人渣誠自傳: 13
個一晚，我地約左夜晚九點係Neway門口等，我特登早少少出門口，廢事遲到。
點撚知，原來MK之間係有潛規則。
佢地班仆街唔單止唔會準時到，仲要遲好鬼多。
「Sorry啊，遲左少少。」等左半個幾鐘，只係得浩仔一人黎到。
「少少!?半個幾鐘喇，頂你!」我指住隻錶。
「我地約出黎通常都係遲半個鐘先到架，潛規則黎。」
「屌你又唔早啲同我講。」
「一時唔記得，Sorry，最多等陣我請。」
咁又冇所謂。
過多幾分鐘之後，所有人都黎齊哂，除左我同浩仔之外，仲有一個男仔。
「喂，同你介紹，依個係我由細玩到大既死黨，叫阿俊。」
俊，邊撚度俊啊!?一睇就知係個死MK黎架啦，Gel到個頭幾層樓高。咩居心啊?
「你好。」我主動打招呼。
「Hi!」仲要係個社交撚。
除左我地三個之外，全部都係女黎。一眼掃哂，屌咩，全部都係死MK妹黎既。浩仔間咩小學黎，專出MK架?
佢地個頭啡就不在話下，個個都着個啲號碼衣再加pump fury，做乜鳩姐?係咪以為自己好型啊你地?
原本以為都冇乜希望，冇件睇得上眼...點知，原來仲有兩件未到。
「Sorry黎遲左...」兩條囡囡一齊黎到。
左邊個件睇上去純啲，右邊個件都唔差，至少好過其他MK妹。
「Hi，未見過你既?」右邊個條女同我講。
「係啊，我第一次...」我開始一九九九。
「你好，我係Cherry。」
「喂，左邊個件我mark左。」阿俊講完之後即刻上前。
「咩叫mark左呢?」我問浩仔。
「即係佢要左，叫我地唔好搞咁解。」
MK既世界真係博大精深。
之後我地入到間K房，我先發現原來自己錯左。
依班人跟本就唔係黎唱歌。
浩仔一個力戰幾條MK妹，而阿俊就同遲黎既兩條女有講有笑。
我?坐正係中間冇人理我。
我仲on鳩到諗緊:咁唱唔唱歌好呢，難得佢地唔唱，廢事哂錢。
「咪住先，猜個靚枚先啦。」正當我想攞起枝咪，阿俊動議。
「但我想唱陣歌先喎...」
「唱乜鬼野歌啊?咪唱住先啦。」
「但我係黎唱K架喎...」
「唉，你由佢唱飽佢啦。」浩仔說。
跟住，佢地就冇再理過我。我就自己一個係度唱陳奕迅，同佢地好似兩個世界既人咁。原本以為自己會好細膽，唔敢唱出聲。但可能因為佢地眼尾都冇望過我，我唱得好自然。
你有沒有愛我的準備
我一路唱，一路諗，唔通我真係註定要做毒撚?
若你喜歡怪人 其實我很美
唱唱下，係時候走人。我同啲女基本上零交流。
浩仔比我既套，應該都毫無用武之地喇。
點知叫Cherry個女仔居然whatsapp我，
「等陣完左係出面個公園等。」
唔通...有機?
正當我摷緊錢既時候，我手機震一震。
「等陣完左係出面個公園等。」係一個陌生既電話號碼。
心諗，邊個黎架呢?
我禁入個icon，嘩，張相真係MK到瀨屎。又黑白，個角度又柒。仔細啲睇，原來係叫Cherry個個女仔。
我抬起頭，發現佢一直望住我，佢向我打打眼色。
咦，唔通想媾我?
唔通，個套用得着....?
「下次再出過黎啦，bye。」
「哦，bye。」我對佢地揮手。
同佢地道別之後，我真係坐左係出面個公園度等。等啊等，屌，又坐左半粒鐘。
心諗:唔撚係玩弄我掛?
「等左好耐啊?」佢從後拍我。
「係啊頂你。」
「頭先陪個Friend返屋企啊。」
「係呢，你點會有我電話既?」我問。
「哦，頭先我特登問阿浩佢攞架。」Cherry說。
特登問阿浩攞..?
「你要黎做咩啊?」
「冇啊，見你唱歌咁好聽，想同你做個朋友姐。」
朋友?哈，直覺話比我知，唔係咁簡單既。
「又得姐。」
「咁好啦，李志誠。」一定又係阿浩同佢講我個名。
講完，佢就咁走左，冇下文。
約我出黎，就講呢幾句?MK，真係令人摸不着頭腦。
Cherry絕對唔係靚女，但又未至於柒，正常女仔咁既樣啦。講真，我真係冇乜性趣。
「屌，叫你揀老婆咩!依家你玩下架咋，玩完就閃人啦。」阿浩講。
雖然有一刻我覺得佢既想法好賤，但我知道如果我要做一個真正既玩家，我就要變到佢咁樣。
好!!我做玩家第一個要搞既女人...
就決定是你了，Cherry。
話就話媾佢姐，但應該要點樣出手呢?
依個時候，緊係要問下浩仔啦。
「喂，浩仔，有野問你。」我捉住浩仔。
「咩料呢?」
「我呢，想試下媾Cherry，但唔知點入手...」我說。
「好!!!你終於都想喇咩?」
「算係啦...」
「不過你乜都唔洗做。」
吓?乜都唔做點媾女呢?
「如果佢對你有意既，佢遲早都會揾你既，等下啦。」阿浩說。
「咁若果佢無意呢?」我問。
「點會丫，佢問得我攞你電話，好明顯就想媾你啦，定喎。佢唔鍾意你既話，我切!」
既然佢攞到條丁黎保證，好，信佢。
頭幾日真係冇乜動靜，原本我差啲把持唔住，想主動約佢。
「咪啊你，等!!!」浩仔極力阻止。
「得喇..」唯有再等下啦。
之後，Cherry真係whatsapp我，
「Hi，李志誠，仲記唔記得我?」
等左咁耐，終於都等到喇。
「記得，Cherry啊話。」我回應。
「係啊。」
「揾我做咩呢?」
「冇啊，我好悶啊，出黎陪下我。」
咁進取?好喎。
咪住，浩仔叫過我唔好咁順灘。
「如果佢真係揾你，你都唔好狗衝，要吊高黎賣，信我啦。」佢好似係咁講。
信佢都應該冇錯既。
「我好忙。」
點知，我一send完出去，佢成個鐘冇應機。
仆街，唔通浩仔條契分陰我?
「其實我唔開心，求你出黎陪下我啦。」
捨得揾我喇咩。
「好啦好啦，你係邊?」依招叫欲拒還迎。
佢約我係之前個公園等，我梳洗之後就即刻出門。臨出門之前，我攞返浩仔比我既套出黎。我揸實個套，對住佢祈禱。
今次，求神拜佛，點都要比我用到你。