【武館MK學生妹。死毒男。人格分裂Miss。】: 【九】

「唔好呀……求下你地！」

「哈哈……哈哈！」

我偷偷地跟住比比鳥班人同四眼雞丁既腳步，走到去男廁門外。
男廁內傳來一班男人既大笑聲，以及四眼雞丁既求救聲。


「星哥，你睇下我係佢褲袋搵到咩！」





「咦係銀包喎，星哥！入面有咩呀～40蚊呀！」

「唔好咁啦，可能人地有信用卡呢！」

「冇喎！咩都搵唔到既！得張咁既爛鬼家庭相？」

「你個銀包除左學生證就乜都冇啦？」

我偷偷地望入去，比比鳥只係企係一邊捱住牆微笑咁望住佢班手下玩。
忽然間，個手下拎起佢張家庭相，大大力咁撕爛左。





「唔好呀！唔好呀！」

「哈哈！你咁大反應做咩？」

「喂，四眼仔。」比比鳥突然間走埋去四眼仔度，「點解要袋住你張咁既全家福？」

「下……？」

「比起憎我地，你應該憎死佢地先至岩。如果唔係佢地強迫你入威廉，你就唔會今日係度比我地打。你知唔知佢地最錯係咩？」





「你講緊……咩呀？」

「最錯既就係，佢地自己想做我父母既奴隸都算啦，何必生個仔出黎去做我地既奴隸？今日係咁，未來都係咁，你注定就係咁失敗，一世都爬唔過我地！」

「哈哈！講得好呀，星哥！死窮鬼，以為自己讀書好叻就追到我地咩？咪又係考唔過星哥。」

「死讀爛讀又點，咪又係冇錢補習！哈哈！」

「講英文好叻呀？咁你見過鬼佬未呀？金髮個d呀？見過未呀？死窮鬼！」

講完之後，比比鳥退後，班手下就一桶水咁潑過去，另一個就用拖把不停擦落去四眼仔塊面度，成班人好開心咁大笑拍曬手。

就只有比比鳥一個人唔笑。





「反抗呀！點解唔反抗呀？」比比鳥突然衝埋去，一野揪住四眼仔件衫領。


「夏子琪？妳企係男廁門口度做咩呀？」突然間，身後傳來Miss Chan叫我既聲音。

「我……」我回頭望入男廁，只見比比鳥成班人聽到，即刻啤住我，然後慢慢行出黎。


「夏子琪，偷望男廁好曳呀。」班男仔係度笑住講。

比比鳥行出黎，啤住Miss Chan，而Miss Chan亦啤住佢，兩人對望左三秒，比比鳥就同其他男仔一齊離開。

「Miss Chan，入面個男仔……」

「我差唔多要上堂。」Miss Chan明顯係見到個四眼仔，但若無其事咁走左。






唔通呢間學校既人都係咁既？


「可惡！」我望入去，四眼仔跪左係度，望住張爛曬既相大叫。