[有沙入眼]是咁的，我嘅職業係幫想自殺嘅人寫遺書: 204.網絡作家

星期日，我地約左喺尖沙咀嘅habitu見面

我到左佢都未到，於是叫個曲奇沙冰，邊飲邊等

講真，我好憎人遲到

杯沙冰都溶到出哂水，條友仲係鬼影都無

我打過去又無人聽，咁樣消失法係咪撚化我？





3點，4點⋯⋯

個咖啡妹都目及下我等緊咩人，可能以為我係一隻比女神放飛機嘅柒頭部隊二等兵

等到5點鐘都無人我就blacklist呢條仆街

「唔好意思呀，我黎遲左。」

我見倒個咖啡妹真係恥笑我，而當我望到搵我嗰個女仔咩樣之後⋯⋯





個咖啡妹肯肯定confirm左我係等女神幾粒鐘嘅觀音兵，所以笑柒我

喺我面前坐低嘅女仔，眼大大，戴粉紅色眼鏡，啡色中長髮，啱啱蓋過耳仔，著緊身t-shirt，棗紅色長褲

皮膚好似從來無曬過太陽咁白，五官立體，似相澤理奈，可能仲靚啲

不過上帝好公平，屬性點數加爆左外貌就唔記得加發育屬性比佢

點解個胸可以仲平過miki架？

「我有啲唔舒服，啱啱睇醫生，手機又無電⋯⋯你等左好耐？」我地約兩點，而家四點半，你話呢？

「我留意左十五分鐘，先覺得你應該係阿金。」

可能因為病，佢把聲比較沙啞

留乜鬼意，直接走黎問丫嘛死蠢

呢個女仔叫嘉儀，今年二十四歲，係一個網絡作家

其實唔可以算係職業，因為佢仲未有收入

「我喺高燈斷斷續續咁寫故寫左兩年，終於有一個故得倒讀者支持同回應⋯⋯」

十幾個故事，通常係無人睇而唔寫，或者爛尾





「我十二歲開始寫小說，一直都唔敢比人睇。兩年前終於鼓起勇氣po上網，又少人睇⋯⋯」

而當佢終於有一個故事多人睇，就比人惡意攻擊