【網遊】詩聖神話: 第六十一章：小蕾的存在
『ただあなたと一緒なら構わない。』
過往一幕幕的事仿佛回到我眼前，我記得琉璃說過她喜歡說日文的原因是因為日文很溫柔，不像廣東話般太過率真。
我放開葉月，微笑道：『好啦，團聚的時間過去啦，又係時候踏上冒險之路！』
葉月繼續讓我抱著，絲毫沒有離開之意。
『喂，琉璃 ~ 』我曲起手掌在她耳邊傳聲：『喂，琉璃，放開我啦喂 ~ 』
她仍是說：『難得我哋見到面，我又同你表白咗咁，小語你就抱多我一陣啦 ~ 』
『唉，真係冇你收，一陣就一陣啦。』與她抱在一起的時候我從來未感受到如此平靜，這是重逢的安心嗎？
『ありがとう 。』她笑得很甜，甜到膩了。
其實我還一事要跟她說的，就趁現在多停一會說明一下。
『琉璃，可唔可以唔好再叫我小語呀？』
她一雙眼睛瞪大，疑惑地看著我：『點解啊......』
『清語嘅時代已經過咗去，而且我從來冇喺其他人面前提過呢個身份，所以......唔好叫我做小語？』我請求道。
她不高與：『欸......你宜家咁麻煩架，婆婆媽媽。』
『求．下．你．啦！』
『得啦麻煩友！如果我當初知道現實嘅你係咁撚婆媽我仲洗撚鍾意你咩！』她恢復到葉月的粗口狀態。
『咁我叫你小恆算啦，』葉月說：『取而代之，你都要改變我嘅叫法架！』
『喂！淨係識話人婆媽，你自己都係咁！』我察覺到不妥。
『兩樣嘢點同啫！細心啲聽埋啦契弟！』
『唓，』我咋舌道：『明明頭先成個大喊包咁，宜家就突然咁有火，嗰陣你咁溫柔，都唔知你呢三年做過咩嚟。』
『作死呀你！』久別的重砲擊啊...…
頭頂再次起樓，葉月接著說：『就算你唔喺我身邊我都會成長架！』
『不過向住某個奇怪嘅方向成長呢......』
『仲講吖嗱！前世欠打啊你！』她揮舞拳頭。
『咁睇你似我老母多啲喎，某種意義上。』
她拳頭亂打：『你再話我老吖！你再話我老吖！你再話我老吖！』
『哈哈哈！』這刻的葉月相比以前少了一種千依百順，但多了一鼓傲氣，有傲嬌的潛力。
『唔玩啦！入正題啦！』她說不贏我。
『我嘅意思係......我想你叫我慧兒呀......』
『吓！？』我合不攏嘴：『慧兒？』
『我真名係葉慧兒，所以我想小恆都唔好再叫我琉璃啦，直接叫我慧兒啦。』
啥！？
『琉璃......嘅真名......』我無法相信居然有女生跟我這樣說。
她忽然間嬌羞起來：『因為......因為我知道咗小恆你叫銘恆，所以我都想你知道我真名。』
『慧兒，嗎？』
『嗯，咁應該算係我哋約定嘅其中一部分，如果要喺現實見面嘅話自我介紹係一定要做啩。』她說得好有道理，我竟無言以對。
原來她說改稱呼是這個啊...…
我說：『咁我都重新自我介紹一次，我真名係銘恆，姓徐，不死珊個徐，年齡嘛......琉璃你應該知道的。』
『係慧兒！慧兒！』她抗議。
『得，慧兒，慧兒。』我重複一次：『慧兒你應該知道我年齡的所以不介紹了。』
我和慧兒是同年的，三年前星域時期我們就提過了。
『咁我都重新自我介紹一次，我真名係慧兒，姓葉，葉問個葉，年齡嘛......十七歲，將來也是十七歲，永遠都係十七歲，夢想係做十七歲教主，不過宜家做咗你老婆。』
十七歲教主？真虧她想得出。
『よろしく，銘恆。』
『よろしく，慧兒。』
我們兩人玩起自我介紹來，然後相視而笑。
--------------------------------------------------
月神殿一層，被清空的BOSS房間。
我和慧兒久別重逢後正在尋找通往下一層的入口。
可是無論怎樣找，這個大廳只是條死路，連個門的影子也看不見。
『吶，真係有第二層咩？我哋搵咗好耐啦 ~ 』慧兒說。
這地方難道真的不能繼續下去了嗎？
我們其實在一層往前往後跑了幾次，但論入口除了送我們進來的地方外，什麼也沒發現，使我和慧兒氣勢盡喪。
『喂，小恆！聽唔聽到呀？不如休息一陣啦！』
嗯，這樣也好，讓自己休息一會可能會有不錯的發現。
自從我們兩人相認，昔日與慧兒一起刷副本破記錄的默契盡數回歸，漸漸學會與她的思考模式同步。
我步近原來站著黑刃的高台，高台邊緣是唯一可以坐得舒服的位置。 這時一道小小的藍光在我肩膀上閃現，藍光消去後我的肩膀上坐著一個熟悉的身影。
『哈呵 ~ 仲係好眼瞓呀 ~ 』小蕾坐在我身上打喊路。
NPC要睡覺的嗎？
『小蕾 ~ 頭先去咗邊呀？』我不懷好意地笑著，難怪身邊總是少了一把元氣的聲音。
『啱啱瞓醒囉，我記得瞓著之前好似係同......』
『吖，記得啦！小蕾瞓著之前係跟住雪姐姐同傾城姐姐架！』她還是那麼元氣。
『不過我又冇得打埋一份，真係悶到我死呀！』她像個小孩子那樣踢腿。
『所以？點解宜家先返嚟？』
她單眼裝可愛說：『因為我最鍾意就係白痴主人囉！』
突然就被人說喜歡，太......太害羞了吧，還有哪裡有人會一邊說喜歡一邊說人白痴啊喂！
『真心話呢？』
她飛到半空：『主人做咩唔相信小蕾喎！』
『小蕾一向都咁鍾意主人架！』某種意義上能夠若無其事地告白的小蕾算是挺厲害的。
『真心話？』
她手指打圈：『同主人一齊好似永遠都有驚喜，所以跟實主人一定唔會悶啫！』
原來她是怕悶嗎...…
『小恆 ~ 我過嚟你呢邊啦 ~ 』慧兒招手。
我有種不祥的預感。
『主人 ~ 』小蕾改變語氣，冷笑道：『果然跟住主人一定有驚喜哩，哼哼哼 ~ 』
幹，連小蕾也有醋罈子模式？
『可唔可以同小蕾講，個女仔到底係咩人呀？』她那小小的身軀散發出不合比例的可怕氣場：『唔會係新情人嚟架可？』
『如果係嘅話我可以幫雪姐姐解決佢，』她舉出手刀，陰沉地笑著：『我唔會畀任何人接近主人架，嘿嘿嘿。』
捉姦現場的既視感。病嬌小蕾超可怕啊！
慧兒發現了小蕾的存在，說：『小恆你身邊嗰隻可愛嘅生物係咩嚟架？』
『小蕾係主人嘅精靈，多謝偷腥貓對白痴又花心嘅主人嘅關照。』怎麼她說話好像有刺的。
慧兒感受到來自小蕾的敵意，淺笑說：『哦，小恆嘅精靈嘛，啫係NPC啦。我係你主人嘅『老婆』，我叫葉月。』
慧兒特登強調老婆兩個字向小蕾示威。
『白痴主人！原來你唔止有新情人，仲要係老婆！我憎死你呀！』小蕾中了慧兒的激將法。
『啊啦啦？原來小蕾咁著緊你家主人架？』
『唔關你事呀！偷腥貓！』小蕾伸出舌頭。
『點會唔關我事啫？我係小恆老婆嚟架 ~ 』慧兒挽著我手。
『白痴主人！白痴主人！白痴主人！』小蕾急起來：『主人頭先至同小蕾勾完手指尾，宜家咁快有第二個，呃人嘅！』
慧兒不甘示弱：『三年前我已經係小恆老婆啦，你先至係偷腥貓！』
果然女孩子都是說一套做一套的，慧兒不是說只要一起就好了嗎？
『唔好一見面就咁嘈啦你哋兩個。』
她們異口同聲：『你收聲！搞成咁嘅原因係你呀！』
為什麼女生在這種時間總是特別有默契？
『主人會搞到雪姐姐、雨姐姐同小蕾唔開心架！』
『我估唔到小恆你連蘿莉NPC都啱，呢三年嚟係咪太掛住我飢不擇食呀？』
好吧，我輸了，你們繼續。
小蕾和慧兒怒目對視，四目中間像是擦出一道道的電光石火，生人勿近。
當然，最後勝利者是慧兒，落敗的小蕾不爽地飛到高台的另一角坐著，小臉沒有看過來。
兩女的戰爭終於結束，但氣氛仍然很僵。
『喂，慧兒，嬲完未呀？』
『我根本冇嬲過。』可是你的樣子出賣了你。
『我先唔會因為一隻平胸蘿莉NPC精靈而嬲哩！』她這絕對是傲嬌。
小蕾雖然坐得很遠，但似乎慧兒說了她的敏感詞，在那邊喝道：『你就平胸！我原本比你隻偷腥貓大幾多呀！』
『繼續吹。』慧兒不為所動。
我夾在她們中間聽著她們高聲談論胸部的問題，聽得我耳根發熱，急忙叫停：『停啦好嗎，唔好講哩個話題喇。』
她們同時靠上來：『咁老公 ( 主人 ) 係貧乳派定巨乳派吖？』
我就說不要再斟酌這個問題好不，好歹我是個健全男性呀。
胸不平何以平天下，乳不巨何以聚人心呢？古人智慧實在了得，可就是救我不了。
『咳咳，我唔係睇胸識人嘅變態。』完美啊，這句萬無一失。
忽然左右手臂各被捏住，一輕一重，痛得我死去活來。
『講得出哩句啫係話你係哩種變態啦！去死啦！』兩女使勁地扯起我的皮膚。
穌哥，我要來找你了。
小蕾和慧兒下火後，慧兒依偎著我，問道：『あなた，你鍾意小蕾？』
慧兒這次是認真的。
『鍾意嘛......唔知，我只係放心唔落，同佢一齊就好似以前同你形影不離嗰種感覺。』我說。
『即使係NPC？』 『或者啦。』
『あなた，我覺得小蕾唔係一般嘅NPC。』慧兒入正題。
我早就察覺小蕾不是一般NPC，但在無實據之下難以證實我的假設：『你覺得小蕾有咩唔同？』
『如果小蕾係NPC，咁佢就係NPC入面唯一一個可以用廣東話同我哋正常交流的人。』
說得也是，目前為止接觸過的白河和白婭，他們說話都是文鄒鄒的，理所當然知道自己身處遊戲。
但跟小蕾一起的時候，總覺得她不是一個NPC，而是工作室的其中一員。
想不到慧兒甚至比我更快點明這疑點。
那麼，回歸原點，小蕾到底是什麼？輝二隱藏了些什麼？更重要的是，再這樣下去我怕我會喜歡上她。