短篇散文集: 《聖誕情人節》

係經過咗咁多次同阿穎過節嘅經驗，我大概都知佢係一個真係冇乜所謂嘅人，既然係咁，乜鬼嘢平安夜啊，聖誕呀，小事啦。

「阿恆呀，我今年嘅聖誕要過得特別啲嘅！」嘩，大佬，你玩我呀，而家嚟講啲咁嘅嘢……

「你想點特別法呢？」如果你話要隻聖誕老人爬煙囪入嚟送禮物俾你嘅，咁原諒我嘅無能，事關唔係爬唔爬嘅問題，而係你住個到跟本冇煙囪！

「我想有啲特別啲嘅驚喜！」咁好易啫，你即刻搵間銀行開返個投資戶口咪得囉。立即開戶我哋即刻有特別驚喜回贈俾客戶！

「具體啲得唔得……」





「唔知呀，總之要特別啦！」我突然覺得過往咁多年嘅考試都係好簡單……

「點解無啦啦偏偏係聖誕你要咁重視呢……」

「咁上年同唔到你過，今年梗係想過埋上年嗰份架啦！」其實我應該唔係上年先出世，咁你係咪應該送返咁多年嘅生日禮物俾我呢……

「聽講，上年好似係你大小姐唔得閒，所以先攪到我lonely christmas咋喎，唔係應該你諗嚟補償架咩……」

「我唔得閒你都自己去咗蒲啦，你仲好意思講！」





Fine…我錯。啊！係喎，差啲唔記得阿穎呢個乖乖女係同我一齊之前唔好話粗口，連串人都唔識架喎，咁夜場更加未落過啦！

於是係平安夜當晚，我將阿穎帶咗入呢個咁多姿多彩，令人樂而忘返嘅…蘭桂芳。

其實嚟呢到志在俾阿穎一種新鮮感，迎合返佢要嘅「特別」，所以我只係買咗兩支酒企係個出口位附近，欣賞下呢到啲氣氛（女）。

「點解啲人成日話呢到好玩，我一啲都唔覺嘅…」由於我俾眼前一班岡本嘅promoters吸引咗視線，所以其實冇理到阿穎講啲咩。

阿穎發現我冇留心佢嘅說話，再跟住我嘅視線望埋去，視點落咗係一班條裙著完等於冇著過嘅「模」promoters身上，之後話：「而家佢哋好靚咩吓？！」





俾阿穎嚇一嚇，即刻回返魂：「唔係呀，咁作為一個社會學出身嘅生物，梗係要學以致用，多啲觀察下人類行為架麻。」唔知班promoters 會唔會用返佢哋件產品呢？對腳分到咁開唔知歷練咗幾耐呢？

「仆街啦死咸濕仔，而家我冇嘢睇咩！」阿穎邊講邊檸我隻耳仔要我面向佢。

我由上而下，再由下至上咁打量一次阿穎，之後話：「如果我想睇大笨象但又唔想入動物園嘅話，你應該可以發揮到功效。」

「哎呀，估唔到原來你好人象交架喎！」仆你個街，你估我唔駁係冇嘢講呀？讓你咋！仲要懶係冷靜咁講出嚟，做咩啫你！你估我唔出聲你就贏咗我架咩，觀眾眼睛係雪亮架，明眼人一睇就知邊個贏啦！

Hea咗唔夠一個鐘，倒數都未夠鐘，阿穎已經不停叫悶，仲拉走咗我……頂，我啲女呀……

最後，我哋嘅倒數就係返我屋企個程車上面數咗……呢個時候，我示意阿穎瞇埋眼，而我就將我份聖誕禮物，一條頸鏈拎出嚟，再幫佢帶上。

當阿穎望到條鏈嘅時候講咗句：「條鏈好老土！」

「我見你連我都鍾意得，以為你對啲老土嘢情有獨鍾咋！」





「唓，傻瓜！」講完，阿穎好快咁錫咗我個嘴一下，再講：「多謝傻瓜！」

咁我個份禮物呢……

然後我輕吻佢額頭下再講咗句Merry Christmas，或者平凡先係屬於我哋嘅幸福……

當然……呢一晚……我又失咗身俾隻大笨象！

阿穎……Merry Christmas !