約略提及過一次，她亦能牢牢記住。

      「第二次，你比人係好高既地方推咗落去？」

      我默默點頭。

      「第三次……你話Ashley襲擊你？」

      我「嗯」了一聲，不敢直視張口結舌的Ashley，生怕這時候她的嘴裏生出一個血洞。

      阿毛苦笑著：「屌，個個都係你被人玩鳩既……」

      一言驚醒洛克人。

      「唔好講粗──」

      我截停了Toby，嘗試捕捉理性的軌道。

      若果Mktor同時在這裏便好了，他跟Toby的協作，或許等同諸葛孔明跟司馬懿共謀天下。

   不過，逃出這裏，會比奪得天下容易嗎？

   「三個夢……都係講比人玩鳩……」我若有所思的凝視著一臉不解的阿毛。

      「嗯……」Toby翹起了白滑的雙腿，「你以前有冇發過一D……比人玩或者背叛既夢？」

      背叛……

      我猶疑的搖著頭，記憶中是沒有。我對背叛如斯敏感，若果有發過關於被背叛的噩夢，在記憶空間必定留下深深的血痕。

      「會唔會係呢度既環境……影響到？」Ashley終於又開口，事實上她的話不無道理，因為始終已經有很多人在這棟大廈失常了。

      「我估你指既係所謂既失常？呢個我同阿騰傾過。」Toby捲曲著秀髮，「根據之前我地對失常感染者既觀察，係呢棟大廈，失常既導致因素就係身上有流血既傷口。呢個，Mktor，即係你地個friend，都有指出到。」

      這個，算是一個頗為毋庸置疑的推論了，因為解釋了為何有些人失常，有些人則維持理智的舉動與思想。

      「而失常之後，感染者就會精神異常，然後好似出現妄想既症狀。」

      Toby指的，想必是我們曾經提及過的Jerry bro及Kenneth胡言亂語，那絕對是妄想症的一大病徵。

      「但係，阿騰宜家身上應該冇傷口，所以應該冇失常。另外一樣野係，就算阿騰身上真係有傷口，感染咗，點解剩係發夢既時候會出現妄想呢？醒咗之後又冇事？可能，係失常以外，有另一種方式，會影響人既夢境，不過呢個真係不得而知。」Toby終於把話說畢，輕輕笑著。

      我嘗試按隨Toby的思考模式，作出一個總結：「咁講法……重點就係，我好可能只係發噩夢，不過點解我會發噩夢係可能同埋某種環境因素有關，影響咗我睡眠既時候既……幻想方向？」

      「幻想方向，呢個字用得好accurate。」Toby哈哈笑起來。

      「咩係accurate？」我自問英文水平平庸。

      「抽象啊On9。」阿毛從旁輕蔑的嘲弄。

      「其實係精準既意思……」Toby的回答，使眾人也回復了沉默。

      乍聽之下，Toby的推論儘管不能說完美無瑕，然而極為合理。若果她的結論屬實，那麼至少有一點清晰不過：我真的只是發夢了。

      然而，總覺得14樓並非只是虛幻之談……

      儘管無從反駁Toby的精辟論述，一種異樣的感覺還是告訴著我，14樓就存在在大廈的某一個角落，而那就是一切問題的解決方法。

      「但係，始終傾咗咁耐，」Toby對著我苦笑，「都係唔知道點解你會連續發咁多個夢，都係噩夢，相似既噩夢。」

      如斯令人悚然的噩夢，實在聞所未聞。

      在這棟大廈裏，遇到的詭異事件數之不盡，然而最令人窒息的，莫過於短暫的休養生息途中，都會受到惡靈的侵襲。

      一日被困這棟大廈，二十四小時永無寧日，令人寒毛卓豎。