我足足呆左喺原地差唔多成分鐘先記得自己要追翻Cillia同Vicky。我一路行一路回味頭先Edward把聲同埋佢嗰個好charm嘅笑容。當然,仲會ff吓比佢攬住係咩感覺,事關佢胸肌真係好結實,比佢攬住一定好warm,我唔會feel錯,嘻。

「Heidi,做咩發哂呆咁?頭先喺學校咁耐都未出黎,打你電話又唔聽!」「咪係囉。」Vicky同Cillia帶住半擔心嘅語氣轟炸我。

話時話,我部電話好似咁耐都冇響咁嘅。摸下裙袋,空空如也;袋入面,銀包、尿袋、m巾,乜都齊,就係冇電話。回想返頭先入學校,入hall都冇用電話。上課室...係!係漏左喺課室!what the fuck?

好啦我承認我on9,電話都可以唔記得攞。最衰都係曹嘉欣同呂詠曦兩個死婆,催命符咁,搞到我要返轉頭。

「你返去拎啦,我地喺到等你。快啲呀,唔好咁慢!兩個靚女企喺街到好危險架。」Vicky真係好有自信。
「得喇,靚女們。」



基於我擔心我部電話嘅安全,又費是佢兩個等咁耐,所以我用跑200米嘅速度跑翻學校,再用跑100米嘅速度跑上課室。跑到上3樓嘅時候,突然聽到Edward把聲,於是我放輕腳步、放慢呼吸,諗住聽下佢同邊個講野。

「喂,Edward!頭先見到你同條女攬喎,邊個黎嘅先?有好野唔益人。」唔知條友乜水,是但。
「邊有呀?我頭先唔小心撞到佢咋。」Edward笑住咁講。
「仲話冇?我見你個樣好enjoy架喎。個女仔紅都面哂添喎。」
「唔好亂講野啦。不過講真,佢係幾靚幾pure。唔講喇,約左人打波,聽日見啦。」

聽到呢到,我聽到Edward嘅腳步聲越黎越近,正當我打算跑上四樓嘅時候,Edward已經見到我。
「咦?又係你呀?未走嘅?」Edward顯然係有啲錯愕咁問,同時慢慢行近我前面。


「係...係呀,我漏...漏左電話。」我尷尬咁逐步向後退。

諗住踩上梯級,結果一個唔小心一跣,成個人失平衡咁向後跌。Edward見狀即刻用左手拉住我隻手、再用右手攬住我條腰。呢一刻,時間凝結左,我地hold住呢個動作都有成十秒。因為成件事太突然,我反應唔到,所以碌到對眼好大,同佢對望。十足十韓劇啲男女主角咁。

Edward真係好靚仔好attractive,我真係好希望時間可以永遠停留喺呢一刻。

「小心呀你!見親你都咁蝦碌嘅。」佢笑住咁樣講。
「邊...邊有喎。」我又再次面都紅哂。
「係呢,你叫咩名?我地咁有緣,做個friend啦。」
「我叫韓子澄,Heidi,係form5C架。」我故作鎮定。


「好啦,我叫劉煒燁呀,個個都叫我Edward嘅。」
「我知...呀。」仆街口快快講左出黎。
「你又知嘅?」佢有啲驚訝。
「你咁出名,全校都識你啦。男神!」機智嘅我,成件事可以話係兜得完美。
「大家咁話啦,三朵金花其中一朵呀嘛。女神!」佢講完仲要伸一伸利。
「妖!好老土呀!」我輕輕力打左佢一下,但係其實我好開心。

我地就係咁樣一路行一路傾,搞到我差啲唔記得左Cillia同Vicky。結果係比佢兩個媽叉左成程。
已有 0 人追稿