張彥琪既事,令我性格開始變得內向,變成一個怕事既死毒撚。係初中既時候,我基本上冇同過女同學講野。 

隨時間流逝,我開始忘記張彥琪,鍾意左第二個女仔。冇錯,我同所有毒撚一樣,心中都有一個女神。佢,就係黃曉玲,英文名叫Heidi。

 Heidi係我地form既女神,樣靚就不在話下,個條白滑長腿簡直就係世界級。唔單止咁,佢份人仲好nice。

 正如我頭先所講,我係初中甚少同女仔溝通。上到中四既時候,我揀左科好多女仔讀既健社,希望可以藉此脫毒。講真,成班二十幾條囡囡,計埋我得兩個男仔,有種女校男生既感覺。但如果你有睇過監獄學園既話,你就會知道毒撚,無論身邊有幾多女都唔關你事。 

相反,太多女只會令情況惡化。因為你身邊多左女仔,唔代表你會有勇氣同佢地溝通。一日毒撚,一世都係毒撚。 每次上堂最怕就係聽到miss話要分組,仲要五個人一組。屌你啦,邊撚度黎五個男比我啊?搞到我永遠都要睇下邊組唔夠人,就入邊組,仲要接收同組女性既厭惡眼神...總之就好辛酸啦。 





十月某一日上堂既時候,要做大project,個miss話要分組。當我祈禱緊唔好同豬西一組既時候,Heidi就好似天使一樣出現係我生命。  

「李同學啊,不如我同你一組丫?」Heidi主動行過黎我個位,問我。 

「好...好啊」 我知道,係我面前既依個女仔,唔係人黎,係跌落凡間既天使。

佢有一種好特別,好特別既氣質。我諗,依種就係所謂既「仙氣」。

 不過我諗諗下,發現唔對路。你諗下一個咁「仙氣」橫溢既女仔,點解會揾我依個兩年都唔出句聲既死毒撚呢?仲要叫我李同學咁做作...一定係有陰「毛」!仲要係好大汁既陰「毛」!我決定要試下佢先。





 「黃..黃同學啊...」屌,其實我都好做作。 

「係?」佢把聲真係好好j。

 唔得!唔可以比佢既外表呃到既。老子幾十年修行,冇咁易中計。

 「點解你會揾我一組既?」我鼓起勇氣問。 

Heidi笑一笑,望住我對眼:「你~估~下~」





 Oh FUCK!好靚啊!!!!!!!!!啊唔係,大膽妖孽,居然挑逗本王? 

「即...即係咩呢?」我再問。

 「冇啊,見你平時上堂都唔講野既。每次分組又自己一個,我又唔忍心見你咁,所以咪揾你囉~」佢話。

 聽完之後,我個心簡直係比佢融化左。原來佢咁留意我架...唔知佢係咪鍾意我呢?不過唔緊要,佢係咪鍾意我我唔知,但我可以同你講,我有少少鍾意左佢。

  媾女黎講,最緊要都係兩樣野,第一樣:靚仔。講到靚仔,唔好話我自戀,但我自問自己真係幾靚仔。咁多年黎,唔少女仔都因為我個樣而投懷送抱。但建基於我毒撚既性格,我都一一拒絕。 

第二樣黎講,就係自信。好聽就叫有自信,唔好聽就叫面皮厚,係我人生都不知見過幾多狗公死纏爛打媾到女神。如果你問我,邊樣重要啲,我一定揀後者。 

點解?其實好簡單,你望下條街上面,係咪拖住女既都係靚仔先?唔係架,邊撚度黎咁多靚仔型男丫。所以,睇緊依個故既你仲未有女,我建議你放膽啲去馬啦,你得既! 

「收皮啦你!講到咁撚威又唔見你媾人!」吳振威高舉佢中指。 





吳振威,花名叫on鳩威。係我中一識到依家既最佳損友。佢份人點?屌,識得我既都死毒撚黎架啦... 

「你都on鳩既,邊敢丫...」係佢面前,我成日爆粗。

 「垃撚圾!女都唔敢媾,算什麼男人啊?」 講佢就聲大大,其實佢咪又我一撚樣,唔敢媾女神。佢淨係係我面前先會扮哂威風,見到其他人就頭dup dup咁。

點都好,佢係我最好既兄弟。

 講時講,你唔好以為我真係唔敢媾Heidi。至少,我有嘗試過,只係...結果並不如意。

 正所謂「萬事起頭難」,我發現我好難同Heidi有接觸既機會。一黎大家唔同班,二黎我同佢又唔係好熟。莫講話要媾到佢,真係傾句計都難。所以我決定踏出我第一步,係樓梯口撞到要say hi! 

我同你講,依件絕對唔係易事黎,你想像唔到我當時要鼓起幾大勇氣先敢同佢講。





 「超,你咪到時又縮沙啊!」振威講。

 依一日既早晨,我準備好喇,我決定要豁、豁出去。過去幾日,我已經記低左佢返學既時間,我特登早少少返,諗住扮偶遇。 

我望望隻錶「7:45」,我feel到佢差唔黎喇。 

「7:46」,離遠見到Heidi既身影喇...咪住先,唔對路,佢隔離有friend既!?

 我一見到佢隔離有朋友,原本正諗住走人...點知,我諗起振威。 

「超,你咪到時又縮沙啊!」

 白痴!我堂堂一個男子漢點會縮沙!!!!我 要 證 明 比 振 威 睇 。

 我深呼吸一口氣,壯一壯膽。我轉身行近Heidi,佢發現到我,望住我笑,向我揮手。係喇,係時候喇。





 點撚知,我柒左。

 「早『身』」冇錯,我走左音。 

Heidi個friend「噗」一聲笑出黎,Heidi都用手摭住佢既笑容,我當場紅都面埋,乜都冇講就跑走左。

 「啊!!!!!!!點解啊!!!!!!!!!?點解我咁低能啊!!?」依一晚,我同振威哭訴。 

「冇事既冇事既,乖」振威拍一拍我。 雖然依條友成日串柒我,但每次我最失落既時候,都係得佢開解我。

依啲咪朋友囉。

 至此,我係中四再冇同過Heidi講野。雖然佢有試過揾我,但我都冇理過佢...唉,仲唔夠柒咩。





直至升上中五,我再次遇返佢,個個教我打丁既女仔。

 如果冇佢既話,我諗我當初一定媾唔到Heidi。
已有 0 人追稿