曾經同一個女仔大戰咗幾年: 19

「其實有條問題我想問好耐。」 


「問啦。」 


「如果....」 


「如果咩？」 




我吞一下口水續說：「如果畀個多啦A夢妳，妳會想要咩法寶？」 


「你點知我中意多啦A夢架？」她吃驚一問。 


「個重點都唔係多啦A夢。」 




「但我覺得多啦A夢好重點啵。」她硬要跟我嗌拗，這也是她可愛的地方。 


「咁妳會揀咩呀？」 


「um……」她低聲沉思，我們差不多把這兩旁都是綠樹的路走完。 




「我估以前嘅我會揀......隨意門。而家，我會想揀時光機。」 


「點解嘅？」 


「哩度係第二條問題啦啵，我無應承答你。」敏銳的她指出，瞪望我後說：「咁你呢？」 


「我會揀如果電話亭，幾乎萬能。」 


「咁奸詐嘅你。」 




「哩啲叫聰明，話時話妳生日係幾月？」 


過了一整年，我還未跟她慶祝過生日。 


這方面，她保密得很，好像很少人知道。 


「關你咩事啫。」

現在的人為什麼可以惡成這樣。 


「徐嘉恩。你有無聽過一個傳說？」 




「咩傳說？」 


「聽聞如果兩個人行係哩條樹路下，有隻蟬跌落黎你膊頭，咁就代表兩個人注定今世好有緣份。」 


「你聽邊個講架。」 


「唔知呢。」 


「所以你就係哩棵樹下面企咁耐？」 




「被妳發現咗添。」 


「無人想同你有緣，想自殺都唔係咁。」 


我被她逗得大笑。 


結果真的沒有蟬掉下來。 


然後在晚上，徐嘉恩忽然MSN我。 




_____嘉恩YaN*]]剛剛傳送來電震動。 


_____嘉恩YaN*]]：「你咪問我幾時生日嘅？」 


× *,|°° 我是你的白馬王子"：「係呀，妳都唔講。」

_____嘉恩YaN*]]：「其實今日係我生日啦。」 


_____嘉恩YaN*]]：「唔知，有無禮物呢？」 


× *,|°° 我是你的白馬王子"說：「你想要咩？」 


那天，我連夜趕出街，逛了數十間店，直到一間奇怪的店才買到仿製和服給她，趕上十一點前放在她的門口，然後MSN通知她。 


疲勞萬分，卻很滿足。 


「你係咪白痴架？我講下笑架咋！」 


第二天，她回到學校就劈頭罵我。 


「喂，小姐我行咗好耐架啦。」 


「痴線。下次你要識分咩係講笑。」

「哩份係咪妳收過最好嘅禮物？」 


「唔係，我收過最好嘅禮物係一枝玫瑰花。」 


「玫瑰花？」 


說到這裡，她的眼神又好像有點傷悲，我就住口不說。 


「妳中唔中意？幾時著黎睇下？」 


「白痴仔，你知唔知嗰件係咩嘅和服？」 


「嗯？有分架咩？」 


「低能。唔想理你。」 


「喂，咁妳即係幾時著呀？」 


一陣涼風颼颼吹過，撥動她的長髮和裙擺，吹得幾塊枯葉輕浮飄過。 


這一刻，她美得讓人心動。 


她沒有再回應我。 


只是她罵我白痴仔時，笑容前所未有的燦爛。