之後果幾日我仍然無法同柔柔正常溝通。
成日都緊張到開唔到口。
雖然已經比子欣鬧左我好多次。

「你做咩最近無同你個柔柔食晏?」肥森好奇咁問我。

「第一:,佢唔係我。第二,我都唔係要日日要同佢姐。」

「唔係喎,你呢個星期好似無同過佢食晏咁,平時你地會有三四日係一齊食,你地而家好似連放學都少左一齊走。嗌左交?」



「唔好講到我地好似拍緊拖咁啦。」

因為呢幾星期我一見到柔柔就老尷,成日傾傾下就靜左好耐。
有次仲試過成程唔出聲tim。
整整下柔柔都同番自己班fd走。
我又怕左呢啲尷尬氣氛所以都同番肥森佢地一齊。

「其實兩級啲人一路都討論緊你同佢既事。」冷靜既阿謙又出聲啦。

「有咩好討論?」當局者迷既我完全唔知咩事。



「本來啲人係討論你地係咪一齊左,而家就講緊你地係咪分左手。」肥森搶左阿謙既發言權。

「你要小心啦,你應該好清楚柔柔係佢果級好受歡迎,聽講已經有幾個男仔想出手。」家樂奸笑咁摸我膊頭。

柔柔呢種女仔的確好多人意。
有人追一啲都唔奇。
聽到家樂咁講,個心好似比針拮下拮下咁。

臨入班房前,肥森捉住我。



「我唔想你後悔,如果你有機會都唔把握,呢個機會就會比人拎走左。」

有時我覺得肥森比我更了解我自己。

放學之後我又如常去音樂學會搵許杰學bass。
而今日好好彩柔柔都係到。
見到面果陣,我地兩個只係點點頭。
無講啲咩。

「你今日點解心不在嫣咁既?」許杰問我。

「可能唔夠精神姐。」

「咁你洗唔洗早啲番去?」



「唔洗,我OK嫁。」

我已經決定左今日要同柔柔一齊走! 我係唔會早走。

「你學野既能力真係好快。我諗你再學多陣就可以出黎見人。」許杰概嘆。

其他人都因許杰既說話行左埋黎。
係我身旁議論紛紛,搞到我好尷尬。

「柔柔你果然無介紹錯。」許杰突然大嗌。

「果然係柔柔男朋友。」
「咩呀?佢地唔係散左咩?」
「真係? 佢都好似唔錯咁喎。」


「散左有啲可惜,佢兩個都幾襯。」

啲人係到竊竊私語令到我同柔柔既尷尬值提升。
柔柔連塊面都紅晒。
佢面紅個樣真係好可愛。
好想走埋去搣佢塊面。

但柔柔好似頂唔順呢種氛圍走左出去。
許杰踢左我一下櫈腳示意我追出去。

我都無再呆坐,跑左出去。
見到柔柔企左係走廊背住我

「柔柔。」



柔柔擰過黎望左我一下就低頭望住地下,好似想避開我視線咁。

「我…你…你無野丫嗎?」

柔柔只係搖一搖頭回答我。

「其實你唔洗理佢地點講。」

「嗯。」

面對柔柔簡短既回覆,令我不知所操。
我好想知柔柔諗緊咩,想知佢點睇我地既輿論。
我好想好想好似以前咁知道柔柔心入面既想法。
好想隨意望住無時無刻都笑緊既佢。



不知不覺走到去柔柔既面前。
柔柔仍然低下頭,好似好困惑咁。

「我地唔洗理人地點睇,我地係我地就可以。我…」

唔知點解我講到一半就停左,因為我意識到我講緊一啲非我心想既說話?

「我好驚…」柔柔突然間喊左出黎。

我好震驚,腦袋處於深淵混沌之中。

「我好驚你討厭我,你忽然間少左同我講野,無再好開心咁同我一齊,突然變得好疏遠,我唔知你係咪開始嫌我悶、嫌我煩住你成日搵你。我個心好唔舒服,我突然好驚我世界無左你,想去習慣無左你,預防有一日我真係無左你,但唔知點解一見到你就係好想企係你隔離。好想同你講關於我既野,好想聽你啲無聊說話,好想比你整蠱,好想你搣我塊面….」

柔柔講完之後就攬住左我,係我心口繼續喊。
但我仍然處於驚訝既狀態,我設法回過神來。
雙手抱緊柔柔溫暖又柔軟既身驅。

「柔柔我從來都無嫌你煩,我一直都好中意你係我身邊。只係最近…」

「huh?」柔柔望上黎。

「只係最近有啲野姐。」我唔敢直線柔柔。

「咩野呀?」

我支吾以對咁盡量避開佢視線。

「你係咪有左女朋友所以唔可以同我一齊?」

「唔係呀。」

好似越搞越復雜,再係咁落去只會有更多誤解。

「係咪唔講得嫁?」

如果我答左係既話,佢一定會再胡思亂想。
但我由諗唔到藉口去圓左件事。
點算好?

「我明白啦,既然你有苦衷,我就唔逼你講。」

如果我而家唔做啲野既話可能我同佢之間就會完。
柔柔個樣好似想離開咁。

「柔柔!其實我….」我始終無勇氣講出口。

「你唔一定要逼自己講,我地又唔一定要完全知道對方既所有事既。」

柔柔講完就轉身諗住行開。
同時我捉住佢手腕唔比佢走。

「其實唔係你諗咁,其實係我…係我…」屌又去到口唇邊停左係到。

「放心啦,我唔會亂諗野。」

我知柔柔係唔核我難做所以想離開。
我知佢好想知道真想,但又唔想逼我。
比著其他女仔一定會發爛走人
但係若果佢真係走既話,應該唔會再番黎。

「其實我已經當唔到你係呀妹。」頂!我好似詞不達意。

「果然係咁。」柔柔開始又想喊。

面對眼盈淚光既柔柔,個心真係會比佢溶化。

我將柔柔拉埋去我身。

「對唔住柔柔,因為我中意左你。」

雖然如釋重負,但又戰戰兢兢。

時間好似停左咁,柔柔依然伏左係我心口。
佢咩都無講,什至無回應。佢伏係我心口,完全睇唔到佢表情。
判斷唔到而家係咩狀況,但佢無拔足狂奔,又無回拒我,應該無問題掛。
我好想問佢係咪都中意我,但我既勇氣好似已經用晒。

我地維持左呢個動作一段時間,柔柔好似仲未想郁咁。
我忍唔住拍拍佢。

「柔柔,起身啦。」原諒我,我根本唔知自己可以講咩。

「我想攬多陣。」柔柔又再攬實啲我。

呢個舉動係代表佢接受左我既表白?
定係意味住呢個係告別既擁抱?
但我做埋咁多衰野,又點會比我追到柔柔咁好既女仔。
所以應該會係後者吧。

「你中意攬幾耐就幾耐。」

「嗯。」

我地相擁左一陣。

「我地係咪已經唔係呀哥呀妹啦?」柔柔怕怕醜醜咁問我。

「Errr…」其實我唔太知佢呢句說話既用意。

「咁你都中意左我,我地已經瘃唔到兄妹。」

「又唔一定既…」

「如果我地繼續係兄妹,我地咪無得….」柔柔越講越細聲。

柔柔呢個怕醜樣真係好可愛呀救命!!!!

「無得…?」

無得咩…?

「你兩個係出面搞咩?」突然有人大聲叫我地兩個。

我同柔柔嚇到彈番開。
尷尬到唔敢直望對方?

「我地番入去嫁啦。」我回應果個氣氛破壞者。

雖然最後都係唔知到柔柔想講咩。
不過我地果日都一齊走,有講有笑。
明明果刻好尷尬,但去到走果陣又好似無晒野咁。
可能柔柔已經知道我既心意,所以無再亂諗野。
可惜我唔知柔柔諗緊咩。
不過唔緊要啦,只要可以繼續同柔柔一齊就可以,係唔係男女朋友都一樣姐。

當我刷完牙果陣我收到柔柔wts app。

柔柔︰「我好掛住你」

我︰「我都係」

睇黎呢個就係答覆。