某天我脫毒了，走上了情聖之路: 第四十四章 - 中秋．月下夜的櫻花
中秋節--------人月兩團圓既節日。
但我早已同自己中意既人分開左。
係由我親手切斷。
上次同柔柔講野應該係第一次同嵐嵐一齊番學果次。
距今已經過左差唔多一個月。
我好想搵佢、wts app佢，但每次拎起手機都唔知講咩好。
拎起又放番低，放番低又拎起…..
我慢慢就逃跑番去網絡同動漫既世界。
「好心你出到就咪發呆啦。」家樂突然出現係我面前。
今日係中秋節正日，第二日又唔洗番學，所以我地食完飯就約左出黎，去家樂新界間村屋玩。
「又諗緊你個柔柔?」
「哈，唔係啦。」
「我地永遠支持你。」家樂突然爆左句肉麻野。
「溝左嵐嵐佢!」果然第二句就奶野。
「我講笑，你好耐無試過咁失落，以前好唔意柔柔，佢好似搶走左我兄弟咁，但而家好想佢番黎帶走我兄弟，因為我兄弟需要佢。」
「多謝你家樂，你把聲好似唔同左。」
「變左丫嘛。」
的確變左，肥森有左天欣。
阿謙唔再同我地同班。
長毛少左同我地癲。
我就變得多左好多桃花。
而家樂就無變過，我指既係家樂既內心。
有一日我無意中聽到有一個女仔向家樂表白。
家樂咁答呢個女仔
『我真係好想答應，但可惜我暫時未可以拍拖住，我有一個兄弟佢最近好失落，而另一個兄弟又拍緊拖，所以我唔可以就咁丟低我果位失落既兄弟，因為如果連我都拍埋拖既話，佢會好孤獨。至少比我陪佢走出陰霾先，所以對唔住。』
家樂永遠都為身邊既人著想，其實佢應該得到幸福。
如果我叫佢唔好咁做，佢一定會唔聽，家樂雖吊兒郎當，但佢決定左就決定左。
「食湯圓啦!!」肥森大叫。
「今年就蝕底啲，同兄弟團圓吧。」家樂伸出拳頭。
「可以同兄弟團圓一啲都唔蝕底。」我同家樂擊拳。
「嘩!!好好食!!」家樂大叫。
「你洗唔洗咁大聲。」子欣拍家樂個頭。
「果然係日本女仔出得廚房上得…..」家樂比人掩住佢把口。
「過獎啦。」小櫻溫文咁回應家樂。
食完湯圓就拎左個月餅行開左一個人去賞月。
月亮真係好圓，唔知幾時可以同柔柔團圓呢?
仲記得果一日個月光都好圓。
「點解你係咁望住個月光既?」小櫻突然走過黎問我。
「因為靚囉，中秋要賞月嘛。」
「但點解你眼神咁憂傷既?」
我沉寂左一陣。
「對唔住我問左啲奇怪問題。」小櫻緊張咁道歉。
果然係日本人好快就察覺到自己問錯野。
「唔係唔係，Errr….咁岩諗緊野姐。」
「呀，其實我今日係第一次食月餅。」小櫻轉開話題。
「我今日都係。」我下意識拮左佢一野。
小櫻發覺自己好似講錯野，面就紅起黎。
「呀呀呀，我意思係…我第一次食月餅…..」小櫻急忙解釋。
「哈，我知，我同你玩下。」
「你終於笑。」
「哎?」
「最近好少見你笑，你好似成日都好唔開心咁。作為你既同學都好想幫你。」
「多謝你。」
「其實你…都可以搵我傾計。」
「嗯…..好呀，係呢你最近有無話同邊個熟啲?」
「都有既….」
「係咪有啲咩事?」
「唔係，只係好似唔太岩傾咁。」
竟然? 但係我地班既女仔都係傾啲大路既女仔野。
唔通佢地排斥小櫻!!?
確實係香港地太靚太出眾既女仔好易被排。
「係話題唔岩定係點?」
「話題，放心我無被排，我成日係屋企睇動漫好少行街，所以同佢好似無咩岩傾咁。」
小櫻都幾敏銳。
原來係呢個問題。
「如果你可以同我傾動漫野就好，放心我唔好BL，我都係睇大路既作品。」
「放心我無懷疑你，下次如果你見到我地講果陣你隨便搭個嘴就得。」
「我唔太敢主動同成班男仔講野，我怕比人話我係淨係識痴住男仔。」
見到小櫻呢個樣，大概估到佢係之前既學校應該比人排斥過。
「明白，你都可以同我傾，不過點解同我一齊傾就唔怕?」
「因…因為……」
呢個尷尬既反應。
佢唔會又中意我丫嗎?
我已經無做咩。
係咪咁多桃花?
「其實呢…」我嘗試叫佢唔好中意我。
「對唔住，我利用左你!!!」
「下?」
「因為學校有個關於你既傳聞，凡係接近你既女仔都會被你中意，之後就會拍拖，最後被你飛，所以如果我同你做朋友啲人可能就唔會講我係姣婆之類既說話。」
小櫻呢番說話完全打破左佢清純既印象。
「對…對唔住，我唔應該利用你，係我一時諗錯左。」
突然佢既道歉都只係為左佢既面子而講。
但諗深一層佢只係想保護自己。
畢竟難得轉黎新既學校緊係想盡量避免發生舊校既事情。
坦白講，我起碼有一班兄弟，比人講兩句有幾咁閑。
相反小櫻佢係到乜都無。
「唔緊要，你幾時想傾都可以搵我嫁。」
「你….你唔嬲咩?」
「開初我有少少，但我明白點解你咁做，換著我都可能會咁做，呀媽果然講得岩，靚既女仔係唔可信。」
「我…一啲都唔靚…..」
「咁我都唔知呢個世界有咩係靚。」
屌我又把口快過個腦…….
係月亮殘光照射低下，隱約見到小櫻塊面紅起上黎。
塊臉呈現左一陣櫻花色。
好靚，仿如一棵月夜下既櫻花一樣。
「小狼我係咪好衰?」
「會覺得自己衰既人本質一啲都唔衰，只係佢地有時逼於無奈姐，你唔需要束縛自己，諗到咩就做，跟住自己個心去。」
「多謝你，你真係唔會嬲我?」
「唔會，朋友又點會咁易就嬲朋友呢?」
「嘻，多謝你。」
「如果你真係想同人傾動漫你可以搵阿玥，佢都成日睇，我久唔久都會同佢傾下。」
「高高地短頭髮果個?」
「係咪，星期一我介紹佢你識。」
「好呀。多謝你。」
「得嫁啦，你唔洗係咁多謝我。」
「多謝你多謝你多謝你多謝你多謝你多謝你多謝你。」
「得啦。- -」
「嘻嘻。」
小櫻傻笑左一下。
一笑傾城四隻字完全體現左係佢身上。
小櫻笑起上黎有啲似新垣結衣，
係長髮滴骰版既新垣結衣，
另加一雙深啡色既瞳孔。
身上帶住一份幽雅式既清澀。
單靠一個靚字係唔會形到佢既美。
「做咩又呆左咁望住我?」小櫻問我。
「無呀，又諗緊野之嘛，番去囉。」
「好呀，你好似長期都諗緊野咁既?」
「青春期丫嘛。」
其實望住小櫻笑都係一種享受。
其實要睇櫻花洗乜過日本，
企係你隔離咪得囉。