〔異能〕〔餐廳〕《忘憂草》（齒輪兄弟會：庖丁）: 14. 考核

「係呢解懷。」 「嗯？」 「你入左『聖殿』之後，有冇出過差？」欣頴捉著我的手問道。 「梗係有啦，我仲返過一次香港添。」 「點解有得公費旅行咁正架！」聽到後欣頴抱頭蹲在地上。 「喂喂！我呢啲揾命搏架。」我叉著腰看著欣頴苦笑。 「我唔理呀！點解O61咩都無架？」欣頴仍然在耍賴。 「解懷，欣頴姐姐係唔係痴左線？」傑克拉著我另一邊衣袖問道。 ……………… 在「聖殿」的會議廳中，柯林正滙報著他們在馬賽的任務。 「點解你唔喺車長室落多重防護？」蓋恩聽後緊皺著眉，對自己的徒弟表示不滿。 「好對唔住，係我諗得唔夠周詳，加上魔力唔夠……」柯林說完低下了頭。 「算啦蓋恩，對方出動狼族嘅上級狼人，我地至少係應該派『武士』去。佢地三個無事已經好好彩。」羅倫斯開口打圓場。 「大領主」羅倫斯，唯一長駐在湖中堡的近侍，主要負責城堡的防禦和安全，另外亦兼顧任務的指派和監獄的管理。他的能力並不是直接戰鬥型的魔法，而是範圍型的魔法—「領地」。在他的魔法範圍內，他的意願具有極高的優先度，甚至能一定程度改寫現實的規則。可以看作是柯林魔法的進化版。 「呢個問題先唔講，你頭先話解懷自己去追嗰兩個狼人，完成任務仲解決左佢地？」杜平問道。 「係。」 「我明啦，辛苦晒你地，你出去先啦。」 「係嘅先生。」說完後柯林躬身離開。 待柯林走後，杜平轉頭詢問羅倫斯及蓋恩：「你地點睇？」 「上級嘅狼人應該超出佢地嘅應付範圍，支援型嘅朴靜潔，開始任務先一年嘅解懷，加埋非直接戰鬥型嘅柯林。佢地居然可以平安返黎，仲完成任務。睇黎蓋恩你教學生有一手喎。」羅倫斯看向蓋恩。 「我都好驚訝，睇黎『雙頭龍』呢個實驗比預期成功。」蓋恩道。 「No.XIX喺追逐『魔鬼之顏』嘅羅拔泊中不幸身亡，我地需要一個新『武士』。」杜平沉吟道。 「我唔覺得解懷有呢個水平。」蓋恩開口否定了這個提議。 「但佢的確單獨擊殺左上級嘅狼人，無論計謀定武力都達到要求。」羅倫斯不同意。 「咁啦，我問下『聖女』殿下嘅意見先，而且我目前有一個需要佢嘅任務。」杜平揚了揚手中的信，開口制止了兩人的爭論。 「嗯。」 另一方面，我並不知道蓋恩老師他們的討論，不用滙報的我正在廚房忙著準備材料。這次的任務如此驚險，以老師的性格柯林一定被罵得狗血淋頭，所以我決定大展身手慰勞一下他。 今天我準備的是巴斯克燴雞（ Poulet Basquaise），首先用小火把雞腿煎至焦黃後盛起備用，接著把洋蔥和甜椒以中火炒軟並適量調味，加入大蒜和辣椒拌炒，然後加入番茄炒至軟化。把雞腿放回鍋裡，將甜椒鋪放在雞腿上，蓋上鍋蓋，以小火燴煮至收汁，稍作調味後即可。 巴斯克燴雞的味道微帶酸辣辛香，令人垂涎欲滴，同時繽紛的色彩亦讓人食指大動。 剛好垂頭喪氣的柯林走進來，步入廚房的瞬間他便被香氣吸引，沿著味道尋來。 「嘩！好似好好食咁喎。」柯林兩眼放光地看著鍋子。 「坐低啦，預左你嗰份架啦。」我把鍋子放好，把他的那一份分給他。 柯林接過後急不及待地吃了一口，然後閉起雙眼陶醉著：「你唔做廚師真係嘥晒。」 我笑了一笑沒有回答，自己也吃了一口。微辣的辣椒，酸甜的蕃茄及甜椒，三者的味道完美平衡，構成了一道吃後令人歡愉的風味菜餚。 「靜潔真係無口福，要做檢查。」柯林一邊吃一邊道。 「無辦法啦，俾狼人咬完，都係小心啲好。」頓了一頓，我問道：「點呀，俾老師鬧完黎？」 「唉，好彩羅倫斯大人喺度咋，如果唔係我就死得慘啦。」柯林搖搖頭，然後像想起什麼般抬頭看著我：「不過杜平先生好似對你嘅表現幾有興趣。」 「係咩？」我不以為意，就這樣結束了這頓飯。 如是者過了數天，這天我完成了上午的訓練後，梳洗一番又到了廚房找食材。正當我準備動手時，門口傳來了杜平的聲音。 「果然喺廚房最易揾到你。」 我回身看去，只見一身白西裝的杜平拴著紳士杖站在門口。 「杜平先生？」我連忙迎上。 「我係黎揾你嘅，你準備食晏？」 「係呀先生，一齊？」 「好，咁我喺隔離等你。」說完後他便離開了。 我一面拿出材料一面在想杜平先生找我的原因，自己的食慾反而不見了。 「賢者」杜平，「聖殿」的No.II，歐洲中與梅林齊名的大法師。同時也是「聖殿」的謀士，掌管了情報，計策和實驗等各方面。一身實力深不可測，是「聖殿」的中流砥柱。 這樣的大人物找我有什麼事呢？ 我懷著疑問端著菜走到隔壁的屋子，杜平正坐在桌前看著一份文件。 「你黎左嗱？咦，你唔食？」 「唔啦，先生你揾我？」我把疑問說出。 「係呀，你唔食咁你睇左呢份文件先啦。」說完杜平把手中資料交給我。 我就在他享用午餐的同時細細閱讀著手上的文件，看過後我終於明白他找我的目的。 杜平用餐後，一手用餐巾擦嘴，一手豎起姆指，笑瞇瞇的道：「妙極！咁嘅手藝喺『聖殿』太大材小用啦。」 「可能我退役後開餐館算啦。」我微微一笑。 寒暄了幾句後，杜平終於步入正題，他站起身往門外走去。我連忙放下手中文件跟上。 杜平頭也不回，從懷中掏出一台古董傳呼機遞給我。 我接過一看後臉色微變，情形看來比剛才的文件所述更複雜。 杜平先生接下來又交代了一些事，雖然沒有明說，但我明白這次的任務不像以往的那麼單純。 「所以杜平先生，今次嘅任務係？」 「嗯，係一個考核任務。」 說到這裡不得不說一下「聖殿」的架構，「聖殿」由首領「聖女」珍娜·查理曼率領，往下便是以奧蘭多伯爵和杜平先生們所組成的十二近侍。十三人組成了「聖殿」的權力核心，是「聖殿」的最高戰力和決策層。 往下是二十七名武士，對應著法國的二十七個大區。每一位武士的能力都能獨當一面，是「聖殿」的中堅戰力。接著才是我和柯林們現在身處的學徒階層，作為戰力中最基層的存在，必須兩人或以上的執行任務，是人數最多戰力最參差的一層。 近侍及武士的人數是固定的，只有出現陣亡或有人離開才會有補上的機會。而補上的人選則要通過考核任務。只有通過了才能成為新一代的武士或近侍，亦只有武士開始才能擁有稱號。學徒階段就能擁有稱號是十分罕見的情況。 我雖然亦希望得到稱號，但對能完成考核實在沒多大信心。不過這個地方，或許真的可以一試。 「咁，我聽日就出發去香港。」 「好啦咁。」杜平呼了口氣,面上掛著笑容:看著我：「祝你好運。」