今日阿強睇完報紙之後好嬲咁嚟同我講:「仆佢個街,港鐵又加價!」

「係咁架啦。」我好淡然咁答佢。

「喂,佢年年賺錢,服務愈嚟愈衰喎,咁都有得加?」

「好出奇呀?」我依然答得好淡然。

「喂,如果佢咁嘅服務質素都可以係咁加價,我啲人工應該坐直升機啦!」





「咁你可唔可以掉低份工走去絕食抗議港鐵無理加價吖?」

「你都傻嘅,為咗佢加嗰少少錢冇咗份工,你真係當我青山出嚟架?」

「exactly,呢啲咪香港人囉!」

港鐵年年加價,依然有人搭,你吹佢唔漲架。個個人剩係識好似牛佬咁走住嚟屌,一啲實際行動都冇,難怪啲霸權猖狂架喎。

「屌你咩,政府大股東嚟架喎!」





又如何?講就梗係講到急市民所需,以民為本架(參選嗰陣)。到上咗任,理得你全家瞓街咩,最緊要阿爺開心又歡喜架啫。

點解港共政府可以做咁多同社會聲音背道而馳嘅嘢呀?正正就係睇通香港人嘅心。講就梗係個個識講社會公義架,但一叫到集體罷工,睇下幾多人彩你?

「咁…咁…有啲咩大事都好多人上街吖……」

上街上一日…兩日…兩個星期…俾夠一個月你好未?最後又係和平散去,繼續返去做錢嘅奴隸,俾你搵到呀,未來嘅香港有冇得俾你洗先?

「咁係政府問題啫…咁都有人提議佔中架…」





係囉,提議囉。提咗成年,連中環嗰公廁都未佔到就已經成張底牌俾人睇哂,唔好話成個中環啦,單係條皇后大道中都未佔到都已經俾人收哂皮啦。

其實叫佔中啲人都廢嘅,商討咁耐都唔知討啲乜。行得出嚟自然會有人跟住做架啦,說穿了咪又你怕死,想搵多啲人一齊壯膽,死都多啲人陪葬。又話冇資金又要演習又剩,台灣啲學生佢哋全部家財萬貫嘅,預演咗好多次嘅?

其實香港人唔係唔及台灣人咁團結,只係香港人都好團結咁將搵錢嘅重要性放得比香港嘅未來更高,不過到他朝當人工嘅一半都去咗交通,講句嘢都要被審查嘅時候,真係唔好問點解,呢啲都你香港人自己揀。

遺憾冇錢親身去撐台灣嘅鄙人只好係到向台灣各位企出嚟同政府抗衡嘅各位講聲加油!