Week33 Tue

經過琴晚餐飯之後令我諗咗好多嘢。

Janet無疑係一個所有男人都夢寐以求嘅女人,後生、靚女、有錢、如果佢冇講大話嘅仲係萬中無一嘅處女。相比起阿Kit,最大優勢就只係我嘅初戀情人,甚至我想同返佢一齊,都只係為咗當年個份唔甘心,當年原本屬於我,但又突然離我而去嘅……肉體。

係呢個煩惱嘅時刻,當然唔少得一個專業嘅意見啦。

Eric聽完之後第一個反應:「你有冇再痴線啲呀,唔要唔好哂呀,益下兄弟啦。」





然後Eric嘗試用一大堆客觀嘅理由去說服我放棄阿Kit,當中嘅理由其實都不無道理……其實我都不過想有人係理念上支持下我揀Janet嘅行動。但係我都係決定……

「俾我考慮下先。」

「兄弟,睇黎你真係痴得好嚴重下,面對住Janet咁多客觀嘅完勝條件,你都仲要考慮,睇黎阿kit一係就真係好吸引,一係你俾人落左降。」

「不過做兄弟嘅,就係要睇住你明明行緊條死路都會推你去死,起碼你唔試過唔心息,但唔好話我唔提你,如果你選擇左阿Kit,你面對嘅壓力定係問題都會比俾人話你食軟飯嘅壓力嚟得更大。其實你我心知面對條件咁完美嘅Janet你都要有所考慮,其實只係出於一個最原始嘅理由。不過愛可唔可以當飯食先?你離開左Janet,冇左呢份工,你仲有冇能力去照顧阿Kit兩母女呀?」

果然係好兄弟,面對住呢啲咁重大嘅人生決定入面,竟然一反常態,咁詳細(同長氣)咁去為我分析,其實佢所講嘅我都明,但我真係需要一啲時間去消化。但係我今晚真係好開心,自從阿Moon件事之後,我都冇再見過一個咁認真嘅佢,今晚佢竟然會為咗我呢個咁優柔寡斷嘅人而再流露出咁認真嘅自己。





兄弟呢家嘢,真係情義在心中啦。