某天我脫毒了，走上了情聖之路: 第三十三章 - 貝斯
「你而家無番足隊咁咪好得閒?」柔柔問我。
「少左好多課外活動咁囉。」
「咁不如今日放學你陪我去音樂學會!!」
「唔要!!」我決斷咁拒絕咁。
「Wei Ya!!!你都無野搞嫁啦!」
結果我都係陪左佢去。
次次我都敵唔過柔柔既所有要求。
我入到去見到好多陌生"人"
「佢叫咩名?」我問柔柔
「佢叫bass呀。」
我對呢支樂器一見如故。
「你想學?」柔柔問我。
「Errr....」
「想學，我可以教你喎。」一把比較成熟既男仔聲同我地講。
我眼凸凸咁望住佢。
「等我介紹自己先，我叫許杰。你就叫我許杰得嫁啦，中五，呢個學會既會長。」許杰介紹自己。
「黃少朗，中三。」我對唔熟既人比較寡言。
「噢! 原來你就係小狼!!」
「你識我?」
「足球隊既新星丫嘛，不過主要因為柔柔。」
新咩星呀，我都無面目番去。
不過我比較好奇佢後面果句"不過主要因為柔柔"。
「許杰!!!」柔柔叫停左許杰。
許杰都無再講落去。
佢好快就開始教我bass既野。
第一次接觸樂器係比呀媽逼學琴。
不過學左一陣就頂唔順
我亦同bass呢樣樂器結下不解既情緣。
就係咁，我逢星期三放學後都會去音樂學會跟許杰學bass。
而柔柔就會係果個時間同其他人一齊夾下歌玩下音樂。
我而家先知道原來柔柔精通咁多樂器。
完左學會我同柔柔又一齊
「我聽許杰講你學bass學得好快。」
「杰哥教得好姐。」
「前提都要你有潛質先得嘛。」
「我係天才就唔需要講啦。」
「哈。」柔柔冷笑左一下。
「Wei Ya!!」我大力咁搣佢塊面。
「好痛呀!!!」柔柔掩塊面係到悲鳴。
「睇下。」我慢慢拎開佢隻手。
「真係紅晒喎。」我望佢塊面。
「你咁大力做咩?」佢扁住咀講。
「對唔住啦，錫番你啦。」我講笑咁講。
柔柔好自然咁遞左佢塊紅卜卜既面埋黎。
「你真係想我錫落去?」
「乜你唔係講真嫁?」柔柔驚訝咁問我。
我第一次見到柔柔惱羞成怒既樣。
因為佢真係好少嬲，係有時會燥底，不過2秒後就會無事。
我輕輕咁將佢個頭拉近我，用我額頭緊貼住佢左腦。
「你可唔可以可愛少陣?」
即使柔柔再努力去掩飾，都遮掩唔到佢果份害羞。
我而家先察覺到，原來柔柔有一陣花香味。
柔柔突然擰過黎用一雙楚楚可憐既眼神望住我。
我忍唔住同佢呢雙眼對視。
雖然以前成日都話柔柔好得意令我留下深刻印象。
從來都無試過好似而家咁定睛望住柔柔。
係時間停頓係呢一秒鐘。
係呢一秒間，我問左自己一個問題;
我地唔係兄妹嗎? 點解會有種心如鹿撞既感覺?
一路以為我地只係兄妹好自然好多動作都無忌諱。
但今天我錯了，可能就係呢啲動作我隨時都會傷害柔柔。
「送你番去?」我退後。
「好呀。」
沿途番去果陣我地都無講過野。
只係周不時會望下對方。
番到屋企無無聊聊拎部電話出黎睇。
見到柔柔同卓芝都有wts app我。
柔柔: 「其實你彈bass都幾型。」
卓芝:「你同阮芯柔一齊? 」
我已讀不回卓芝既wts app。
直接覆柔柔。
我:「我唔彈果陣都型。」
柔柔:「-,-」
我:「下?我唔型咩?」
柔柔:「唔係，淨係覺得你自大姐。」
我:「咁都要有料先可以自大。」
柔柔:「其實點解你咁中意搣我塊面既?」
我:「好搣囉。」
柔柔:「係咩XDDD以後唔准再搣咁大力。」
我:「OKOK~~」
我同柔柔如常咁去傾計。
因為我地唔想失去對方而唔敢行前一步?
重點係，我真係中意阮芯柔嗎?
我害怕只係當左佢係水泡。
我可以傷害好多人，唯獨柔柔唔可以。
柔柔:「其實點解你咁中意搣我塊面既?」
我:「好搣囉。」
「因為我中意你。」