短篇散文集: 《你永遠都不會知道……》

街上開始掛起各式各樣嘅聖誕燈飾，商場都佈滿聖誕氣氛，係呢個普天同興嘅節日，阿恆自出世開始十八年嚟，第一次相約佢青梅竹馬嘅阿穎平安夜共渡佳節。

點解青梅竹馬都會係第一次？小時候，大家都只係各自同屋企人過，到升咗中學，阿穎識咗男朋友，呢啲咁重要嘅節日當然係陪男朋友啦。咁多年嚟，阿恆都只夠睇住阿穎節日同男友出街嘅親密照，而自己就每逢佳節上高登。

終於，等咗咁多年，阿恆不禁黑心咁諗「今次仲唔到我！」。無錯，阿恆一直以嚟都好鍾意阿穎，不過就一次都冇講出口，只係一路係佢身邊擔任一個姐妹嘅角色。

當阿恆聽到阿穎同佢男友分手個陣，一方面為阿穎感到傷心難過，另一方面又有一絲慶幸自己終於有機會。就係佢開口邀約阿穎，阿穎又答應嘅一刻，阿恆當場興奮到跳起，激動得幾乎落淚，彷彿阿穎答應下嫁俾佢一樣……

自從阿穎答應之後，阿恆冇一日唔希望聖誕快啲來臨。獨自一個人過咗咁多年聖誕嘅阿恆，經常不禁去幻想同心愛嘅阿穎一齊細賞燈飾，慢步海邊嘅滋味，光是幻想就已經足以令阿恆樂透半天。





時間就如阿恆所望一樣，一轉眼就到咗平安夜，阿恆一早起身，梳洗好之後，就等阿穎起身。

10點…11點…12點…

等到下晝2點幾，阿穎終於sms阿恆。

「起身啦，我哋去邊呀？」

「去尖沙嘴睇完燈飾再去荃灣倒數聖誕丫！」阿恆一邊回覆，一邊會心微笑。





入夜後，鐘樓下企住一個青年，時而傻笑，時而踱步。

呢個時候，一個睇得出悉心打扮過嘅女仔映入青年眼簾。阿穎化上淡妝，身穿一件紅色毛毛外套，下半身配上一條黑色短裙加對黑絲襪，一對啡色毛毛短靴。阿恆第一次見到阿穎化妝，眼前一亮。

「er…第一次見你化妝…好靚……」對住青梅竹馬嘅好朋友，阿恆突然變得靦腆。

「哈，多謝~」

對阿恆嚟講，今晚就係夢一樣，可以同阿穎一齊過平安夜，可以同阿穎面貼面咁影相，一切一切都係得嚟不易。影完燈飾，再慢步星光大道，係一個充滿聖誕氣氛嘅夜晚，或者係一段愛情萌芽嘅好時機……





行咗陣，佢哋都發現原來未食飯，於是諗住直接返荃灣廣場，食完飯順便倒數。

係荃灣廣場內，佢哋隨便揀咗間日本餐廳排隊。點知排排下隊途中，阿穎接到一通電話……

阿穎吞吞吐吐咁同阿恆講：「阿恆…我前男友打嚟話想我陪佢倒數…」

阿恆先係沉默咗一陣，之後話：「你去啦……你問得啫係證明你唔捨得，咁你返去啦……」

阿穎再冇講一句說話，轉身就走……

阿恆目送阿穎嘅身影慢慢遠去，將口袋中一早準備好嘅聖誕禮物，原本想係倒數到零嘅一刻，拎出嚟送俾阿穎，順便表白嘅頸鍊掉咗……

阿穎永遠都唔會知阿恆個心幾萬般不願放手；阿穎永遠都唔會知阿恆準備過嘅呢份禮物……

阿恆永遠唔會知阿穎嘅悉心打扮原來係為咗自己；阿恆永遠唔會知阿穎幾咁想自己開聲留住佢……





時間係23：59分

大會司儀帶領大家一齊倒數。

59…58…57……5…4…3…2…1……

「Merry Christmas !」係場內興奮嘅氣氛下，只有阿恆默然落淚……

放手唔係大方，而係on9！