【猴年血腥】《拜完年，我畀狗咬死左》: 6. 完美的人生 (3)

「得架咩？」我更驚訝！
 
「你係咪傻撚左？洗唔洗拎碗湯比你飲啖，等你清醒下？」恭子逞指住瀑布湯問。
 
「唔洗……」我垂下頭來。
 
「對條命仲有啲咩不滿啊？一次過講嘞。」他不好氣地問。
 
「我覺得佢好多事囉，佢班FD鍾意做咩咪做咩囉，佢係要管住人。」我指住一個畫面，「你睇下佢，幾八卦，幾鬼煩。」
 




「又冇夢想，成條咸魚咁。」我繼續抱怨。
 
「咁即係話，你唔想要哩條命？」他問，飛快地念背規章，「根據鬼差守則第二百零一條，本人已經充分向你介紹哩條命既壽命、出身、性格、遭遇，而你亦係充分考慮之後，決定放棄唔要，係咪咁？」
 
「我……」我陷入苦惱。
 
「如果你唔要既話，」他慢慢拉起右袖，把手伸入水中，「咁我要架喇喎！」
 
「等等！」我捉住了他的手，「白無常，你……要黎做咩？」
 




生命靈體再次游來游去。
 
「投胎囉。」他理所當然地答，「咁啱我有二十年假，去人間玩返轉都唔錯丫，又可以累積功德。」
 
「我呢，就實匹配唔到一條咁好既命既，依加難得有人唔要。」他興奮地，想去搶生命靈體。
 
「等等，我仲未決定！」我喝停他。
 
片刻之後，恭子逞慢慢收起右手。
 




「其實呢，先生……」他瞇眼僵笑，「你又要求夢想、又要型、又咁多不滿，咁撚高要求既話，我比一百條命你揀，你都揀唔到架喎。」
 
 
「Sorry，比多少少時間我……」我抱歉地說，雙手放在大腿上。
 
「只要比多少少時間我既話……」
 
——輕輕抓緊。
 
「計我話，你根本唔想投胎，你根本就掛住一個人。」白無常一語道破。
 
孫宣。
 
手立即鬆開了，一瞬間又再抓緊。
 




「我有冇講錯？」白無常質問。
 
「係！」我忍淚承認，「我好想再見孫宣一面，我好唔捨得佢。」
 
「你地啲人類，一個二個都係咁。」白無常搖頭感慨，「所以都叫你去飲碗湯冷靜下。」
 
「我唔想忘記佢。」我坦言，「無論如何，都唔想忘記……」
 
「無論如何，我都想再見佢一面。」
 
接著，恭子逞嘆了口氣。
 
「係咪，比你再見佢一面，你就肯乖乖地揀條命去投胎？」他輕聲地問。
 
「係！」我衝口說，又即沮喪，「但……有可能咩？」




 
再次，恭子逞嘆了一大口氣，頭都暈了一下。
 
「跟我黎。」他說，從寶箱盒中，拿出了第七個印。