短篇散文集: 《其實騙人反話，只想俾你氹下》

一生人當中，你講過幾多大話，去掩飾自己做錯嘅事、去呃自己嘅對手，甚至呃自己？

細個做錯事，我哋會諗盡一切嘅辦法去隱瞞，但可能真係太幼稚啦，父母總係一眼識穿我哋嘅大話。當時嘅我哋，可以只係因為要隱瞞同朋友打交，默書唔合格，欠交功課呢啲小事。

然後人大咗，睇清呢個社會嘅現實，人與人之間互相爭鬥，分分秒秒都想置你於死地嘅時候，你為咗自保，你會帶住面具去面對住呢班人，或者用唔同大話去呃自己嘅對手，令佢減低戒心。

不過呢啲為咗自保而講嘅大話，一啲都唔恐怖，因為係為咗保住自己，唔俾人傷害。

最可怕嘅係個啲，連自己都呃埋嘅大話。或者叫做反話會比較貼切。





明明自己係好鍾意一個人，但因為一籃子嘅外在因素影響，於是扮作漠不關心。最後，你鍾意嘅人，亦以為你對佢只屬友情，最後佢選擇咗同第二個人一齊。何等諷刺嘅結局。

明明女神約你出街，你理應狗衝，但偏偏貪佢氹你求你嘅一下，你扮哂大牌話要睇下得唔得閒，最後你永遠錯過咗最愛嘅人。呢個機會，係你自己親手將佢拱手相讓俾人。

明明……其實有好多明明應該會按照劇本發生嘅事，就因為你一時嘅貪玩，貪心，從此錯失咗呢啲機會。而多數嘅貪，都係源自你想有俾人重視嘅感覺，你想俾人氹，你想試下，佢會唔會了解軀體以內嘅你。

你好想有個人可以將你嘅面具拆穿，同你講：「你呃到全世界，都呃唔到我。」

你好想俾自己深愛嘅人重視，關注，你好想俾佢氹，那怕只係一兩句，都足以令你有飄飄然嘅感覺。





於是，你做出好多傻事，好多總係違背自己想法嘅事，好想佢可以睇得出，呢個你，只係扮出嚟，真正嘅你係幾咁需要佢，幾咁想大聲講句：「我愛你。」

反話嘅可怕之處就係，當你講咗一次，失敗之後，你會唔甘心，然而反覆咁違背自己，為嘅只係想佢有一日終於注意到。可惜，佢只係見到最表面嘅你，可惜你已經唔可以再係佢面前表現出真正嘅自己。

反話比大話更恐怖係因為：大話傷人，反話傷己……