ps:內文含極大量粗口

噚日,有個眼熟得又有啲陌生嘅電話號碼打俾我,我接咗之後,電話嘅另一端彈出一句:「喂,阿恆,我結咗婚啦!」

我認得出把聲嘅主人,於是回敬佢一句:「冇見咁耐,你去咗電視台做咩?而家又玩緊咩整蠱王呀?啲cam係邊呀?」

聽完我呢番思維咁跳躍嘅說話之後,電話中嘅佢嘅反應就好似冇我咁好氣咁話:「屌你,我講真架。」

「唔撚係掛。」





就係大概兩年半前,係一隻網上遊戲到,因為遊戲需要,加入咗一個msn group到,就係呢個時候,認識咗阿樂,即係呢個新任「老襯」。

個group雖然美其名係傾戰略,但其實都只係一大班人係到吹水,當中就以佢同我最為活躍,亦都係因為咁,令到我同佢即使個game完ser,m群解散,都依然同對方保持聯絡。

有一日,阿樂問我:「喂,冇理由識咗咁耐都唔見下面架,剩係對住個mon打字點做fd呀。」

個陣我覺得佢應該都係個啲網上凶狠,現實碌撚嘅毒撚一個,見大家係同類,咪約咗出嚟囉。

第一次見到佢個陣,我已經好後悔點解要同佢出嚟。呢條仆街由頭到腳,由頭髮到手指尾塊指甲都完全將MK仔呢個字演繹得淋漓盡致。反之我呢?你只要將你係條街到見到個一望就覺得佢係條死毒撚嘅樣想像成係我就得架啦。





MK仔同死毒撚跟本就兩個世界,但奈何冇理由話走就走架,唯有死死地氣同佢行陣囉。係得MK行,都離不開旺中,潮特同中間條菜街,不過我就係唔明點解佢可以行咁耐。

沿途聽嘅都係佢一個人嘅solo,食過幾多條女,有幾多條女為咗佢落過仔,真係心諗,關我撚事咩,同個毒撚講,博我葡萄咩?

佢愈講,我愈睇呢條友唔順眼,不過我呢啲毒撚都係諗就凶狠……

終於捱完呢幾粒鐘,之後幾日都冇乜嘢傾,跟住有日佢打俾我,把聲聽落好似喊過嚟,跟住我出於想聽下佢點仆街嘅心態,又聽咗佢講故事啦。

但一聽,原來係佢前女要嫁人。我心諗,唔撚係掛,你前女嫁人,你洗喊?荒唔係佢嫁咗你怕冇得約出嚟打返場友誼波咩。





「阿恆呀,你知唔知點解我會變成今時今日咁呀?想當年我仲衰過你,但自從俾個初戀hurt過之後,我決心要改變自己,要令到佢後悔,點知佢今日同我講佢結婚,真係屌佢老母咩,點解我點唔可以活得比佢好架!吓?」聽到佢竭斯底裡咁叫出嚟,都真係唔好話呀,個心都有啲覺得佢可憐。

自從呢次之後,我開始對佢改觀,最起碼唔會再將佢外表MK等同骨子裡都係MK先。

而佢都唔知係咪冇乜交心朋友嘅關係,有事都只係可以打俾我呢個毒撚訴苦。

過咗幾個月,佢話我知佢拍拖。個時心諗,都唔知邊條女又受難啦。不過呢次唔止我,就連我身邊聽過佢大名嘅人都大跌眼鏡。佢竟然將自己嘅人工上繳哂俾佢條女,仲折墮到要帶飯返工。呢啲事發生係佢身上我已經以為世界末日係真架啦,點知未算,有一晚佢打嚟同我講,佢要結婚。

「唔撚係掛?你條女買重份人壽保險兼落咗你名咩?定係你有癌症未期要有人幫你執手尾呀?」

「唔係咧,我想定落嚟呀阿恆,我唔想玩啦。」

「屌你要定嘅買支AA超能膠痴住自己落張櫈到咪夠哂定囉,你幾歲呀,唔玩?」

「唔係呀,20歲唔細架啦。」





係聽完佢一堆反常嘅言論之後,我得出一個結論:佢真係痴撚咗線。

而更加印證咗一物治一物呢個theory係真嘅。

係聽到佢話要結婚之後,我哋第二日約咗出嚟hea,順便聽下佢條女有咩咁把炮,冇雀嘅腳仔都收服到。

今次出到嚟,我再一次無言,佢嘅外形可以令你幻想到你呀爸同你去MK,真係好大叔feel。以往嘅MK裝冇哂,更加打破咗我對一個二十歲嘅人應有嘅衣著嘅認知。

「攪咩攪到仲霉過我?仲咁睇唔開結婚?」

「其實就咁嘅……」

「屌你唔好一路講一路淫笑,真係好撚難頂,你正常返少少唔好發哂姣咁講ok?」





「咩啫,邊有啫,其實就咁嘅,有次我返工,佢係屋企洗洗下塊破璃甩手,撞到隻腳再成塊碎哂咁插落隻腳到,咁之後梗係要入院啦。咁我個陣未知嘅……」

佢嘅姣樣令我忍唔住再打斷佢。

「如果係我認識嘅你,應該係第一時間反面唔識佢,跟手著草返越南避返一頭半個月先返嚟,然後再當冇事發生,繼續蒲個啲嚟架喎。」

「我都以為我會咁呀,點知佢過兩日打俾我,講返件事我知,仲話可能以後要坐輪椅喎,我即刻飛去睇佢,仲講咗啲你都想像唔到嘅嘢呀。我話,以後就算你行唔行得返都好,你去邊我都會陪住你去邊。唔止,之後嘅日子,佢係醫院唔方便去廁所,佢嘅屎都係我執架咋。」

「嘩,我屌,你頭先隻手仲搭住我,返去要用1:99先得。喂,真係唔撚似你作風喎,咁婚禮個到點?」

「冇點架,求其擺兩圍,請啲朋友同親戚食返餐算架啦。」

「嗱,講明先呀,我人到禮唔到架。」

「都冇人話請你。」





「仆街啦你!」

「哈哈哈哈哈哈哈哈哈哈哈……」

11月15日,呢條仆街嘅婚禮我就冇出席啦,不過遲來的祝福都好過冇啦,阿樂,新婚快樂!