某天我脫毒了，走上了情聖之路: 第五十六章 － 聖誕夜

「不如買野番去煮啦，好似仲好玩，而家出面食又貴又唔飽。」

「oh～小櫻你簡直係我女神中既女神。」

「我先唔做你女神！」

「黎啦女神，收我做兵啦~_~」

「唔呀，本姑娘唔收兵。」



我同小櫻一齊去買餸，繼續今年既聖誕節。

我地去左太古既一間超市。

小櫻一入超市就衝去拎手推車。

「衝呀!!」

小櫻完全當左架手推車係滑板車咁玩。



「你小心呀。」我追上去。

我只係追左唔夠五秒，小櫻就反左車。

「你有無事呀？」我問小櫻。

「嘿～我炒車呀。」小櫻摸摸自己個頭。

「我知我見到，有無撞親邊到？」



「個頭。」小櫻指住自己頭頂。

「睇過。」

正當我探頭望向佢果個頭之際，
小櫻好似頂頭搥咁撞落我個鼻到。
我隨著撞擊成個攤左係地。

「哈哈！！」小櫻發出自豪既笑聲。

「好痛呀！」我掩住自己個鼻。

「唔好嬲啦，玩下之嘛。」

「而家老子我勁嬲！！！」



「我玩下之嘛，個鼻係咪真係好痛？對唔住呀。」小櫻扁晒嘴，好著急咁。

小櫻呢個焦急既樣都幾可愛。

「對唔住......」小櫻低頭捉住我手腕。

我心知不妙，應該真係玩大左。

「我講笑咋，見你玩我咪玩番你。」

「我都估到小狼唔會咁小氣啦。」

「我不嬲大人有大量，不過快啲去買野，我開始餓啦。」



我為免小櫻再炒車所以推車既重任交番比我。

「屋企有無蛋？」小櫻問我。

「有呀。」

「ummm，你食唔食漢堡排？」

「除左榴槤同辣野之外，我咩都食。」

「咁豬排呢？」

「呢樣打死都唔識。」

「咁好彩我唔係。」



「下？」

「嘿嘿～聽唔到就算數。」

我地除左買當晚既餸之外，
仲買左好多零食同汽水。

「開工！！小狼幫我打蛋可以嗎？」

「我既榮幸。」

「wow，小狼你手速好快，平時有練習？」

「哈，打得機多丫嘛。」



小櫻你係咪有心玩野咁問？

基本上大部份煮既時間都係小櫻，
我只係從旁協助。
佢最後仲趕走埋我。
過左幾個字，佢拎左兩碟野出黎。
係漢堡排蛋包飯。
放好之後，佢拎左把刀出黎，
係兩嚿蛋上各界一刀，
果嚿蛋向下流晒啲蛋黃落個飯到，
好似平時係youtube見到果啲咁。
估唔到唔係去日本都有得食！！！

「嘩！！！！好勁呀！！！」我雙眼發晒光。

「快啲親熱食。」

我放左一羹入口........

「好好味呀！！！真係唔洗去日本，有你就得啦。」

「你知我實會再煮野比你食？」

「你一定會既~3~。」

「咁要睇下你表現啦。」

「係既係既！！！」

我走去小櫻後面幫佢按膊頭。

「大家姐舒唔舒服？」

「哈哈，好痕呀，你快啲坐番去食飯啦。」

「唔得！一日未確定大廚會繼續下廚，我係唔會放棄！」

「哈哈，我會下廚啦，你快啲食野啦。」

「太好了！」

我瞬間坐番埋位。

「係唔係真係咁好食？」

「其一，其二真係好岩我胃口。」

岩我胃口？
突然諗起同晴晴既對話。
的確小櫻既一切都好對我胃口。
照常理，我應該會中意佢，但佢點解....？

「做咩突然呆左？」

「咁岩諗緊野。」

「ummm，呀！我都諗到啲野，其實你係咪無察覺過晴晴中意你？」

“噴！！！”
我成啖飯噴左出黎。

「你講咩話？呢件事係唔會有可能發生！」

「做乜咁大反應？莫非你.....？」

「咪亂諗。」我彈左下小櫻額頭。

「但人地好明顯對你有意思喎。」

「我唔知點解你咁肯定，但我就覺得一定無可能。」

「直覺！不過我想聽下點解你咁肯定。」

「你應該都知我同晴晴好細個就認識，我以前既毒又柒，雖然而家都經常出醜，試問點會有人會中意一個真身係毒撚既人，即使我已經努力去掩色。」

「咁即係話如果佢咁都中意你就算係真愛。」

「呢個世上邊有咁多真愛，晴晴無可能中意我，我亦絛可能中意佢，我同佢只係好朋友。」

「Ummm，又會咁肯定.....咁我呢？」小櫻指住自己

「又關你咩事！？」

「整蠱下你，小狼塊面紅晒真係好過癮。」

「你就真係過癮，成日都整鬼我。」

「鬼叫你日咩都擺晒係塊面到。」

「你未答我。」

「又答咩呀？」

「如果我中意小狼，小狼會點？」

「咪玩啦，不如講下我中意你，你會點？」

「嘿，收你做兵，然後日日夜夜服侍我。」

「你果然有做女王既潛質。」

「所以你要聽我既說話！奴隸！」小櫻指住我個鼻。

「食飯啦女王。」

「啊！女王有啲事辦，你等等我。」

小櫻突然跑左入房。

「小狼聖誕快樂。」

舉頭見小櫻拎住一袋野。

「呢個係.....？」

「送比你既聖禮物。」

「下...？」

「快啲拆啦。」

「但係點解...」

「快啲拆！！」小櫻扮嬲。

我接過小櫻既紙袋。
入面裝住一對足球鞋。
一對貴版平底足球鞋，
一睇就知做過research，
如果唔係唔會識買，

「試下。」小櫻微笑。

「做咩呀？」小櫻問我。

我呆左咁望住對鞋。

「唔中意？」

「唔係，好...好中意。」

我腦袋空白一片，
好多謝小櫻，
同時又好驚，
我知道小櫻為我做左好多野，
但我怕有一天我唔知點去回應佢對我既好。

「咁快啲試下岩唔岩啦。」

「嗯。」

我著上腳，
size好岩好舒服。

「點呀？」

「好舒服好貼腳呀。」我向佢微笑。

「咁就好啦！！你試下跑兩步睇睇。」

我依佢既說話行到走廊尾，
再由走廊尾往佢果邊跑過去，
然後緊緊咁攬住佢。

「做...做咩呀？」

「多謝你。」

「傻仔黎，又喊。」

「我知你送足球鞋比我係咩意思。」

「有傳達到去你個心就好，你知嗎，我一直都好想睇下你踢足球個樣。」

「無問題，我會為你再一次踏上球場。」

「一言為定？」

「一言為定。」

「咁假後既社際足球比賽就拜託你。」小櫻笑一笑。

「但我地唔同社喎。」

「我唔理，總之你要報名。」

「但係我咁耐無踢.....」

「咁快就反口？我都估到小狼係負心漢黎！！」

「好啦好啦我應承你，我會參戰。」

「太好啦！」

今日係我最難忘既聖誕。
因為我收到一份最好既禮物，
唔係一對足球鞋，
而係一個好朋友。


半個月後，

「拎左體育衫未?」小櫻出門前問我。

「拎左啦。」

「咁今日加油，輸左係我既，贏左係你既。」

「放心，我一定會羸。」