短篇散文集: 《我迷失在這場當兵的愛情遊戲》

作為一隻兵，每一日最常做嘅應該就係睇住娘娘個fb有咩更新，之後默默留低一個讚。 

有時會見到娘娘讚好某啲fans page，你又會將個page嘅內容仔細睇一次，想從中了解娘娘嘅喜好。 又有時會見娘娘讚好某啲寫手嘅文章，你又一次睇哂個篇文嘅內容，發現原來你正正同文中主角有相同諗法、經歷。 

呢一刻，你百感交集，娘娘讚好呢篇文，可能佢都身歷其境。你開心佢明白你嘅感受；你痛心佢正為第二個守候。 

你不停提醒自己，你同佢係兩條永遠無辦法相交嘅平衡線，偏偏一次又一次對佢泥足深陷。你會幻想，終有一日佢會見到你；你會幻想，終有一日佢會永遠和你在一起；你會幻想……你有好多幻想，最後你對佢嘅感情慢慢由幻想中無限放大，終於不能自拔。 

然而有一日，當你發現娘娘係你心入面嘅位置被另一個人所取替，你就會發現原來當日嘅付出幾咁唔值得，幾咁可笑。





但當知道新目標心有所屬嘅時候，你再一次陷入當兵嘅困局，重蹈覆轍。直到一日，你決心唔再當兵嘅時候，你驚覺身邊已經再冇可以戀愛嘅對象，從前可能一直係你身邊，等待你嘅人，比你早一步退役，搵到另一個更值得佢去愛嘅人，最後剩低一無所有嘅你繼續迷失在這場愛情遊戲……