《十年又過去，我對你仍耿耿於懷》: 10

有時我會想，她是不是都想默許此事？ 

「你點睇。」我這樣問Franco。我發現我和他快要有姦情了，要是他不是男人，我想我應該已經和他發生了無限次禁忌的性行為。 

「我咩點睇？」他還是一貫淡定。 

「我唔否認，佢又唔否認，係咩一回事呀？」 

「咩咩一回事，我完全唔明。」他的樣子非常狡猾。 



我眯著眼盯著他，眼前這個人的樣子太可惡⋯他知道得真的太多。我雙手不停捏緊手中的紙巾，天呀！我覺得自己太似太似一個春心蕩漾的少女了！ 

「我想問，點解佢唔否認我同佢嘅野！斷估佢只係講一句佢介意，就可以解釋哂成件事啦！」 
「咁點解你自己唔解釋？」 

「因為我講完無人會理我，大家會笑得更勁。」 

「咁點解你會預期佢講左人地就唔會笑呀？」 

「因為佢係呢件事上面係受害人呀！佢講出嚟話介意，就會有人信㗎喇！」 



他意味深長的看著的，頓一頓⋯⋯ 

「蔡梓豪，唔係咁㗎！」 

「咩呀？」 

「點解你唔坦坦白白呢？」他把一個麵包塞進口裡。「有啲嘢，你講完出嚟可能唔發覺。但你已經暗示緊一啲嘢⋯⋯」 

「咩呀？你講咩呀？」我有點著急。 



「少年心事，你自己好明顯只不過係鍾意佢，但唔敢追佢。所以，其實你根本就好享受你哋兩個俾人傳誹聞呢件事。」 

「我無⋯⋯」 

「你有。」他在包著麵包的餐紙上寫了一串號碼。「識咗人咁多年都無佢電話，點解你唔自己問一下呢？」 

9520 1413。 
她的號碼，我記住了一生。