女神從Online Game走出來了: 23 再見家長

聽到廚房傳來煮食的聲音，我慢慢醒過來，我知道伊語正在做早餐。
 
 
「．．．呀！主人起身啦？」伊語被我突然從後抱著嚇了一跳
 
「有咩食呀？」我說
 
「嘻．．．粟米片、茄汁豆三文治，都係主人最鍾意食嘅！主人想飲咖啡定果汁？」伊語抱著我的手說
 
「咖啡。係呢，今晚我想我地去阿媽度食飯，好無呀？」我說


 
「好呀！但係點解嘅？主人唔係唔鍾意見到阿爸咩．．．？」伊語不解問
 
「我想同佢地講我地嘅事。特別係我地一齊．．．我係好認真去睇我地依個關係。」我說
 
伊語親了我臉頰一下說：「．．．主人想點就點啦。」
 
 
我致電父親交代了一下今晚的聚餐，雖然父親對我的主動感到有點突然，不過還是叮囑了母親今晚要煮點好的。
 


既然今晚回家吃飯，我們今天也不打算安排甚麼節目。只是休休閒閒地過．．．
 
 
「主人．．．其實我無幾多日就消失．．．唔一定要話比阿爸阿媽知．．．」伊語說
 
「唔得，我要我身邊重要嘅人都知道妳曾經存在。妳永遠都係我嘅初戀。」我說
 
「．．．我唔想主人一世都自己一個．．．」伊語看著我說
 
「或者妳唔會消失，會永遠喺我身邊呢。」我說


 
 
伊語沒有回答，只是緊緊的抱著我．．．
 
我們稍為裝扮了一下便出發，不過伊語這次比起上次更緊張了．．．
 
 
「我咁著好唔好睇呀？會唔會失禮呀？」伊語不斷問
 
「妳點著都好睇．．．唔使緊張喎．．．」我說
 
「宜家要話佢地知我地一齊．．．唔同平時架．．．佢地又唔知我係精靈．．．唔知佢地會點諗．．．」伊語十分忐忑
 
「無事嘅，就算佢地唔鍾意，都阻止唔到我。」我說
 


伊語面紅紅抱著我的手說：「．．．主人好有型．．．」
 
 
終於我們來到了．．．我按了數下門鈴，很快便有人打開門了。
 
 
「嚟啦嚟啦！．．．快啲入嚟啦！」母親馬上拖著伊語進屋．．．卻把我遺忘了．．．
 
「阿爸，家姐。」我打招呼
 
父親看著報紙說：「嚟返啦？坐下啦。」
 
 
我坐在伊語旁邊，母親也回到廚房準備飯菜。
 


 
「近排點呀？返工．．．點呀？」父親問
 
「．．．幾好呀，早幾日我第一次去見客，雖然有啲緊張，不過都算順利．．．」我本來想敷衍了事，但我還是說出來了。
 
 
父親看了我一眼，沒有說話．．．
 
 
「好啦好啦！食得啦！快啲過嚟啦！」母親把餸菜端出來
 
「哇！今晚好豐富喎！」家姐說
 
「呵呵呵，伊語要食多啲呀！嗱，食隻雞脾先啦！」母親夾了一隻雞腿給伊語
 


「媽咪我又要！」家姐把飯碗遞向母親
 
「係啦係啦！」母親也夾了一隻雞腿給她
 
「阿仔做咩咁好突然返嚟食飯呀？係咪同伊語結婚呀？呵呵呵！」母親開玩笑問
 
「．．．唔．．．咳咳．．．」伊語被嚇得嗆了一下，我立即給她一杯水
 
「媽咪唔好玩啦，搞到人地嗆親啦．．．」家姐說
 
我深呼吸了一口氣說：「我決定要同伊語永遠一齊。」
 
「噗！！．．．咳咳．．．」家姐被嚇得嗆了一下
 
「．．．哈哈哈，阿仔你好少可講笑．．．你嚇死你家姐啦！」母親笑說


 
「．．．我係認真架。」我說
 
 
大家都靜了看著我．．．
 
 
父親問：「你意思你地諗住結婚？就算我地唔反對．．．伊語屋企人點講？」
 
「依樣就係我要講嘅嘢，其實．．．依一段時間，我都呃住你地．．．」我說
 
 
我由跟伊語相遇，知道了月卡的事，被韋迪亞纏上，與伊語分開，到現在相愛的事，全部如實說出來．．．大家都聽得呆住了，不過這也是我意料之內的事。
 
 
「即係伊語．．．唔係人？咁．．．你地仲點一齊？」家姐汗顏問
 
「我唔講妳都唔知啫，咁即係話同佢相處係絕對無問題啦。」我說
 
母親擔心說：「但係．．．伊語好快就會消失啦喎．．．」
 
「就係因為咁，我更加要同你地講清楚。雖然我地無諗過結婚註冊依樣咁現實嘅嘢，但係我希望作為我家人，妳地可以承認伊語。就算最後會變成點，佢同我一齊過、相愛過依件事，係一件事實。」我說
 
「．．．但係．．．．．．」母親好像在擔心甚麼
 
伊語說：「阿媽．．．我係真心愛主人架。我條命亦都係主人救返嚟，佢係第一個，亦係唯一一個對我咁好，咁錫我嘅人．．．所以我．．．我都會盡我所能去對佢好、去保護佢、滿足佢．．．希望妳地可以接受我．．．」伊語甚至跪下來了
 
「哎呀哎呀，起身先起身先！！」母親立即扶起伊語
 
「．．．雖然妳話會對阿主好，但係妳好快要消失啦喎．．．」家姐說
 
「佢一直都對我好好。」我說
 
「．．．假設伊語最終唔會消失．．．我地會唔會．．．無孫抱架．．．」母親說
 
「．．．．．．依樣嘢無人答到妳．．．」我真的被考起了
 
「我會盡力架！！」伊語突然說
 
 
母親和家姐都無話可說．．．我想，她們會明白我的．．．
 
 
這時，父親凝重地問：「我淨係想問一個問題，如果伊語唔會消失，你憑咩照顧佢？照顧一個家庭？」
 
「為左佢，我會努力，認真去工作。」我說
 
 
父親沒有說話，只是看著我。
 
 
我強忍著淚水續說：「其實，一直以嚟，我都好自私．．．無諗過你地，淨係埋怨你地當初無比我出國讀書。結果只可以做一啲自己唔鍾意嘅工作．．．但係自從伊語出現，同佢相處，我受到好多好多鼓勵，亦都學識去幫人，去諗人地，去照顧人地．．．我亦都睇清楚自己嘅幼稚。而且我學識左唔好自卑，要勇敢去面對自己嘅感覺。就好似工作咁，其實我都幾鍾意宜家份工．．．亦好似我對伊語嘅感覺，就算我地之間有幾多差距，我都要同佢相愛！所以，我決定會繼續宜家嘅工作，我會努力向依個方向發展，為左比伊語一個幸福嘅家．．．亦都為左．．．報答阿爸阿媽一直以嚟都咁錫我．．．多謝你地．．．」
 
「．．．．．．咁你以後要好好對伊語。」父親說
 
「．．．我地會支持你！」母親說
 
「好嘢！」家姐抱著伊語
 
「．．．多謝阿爸阿媽．．．」我要忍不住了
 
父親說：「伊語，妳要好好照顧阿主．．．」
 
家姐說：「係呀，阿主佢好無用架，妳要幫佢呀！」
 
「我一定會好好照顧主人！！」伊語都哭了
 
「伊語．．．」母親搭著伊語的肩膀
 
「係！」伊語回應
 
「妳要努力啲．．．我想要抱孫！」母親說
 
 
．．．．．．
 
 
終於，我們得到了家人的認可，我跟伊語的關係和背景不用再隱瞞了．．．雖然伊語可能會消失，但我依然會為她而努力．．．因為，我有一個想守護的人．．．是精靈。
 
我也很開心，終於跟家人和好了。