[有沙入眼]是咁的，我嘅職業係幫想自殺嘅人寫遺書: 195.導火線

希仔自殺嘅真正導火線，佢抄遺書嘅時候咬牙切齒咁講出黎：「嗰日媽咪聽電話⋯⋯」

希仔只係想提下阿媽，應承過佢會同爸爸一齊翻黎

不過難得接通，無理由唔東講啲西講啲先入正題

「希仔呀，mami daddy好多野做架，以後呢啲小事就唔好打黎啦。byebye。」

咁你記唔記得要翻⋯⋯





仲未講完，已經cut左線

我拎翻阿文揸巢嘅遺書：「所以，個問題根本就無解決過。」

啪！

比人打左一巴，左邊面傳黎火辣嘅感覺

「希仔父母無可能永遠唔翻黎！總有一日會解決架！」都係嗰個論調，只要唔死，一切就會好翻





反對自殺嘅人，永遠相信未來會更好

所以佢地唔會明，原來有啲人，根本無辦法去相信未來

希仔，已經唔會信佢父母會翻黎

等，係因為信有希望

唔等，係因為信唔倒會有希望





所以希仔先會話，我唔等喇

我收翻封遺書，忍住痛離開

睇住一個自己輔導左咁耐嘅小朋友死，阿文心入面一定唔會好受

今次呢一巴，算數喇