某天我脫毒了，走上了情聖之路: 第九章 - 親朋密友
~自果次之後，卓芝就無乜同我講野，都再無同大家wts app。
即使上堂坐係佢隔離，都猶如陌生人咁。
反而樂瑤就每一日都搵我，同我傾計、wts app，有時會一齊食晏。今日係中秋節，樂瑤話想約多啲人出黎玩。
我就叫左肥森、長毛、阿謙同家樂出黎。
樂瑤都叫左四個fd出黎，其中一個令我好在意。
「佢就係番第二日比我撞到果位女同學。」我同肥森講。
「蘿莉控。」肥森瞇起對眼睥住我。
我拍左佢個頭一下就行埋去果位女同學到。「Hi，你認唔認我呀? 」我摸住後腦，尷尷尬尬咁問佢。
「記得呀，第二日番學就同我一齊遲到既哥哥丫嘛。」
佢把聲真係好好聽!!!!!!!
「小狼，原來你識柔柔嫁? 」樂瑤插嘴入黎問我。
柔柔? 唔單祗把好聽，連個名都好聽個人。
「佢咪就係我第二日番學就恰我果個哥哥囉! 」柔柔扮可憐。
佢其他fd怒睥我。
「唔係呀，我只係唔小心撞到佢。」我立馬就澄清。
我唔想比人話我恰細唔女。
之後柔柔見玩夠就幫我解話，講番件事出黎。玩到十點幾既時候，突然收到卓芝電話。
「小狼，你係邊呀? 」「我係維園呀，你把聲做咩事? 」佢把聲沙晒，令我好擔心。
「我……病左…我想食野，但屋企無晒人，我又落唔到街。」
「咁你想食咩?」
「粥……」佢好細聲咁講。
我收左線之後，就同佢地講有野做要走先。
樂瑤個樣顯然有啲失色，而柔柔咁無乜表情望住我猛係到揮手。
一拼之下，柔柔真係比樂瑤可愛好多倍。
(就連而家打緊呢篇文既我都好想而家見到柔柔。)因為以前同卓芝好熟，所以知道佢既屋企係邊。
但咁夜真係唔知邊到有粥賣。
於是我唔理3乘7係咪21，就去左卓芝屋企先。
到時再睇下佢屋企有咩煮黎食。
去既途中不斷係到諗點解佢要叫我而唔叫家楓呢?上到去禁鐘等左一段時間, 卓芝先緩緩咁開門。
卓芝面色蒼白，行步路都無力咁。
「粥呢?」佢問我。
「Sorry呀，因為啲鋪頭閂晒，所以我諗住親自上黎整比你食。」佢無應我，只係up左下頭。
「你抖多陣，好快有得食。」我慢慢咁扶佢入房。
走到雪櫃前面睇下有咩可以用黎煲粥。
屌! 咩都無，唔怪得佢要打比我求救。
係無辦法低下，唯有就咁煲白粥。
好彩佢屋企有啲類似”高速煲”既物體，所以大約半個幾鐘就搞點左。我輕輕咁叫卓芝起身。
「有得食啦。」我扶起佢坐係張床到。
佢淨係坐左係到，無任何反應。
「我餵你?」我拔起一羹問佢。
「嗯!」
我吹凍左之後就放左入佢個口到。
「好唔好食呀?」我問佢。
「好好食，啲粥好綿呀。好彩我唔係叫家楓黎咋。」
「點解唔叫佢黎? 佢先係你男朋友喎。」
「因為佢唔識煮野食，同埋朋友唔可以叫朋友黎照顧自己? 」佢一有番少少精神就開始潑辣。
咁即係佢一早就估到我咁夜會買唔到野食，真係一個心機重既女人。
食左半碗之後，我摸摸佢額頭睇下仲有無發燒。
我意識到佢既眼神，我同佢對望住。
清楚見到佢瞳孔入面既我。
時空彷彿停左係呢一刻。
被熱粥既蒸氣弄得泛紅既臉蛋，真係可見若憐。
「我仲未食完碗粥。」卓芝一句說話將我拉番黎現實。
好快食完碗粥之後，我就拎啲野去洗。
諗住番去佢房望望佢既時候，佢拍拍佢張床示意我坐埋去。
「我岩岩食飽左唔想咁快訓住，不如你陪我陣傾計。」
我見我唔趕時間我就答應左佢。
「岩岩係維園有邊個呀?」佢問我。我數晒有咩人去，當我講到我見番果日撞到果個女仔既時候，
「咁你地有無相認?」佢好大聲咁講。
我心諗，病左都仲咁好忠氣。
「有呀，原來佢叫柔柔。」
唔知點解一提柔柔我就好開心。
「咁你同樂瑤呢?」佢又問我。
「朋友囉，都有啲好感既。」
「會唔會諗住試下? 我諗佢都對你好有意思。」
又係呢個問題.....傾左一陣之後，我見佢開始有睡意，我扶佢訓番低就走。
「我走啦，廚房仲有粥係到如果你半夜肚餓就煲番熱黎食啦。」
講完之後我就轉身走向房門。
「小狼。」佢叫停我。
「嗯! 」我回頭望一望佢。
「你永遠都我最好最重要既朋友。」
「你都係，good night。」我報以一個微笑，溫柔咁同佢講。
搭緊地鐵既途中拎部電話出黎望望。
見到有幾個人wts app我。
肥森:「無事嗎?要幫手即到。」
樂瑤:「聽日得唔得閒?」我wts app話比肥森知卓芝病左搵我求救既事。
「我聽日得閒呀。」我wts app樂瑤。
「我想搵人陪我行一行旺角搵啲野 你可以陪我嗎?」樂瑤既秒回好明顯係等緊我覆佢。
「可以呀，一點旺角地鐵站等?」
「可以呀，聽日見。」
番到屋企沖完涼出黎見到肥森覆左我wts app。
「我勸你同卓芝唔好行咁埋。」
「點解咁講?」我覆佢wts app
「第一: 佢有男朋友仲對你咁暖已經係一個問題。
第二: 佢似想食兩家茶飯，畢竟你同家楓係一凹一凸既人，
同時擁有你兩個基本上可以填平一切突缺。
第三: 你再咁踩落去終有一日你真係會中意佢。
第四: 我唔可以比我兄弟受呢種委屈。」
「多謝你。我會試下遠離佢。」
但其實我真係做到，我本來同同卓芝咁好朋友，加上我同佢日日都見又坐咁近。
「點解考慮樂瑤? 可能你指拍左拖就唔會諗咁多。」肥森再wts app我。之後我就無應佢。
其實肥森都講得岩，畢竟卓芝有男朋友，我應該同佢有番啲男女之間界線會好啲。
始終咁樣對大家都好。
至於樂瑤......
唉，聽日先算。
轉眼間我就訓著左。
你永遠都我最好最重要既朋友。