《玻色子遊戲》: 12

「四眼佬，四眼佬。你地嗰邊有冇咩發現？Over。」肥大叔透過對講機同發叔通話。
「冇呀，樓上啲課室都鎖左。要唔要我睇埋男女廁？Over。」發叔問。
「緊係要啦，唔好放過任何一個地方。去廁所嗰陣你記得順便食埋屎呀！Over。」
「你個死肥佬，把口咁臭。你嗰邊呢，有咩發現呀？Over。」
「有蓋操場冇發現，而家行返出去一開始嘅籃球場。Over。」
「Roger。」 
「喂，我地用對講機保持聯絡架咋，洗唔洗搞到好似打仗咁呀，又Over又Roger。好好玩咩。認真啲搵下有咩線索啦。」小喬好鄙視發叔同肥大叔嘅對話方式，覺得佢地係咁嘅關頭仲好似玩玩下咁。
「輕鬆啲啦後生女，你係度發脾氣都於事無補，大家合力，一定會搵到出路嘅。」發叔又笑騎騎咁安慰小喬，希望可以減輕佢嘅不安。
「輕鬆啲？點輕鬆啲呀？無啦啦黎左學校，嗰個男仔又無啦啦死左，你叫我點輕鬆呀。我想快啲走呀，我……我……我好驚……」發叔嘅說話完全冇令到小喬放鬆，反而令佢越來越受壓，講到最尾仲想喊。
「呃……呃……唔好喊，唔好喊。」呢個時候，發叔都投降，唔知可以再講咩好。