今日幾經辛苦,係PAD到終於升完阿穎要用個隻寵,當我正值興奮之際,阿強突然間走出嚟同我講:「你升嚟俾空氣用呀?你早兩日先懶瀟灑咁刪哂人哋所有嘢,而家升嚟睹物思人?」

我頓時俾阿強串到啞口無言……

阿強仲要窮追猛打嚟話我:「你話你啦,懶係型咁刪哂人哋fb,電話。好啦,以為你終於威返次,可以及早離開佢。丫,我屌你真係癲架喎,得閒無事又加返佢電話嚟望下個wtapp status,而家咩,網絡跟蹤狂呀?好心你咪咁撚變態啦。」

「你俾我解釋下得唔得呀,唔好好似個口裝咗ak47咁ok?」

「挑,你仲想解釋啲咩,你敢講一句你冇咁做?」





「唔係……不過……其實呢,我刪完佢之後,佢有搵過我……」

呢個時候,阿Mary都走埋出嚟加把口:「咁你有冇諗過佢搵你做乜先?」

「咁……佢搵得我就梗有原因架啦,又唔係佢肚入面條蟲,佢唔講,點知喎……」

阿強忍唔住又話:「咁你煩乜春,係有事嘅佢自然會講架啦,咁佢唔講,點知啫,呢次我撐你呀廢柴。」

雖然俾條濕柴稱呼做廢柴好唔鋸,不過我大人有大量原諒佢。





呢個時候Mary就話啦:「女人要關心架,你唔問佢點會講啫,你問多兩問就自然講架啦。」

阿強:「屌,問多你兩問又話人煩,咁你有事直接講唔得架咩?」

「你兩條姦夫淫婦收聲死返入房唔好係到嘈住哂啦!!!」俾佢哋煩到癲嘅我,決定趕返佢哋返炮房,靜靜哋咁思考。

佢哋二人齊聲說道:「仆街啦你,抵你成世做兵呀。」呢刻應該係佢哋係張床以外最合拍嘅時候……

其實我同阿穎呢種咁怪嘅關係已經loop咗成年。





記得有次係個pad wtapp group到,有條友問,如果個女仔成日對住佢好忙,其實即係點。個下睇完都笑咗出嚟,更加忍唔住回咗句咁嘅嘢:

「嗱,你屋企有冇鏡呀?冇都唔緊要架,你塞個頭落廁所照下自己個樣先問人啦。」答完之後心感不妙。我並唔係怕俾佢尋仇,反正通街仇家,想斬我嘅人荃灣排到落柴灣,多佢一個唔多啦。我之所以感到唔妥,係因為……個情景咁似我嘅!!!!!!

每次阿穎都好似唔想應我啲信息咁,於是有一日,我諗到一個令到佢開心嘅方法。

消失係佢生命入面。我知道,只要我離開,佢就會開心,所以我就將所有有關佢嘅嘢,全部洗哂。係我做哂呢堆事之後,阿強無啦啦走出嚟話:「其實你刪哂佢啲嘢,只係佢消失係你生命入面,你刪唔代表人哋都刪架喎。」

係喎!!!!屌,咁我做緊乜……

其實問心,我唔捨得,好唔想離開佢,然後個天好似聽到我後悔嘅聲音咁,俾咗次機會我。阿穎加返我,點知我再次懶係瀟灑咁,刪咗佢。

阿強話:「其實你成日做咁多多餘嘢,其實有冇考慮過為地球出分力,用少地球幾十年資源呢?」

「唉,其實我最擔心佢有事搵我又唔講,點算……」





Mary突然又係唔知邊到彈出嚟話:「屌,你冇口,唔識問嘅?」

阿強:「屌,你冇口,唔識直接講嘅?」

呢兩條友真係好撚煩,次次出嚟都係到屌嚟屌去,攪嘢返入房啦。

爭扎完我決定問返個正常人意見。

「喂,小妹妹,聽完件事你有咩評論?」我打咗俾一個收兵收上癮嘅,人哋嘅女神問。

「嗱,你而是家應該好好咁用18字真言鬧佢,之後再好瀟灑咁封哂佢,咁你就型啦。」

「sorry,我原來打錯去青山……」





「屌你,好啦,唔玩啦,認真啦,你係咪好鍾意佢?」

「係,絕對係!!!!!」

「咁就去搵佢啦。」

「屌,我都話,我應承咗唔再搵佢咯。」

「男人最叻係咩?反口丫麻,咪扮啦,去你就去,我啲兵要出糧,今晚我又有好嘢食啦,你咪阻住我啦,不過如果你想過檔嘅,歡迎你填張入伍申請表,再交嚟我到,24小時批核架,好啦,係咁先啦,你慢慢食自己啦,拜拜!」

「睇住啃死你呀仆街……」話音未落已經俾人收咗線。

唉,真係不禁替佢啲兵可憐……

係聽完呢番「專家」嘅言論之後,我決定聽從佢嘅意見,我打開facebook,將個問題send完出去,隔咗陣見到「19:43分已閱讀」,一個鐘…三個鐘…落線…都係冇回應……





或者,所有嘢,都只係我諗得太多……