[有沙入眼]是咁的，我嘅職業係幫想自殺嘅人寫遺書: 19.火化

我望住阿may條屍 

琴晚嘅永別仍然喺我腦中徘徊 

「安息。」愈黎愈多人走近去睇熱鬧嘅時候，只有我一個，轉身離開 

警察同救護人員喺我身邊跑過，所有人嘅焦點都落喺一條屍體上 

唔知道死者故事嘅人，趁熱鬧睇死屍 





知道死者故事嘅人，有責任完成身後事

當我翻到屋企附近 

我就將我同阿may嘅迪士尼全年證，仲有玩小熊維尼嗰陣影嘅相拎出黎，喺屋企附近嘅公園，點火 

銀色嘅全年證慢慢喺化寶罐入面燒成焦黑 

火舌包圍我地兩個張相，將阿may嘅肉體焚化，連帶埋我個樣 





就好似，我同佢一齊火化，變成焦碎 

「你拜託我嘅，我做左喇。」 

縷縷白煙喺半空翻騰 

我腦中亦浮現琴日，一字一句重抄遺書嘅阿may